قوس چەمپيون «جايىق» سپورت كەشەنىندە مۇنايلى استاناداعى جانكۇيەرلەرىمەن كەزدەستى.
-اتىراۋعا كەلگەن سايىن ءبىزدى جوعارى دەڭگەيدە كۇتىپ الادى. بۇگىنگى كەزدەسۋدى ۇيىمداستىرىپ جاتقان بارشا ۇيىمداستىرۋشىلارعا العىسىم شەكسىز. وزدەرىڭىزدەي ءبىزدى قولدايتىن ەل باردا, ارقاشان جەڭىسكە جەتەتىنىمىزگە سەنىمدىمىن, - دەيدى سەرگەي موروزوۆ.
سونداي-اق كەزدەسۋ بارىسىندا چەمپيوندار جانكۇيەرلەردىڭ ساۋالدارىنا جاۋاپ بەرىپ, الداعى جوسپارلارىمەن ءبولىستى.
مەنىڭ FIGHT NIGHTS-پەن كەلىسىم شارتىم اياقتالدى. ەندىگى كەزەكتە UFC-عا شىعۋعا جۇمىستانىپ جاتىرمىن. كەلەسى جىلى شىعىپ قالۋىم مۇمكىن, - دەيدى جالعاس جۇماعۇلوۆ.
سپورت ساڭلاقتارىنا اتىراۋلىقتار قۇرمەت كورسەتىپ, ات مىنگىزدى.
ايتا كەتەيىك, جالعاس جۇماعۇلوۆ 19 قازان كۇنى سوچي قالاسىندا وتكەن ارالاس جەكپە-جەكتەن رەسەيلىك ءالي باگاۋتينوۆپەن كەزدەسىپ, جەڭىسكە جەتكەن بولاتىن. وسىلايشا, وزىنە تيەسىلى Fight Nights Global چەمپيوندىق تيتۋلىن ساقتاپ قالدى. سونىمەن قاتار 19 قازان كۇنى, سەرگەي موروزوۆ امەريكاندىق دجوش رەتتينگحاۋسپەن كەزدەسۋ وتكىزدى. تورەشىلەردىڭ شەشىمىمەن جەڭىسكە جەتكەن سەرگەي م-1 Global تيتۋلىن قورعاپ شىقتى.
