«بالاۋسا» اتتى بالاباقشا 100 ورىنعا لايىقتالعان. بۇل مەكەمەنىڭ ءبىر ەرەكشەلىگى سول, ول كەشكە, سونداي-اق دەمالىس جانە مەرەكە كۇندەرى جۇمىس ىستەيدى. اتالعان بالاباقشانىڭ قۇرىلتايشىسى باعدات بەكەجانوۆانىڭ ايتۋىنشا, جاڭادان اشىلعان مەكەمە 30 ادامعا جۇمىس تاۋىپ بەرگەن.
– جوبانىڭ جالپى قۇنى 30 ميلليون تەڭگە بولدى. ونىڭ 5 ميلليون تەڭگەسى ءوزىمنىڭ قالتامنان شىقتى دا, قالعانىن «دامۋ» قورىنان نەسيە تۇرىندە الدىم, دەيدى ول.
ال ء«داريا» بالاباقشاسىن قۇرىلتايشى اسەم ورماناليەۆا 30 ميلليون تەڭگە بولاتىن ءوز قاراجاتىنا سالىپتى. مەكتەپكە دەيىنگى مەكەمە 60 ورىنعا ەسەپتەلگەن. بالاباقشا يەسى اسەم ورماناليەۆا بالدىرعانداردى دامىتۋدى ەل دامۋىنىڭ ماڭىزدى شارتتارىنىڭ ءبىرى جانە ول جارقىن بولاشاقتىڭ كەپىلى دەپ سانايدى.
– بالالاردى مەكتەپكە دەيىنگى بىلىممەن قامتاماسىز ەتۋ – ءبىزدىڭ ء«داريا» بالاباقشاسىنىڭ باستى ماقساتى, – دەدى ول جاڭا نىساننىڭ اشىلۋ سالتاناتىندا.
قاراعاندى وبلىسى
