ءىس-شارادا 500-گە جۋىق جوعارى سىنىپ وقۋشىلارى مەن كوللەدج ستۋدەنتتەرى, سونىمەن قوسا ح.دوسمۇحانبەتوۆ اتىنداعى اتىراۋ مەملەكەتتىك ۋنيۆەرسيتەتىنىڭ اسكەري كافەدرا تىڭداۋشىلارى قاتىستى. قۇرمەتتى قوناق رەتىندە قارۋلى كۇشتەردىڭ اردەگەرلەرى شاقىرىلدى.
اسكەري-پاتريوتتىق تاربيە بەرۋ – جاستارعا ءوز ەلى مەن وتانىن سۇيۋگە ۇيرەتەتىن, ولاردى ادالدىققا تاربيەلەۋدەگى باسىم باعىتتاردىڭ ءبىرى بولىپ تابىلادى.
گارنيزوندا ۇيىمداستىرىلعان شارا اياسىندا بالالار اسكەري ءومىردى كورىپ, اسكەري كيىم ۇلگىلەرىمەن, اسكەري تەحنيكا جانە قارۋ-جاراق تۇرلەرىمەن تانىستى. اسكەري ءبولىمنىڭ وفيتسەر-تاربيەشىلەرى اسكەري ءومىر مەن ءتارتىپ تۋرالى, سونداي-اق اسكەري قىزمەتتىڭ, جاۋىنگەرلىك جانە وقۋ-جاۋىنگەرلىك تاپسىرمالاردىڭ ءوتۋ ءتارتىبى تۋرالى ايتىپ ءتۇسىندىردى.
وقۋشىلار قولما-قول ۇرىس كورىنىستەرىن تاماشالاپ, قىزىعۋشىلىق تانىتقاندار اسكەريلەنگەن ەستافەتاعا قاتىسۋعا مۇمكىندىك الدى. ەستافەتا جەڭىمپازدارى «باتىس» وڭىرلىك قولباسشىلىعى اتىنان العىس حاتتارمەن ماراپاتتالدى.
ماڭعىستاۋ وبلىسى
