بي كەشىنە جيىلعان جۇرتشىلىقتى جاستار تەاترىنىڭ فويەسىندە ەرەكشە تارتۋ-تارالعى كۇتىپ تۇردى. ارىپتەستەرىنە سىي جاساپ جۇرگەن ماڭعىستاۋلىق حورەوگراف – سەرىك ساريەۆ. بي ونەرىن قۇرمەتتەپ, دارىپتەيتىن ازامات قىلقالام شەبەرلەرىنە ارنايى تاپسىرىس جاساپ, بي ونەرى مايتالماندارىنىڭ پورترەتتەرىن سالعىزىپتى. مايلى بوياۋمەن, اسقان شەبەرلىكپەن سالىنعان دۇنيەلەردىڭ ارقايسىسى دا وزىنشە سىرلى, قۇندى. «جاقسىنى كورمەك ءۇشىن» دەگەندەي بۇل پورترەتتەردىڭ «دانالار. ماشھۇرلەر. ۇلىلار» اتاۋىمەن ارنايى كورمەسى ۇيىمداستىرىلىپ, ونى قازاق ۇلتتىق حورەوگرافيا اكادەمياسىنىڭ پروفەسسورى, قازاقستاننىڭ ەڭبەك سىڭىرگەن ءارتىسى تويعان ءىزىم مەن قازاقستاننىڭ ەڭبەك سىڭىرگەن قايراتكەرى, قويۋشى-بالەتمەيستەر ايگۇل ءتاتي اشتى.
«ناز» – ەلىمىزدەگى العاشقى كاسىبي بي تەاترى. 1999 جىلى استانا قالاسى مەملەكەتتىك فيلارمونياسى جانىنان العاش «ناز» حالىق بي ءانسامبلى بولىپ قۇرىلعان. 2007 جىلى استانا قالاسى اكىمدىگىنىڭ «ناز» مەملەكەتتىك بي تەاترى بولىپ اتالدى. تەاتردىڭ ىرگەتاسىن قالاعان كاسىبي حورەوگرافتار ەركەبۇلان جانە حاديشا اعىمباەۆتار. «ناز» قۇرىلعان كۇننەن باستاپ نۇر-سۇلتان قالاسىنداعى مادەني ءىس-شارالارعا بەلسەنە قاتىسىپ, كوپشىلىكتىڭ ءىلتيپاتى مەن قۇرمەتىنە بولەنىپ كەلە جاتقان ماڭدايالدى مادەني ۇجىمدار قاتارىندا. كونتسەرتتىڭ اشىلۋ بارىسىندا قۇتتىقتاۋ ءسوز سويلەگەن «ناز» مەملەكەتتىك بي تەاترىنىڭ ديرەكتورى سۇلتان سرايىلوۆ تەاتردىڭ جيىرما جىلدا جەتكەن جەتىستىكتەرىنىڭ قوماقتى ەكەنىن جەتكىزدى. وسى كەشتە مادەنيەت جانە سپورت ۆيتسە-ءمينيسترى نۇرعيسا داۋەشوۆ تەاتر ءارتىسى ازامات بەكتەمىروۆتى «قۇرمەت» گراموتاسىمەن, اقان رىسقاليەۆ جانە ناتاليا لەونتەۆانى «مادەنيەت سالاسىنىڭ ۇزدىگى» توسبەلگىسىمەن ماراپاتتادى.
كونتسەرتتىك باعدارلامادا كورەرمەندەر قازاقتىڭ ۇلتتىق بيلەرى مەن الەم حالىقتارىنىڭ بيلەرىن تاماشالاپ, حورەوگرافيالىق سپەكتاكلدەردەن ۇزىندىلەر كوردى. مىڭ بۇرالعان بيشىلەر قالامگەرلەردىڭ ساعاتتاپ جازاتىن سەزىم دۇنيەلەرىن ساناۋلى مينۋتتارعا سىيعىزىپ, كورەرمەندەردى كوركەمدىك الەمىنە قوناق ەتتى. ونىڭ ىشىندە دارا تالانت نۇرعيسا تىلەنديەۆكە ارنالعان «نۇرعيسا» بي-سپەكتاكلى, الەمدىك تاريحتا ورنى بار ءباھادۇر قولباسشىعا ارنالعان «شىڭعىس حان» قويىلىمى, شىعىس ەرتەگىلەرى نەگىزىندە ساحنالانعان «1001 ءتۇن», جاسوسپىرىمدەرگە ارنالعان «ۋ سانا» حورەوگرافيالىق سپەكتاكلى كوركەمدىك ەستەتيكاسى وتە جوعارى, تەاتردىڭ قولتاڭباسى انىق بايقالاتىن دارا دۇنيەلەر ەكەنىن ايتۋ كەرەك.
ءارتىستىڭ ساحنالىق كوستيۋمى ونىڭ ونەرىنە ءار بەرىپ, شىعارماشىلىق تۇلعاسىن ماڭىزدى ەتىپ كورسەتەدى. بۇل ورايدا «نازدىڭ» «زەكەن مودا» ءسان ۇيىمەن شىعارماشىلىق بايلانىسىنىڭ ءجونى بولەك. «نازدىڭ» مەرەيتويىندا كورەرمەندەر اتالعان ءسان ءۇيىنىڭ «جاستار جالىنى» اتتى دەفيلەسىن تاماشالادى.
«ناز» مەملەكەتتىك بي تەاترى بىلتىر 20 جىلدىق مەرەيتويلارىنا ارناپ «بي – سەزىمنىڭ پوەزياسى» اتتى رەسپۋبليكالىق جىر ءمۇشايراسىن جاريالاعان ەكەن. كونتسەرتتىك كەشتە ءمۇشايرانىڭ قورىتىندىسى دا شىعارىلدى. ۇلتتىق بيلەرىمىزدىڭ مارتەبەسىن كوتەرۋ, بي ونەرىنىڭ حالىقتىڭ تۇرمىس-تىرشىلىگىندە الاتىن ورنىن انىقتاۋ ماقساتىندا جاريالانعان مۇشايراعا اقىندار كوپتەگەن ولەڭ جىبەرگەن. سونىڭ ىشىندە ەڭ ۇزدىك ولەڭدەردىڭ توپتاماسى تولقىن سۇلتاننىڭ «ناز مەملەكەتتىك بي تەاترى. جيىرما جىلدىق بەلەس» اتتى تەاتر تاريحىنان سىر شەرتەتىن كىتابىنا ەنىپتى. كىتاپ جاقىن كۇندەرى باسپادان شىعىپ, وقىرمانعا جول تارتاتىن بولادى. ال مۇشايراعا كەلەتىن بولساق, جۇزدەن جۇيرىك شىققان اقىنداردىڭ ەسىمدەرى كەش بارىسىندا بەلگىلى بولىپ, تيەسىلى سىيلىقتارى تابىستالدى. ىنتالاندىرۋ سىيلىعى جانە العىس حاتپەن سەرىك سەيتمان, اسكەرحان اقتاي, قۋات ەجەمبەك, نارقۇلان رايحان سەكىلدى اقىندار ماراپاتتالدى. جۇلدەلى ءىىى ورىن, ديپلوم جانە 100 000 تەڭگە اقشالاي سىيلىققا اقىندار جۇما-نازار سومجۇرەك پەن قالقامان سارين يە بولدى. ءىى ورىننىڭ 200 000 تەڭگەسى مەن ديپلومى اقىن اسحات ايماعانبەتوۆتى تاپتى. ال بايقاۋدىڭ ءى ورنىن جانە 300 000 تەڭگە اقشالاي سىيلىق پەن ديپلومدى اقىن ازامات ءمالجانباي الدى.
ايگۇل سەيىل,
«Egemen Qazaqstan»
