ول نەبارى 13 جاسىندا ستۋدەنت اتانىپ, 17 جاسىندا ماگيسترانت بولىپ, 18 جاسىندا ماگيسترلىك ديسسەرتاتسياسىن قورعاپ, ونەرتانۋ عىلىمىنىڭ دوكتورانتى اتاندى. ول – «دارىن» مەملەكەتتىك سىيلىعىنىڭ ەڭ جاس يەگەرى. تاۋەلسىز قازاقستان تاريحىنداعى 17 جاسىندا تمد پارلامەنتارالىق اسسامبلەياسىنىڭ «مادەنيەت پەن ونەردى دامىتۋداعى ەرەن ەڭبەگى ءۇشىن» قۇرمەت بەلگىسىمەن ماراپاتتالعان ەڭ جاس جانە جالعىز مادەنيەت قايراتكەرى. ول – باح, موتسارت, گايدننان باستاپ, قازىرگى كلاسسيكتەرگە دەيىنگى الەمدىك كلاسسيكالىق شەدەۆرلەردى جينايتىن وڭتۇستىك يللينويس ۋنيۆەرسيتەتىنىڭ (اقش) «Discography» وركەسترىمەن فورتەپيانوعا ارنالعان تۋىندىلاردى ورىندايتىن الەمدىك قوردىڭ قورجىنىنا تۋىندىلارى ەنگەن قازاقستانداعى ەڭ جاس ءارى جالعىز كومپوزيتور. ول – زاماناۋي مۋزىكالاردى ورىنداۋشىلار مەن كومپوزيتورلاردىڭ حالىقارالىق اكادەمياسىنىڭ ەڭ جاس قاتىسۋشىسى.
قاراپايىم وتباسىنان شىعىپ, قاراقۇرىم حالىقتى اۋزىنا قاراتقان ەرەكشە تالانت يەسىنىڭ ەسىمى – ابدىساعين راحات-بي تولەگەن ۇلى. جاس كومپوزيتور, پيانيست, حالىقارالىق كونكۋرستاردىڭ لاۋرەاتى راحات-ءبيدى ەلىمىز تۇگىلى الەم جۇرتشىلىعى دا تانىپ ۇلگەردى. ءبىزدىڭ كەيىپكەرىمىزدىڭ شىعارمالارىن ەۋروپا, ازيا جانە امەريكانىڭ سيمفونيالىق وركەسترلەرى مەن كامەرالى انسامبلدەرى, اتاقتى سوليستەر ورىندايدى. ونىڭ مۋزىكاسى ازيا مەن ەۋروپا ەلدەرىنىڭ بەلگىلى كونتسەرتتىك زالدارىندا ءجيى قويىلادى. شىعارمالارىنىڭ الەمدىك پرەمەراسى پراگا, لوندون, ۆەنا, پاريج, بەرلين, سەۋل, انكارا, ىستانبۇل, ماسكەۋ, روگاشكە-سلاتينە, بەرگامو, اركەيە, اليكانتە, الماتى جانە نۇر-سۇلتان قالالارىندا ءوتتى. شەتەلدىك سىنشىلار راحات-بيگە «قازاقتىڭ ناعىز عاجايىپ قۇبىلىسى, مىنەزىندە امبيتسياسى, قولىندا ەرەكشە كۇشى بار اسقان شەبەر پيانيست» دەگەن باعا بەرگەن. ول – ماتەماتيكانى زەرتتەۋگە قىزىققان, جان-جاقتى ينتەللەكتۋال. 14 جاسىندا «ماتەماتيكا جانە قازىرگى زامانعى مۋزىكا» (الماتى, 2013) جانە «Mathematics and Contemporary Music» (Almaty, 2013) عىلىمي ەڭبەكتەرىن جاريالادى. «گارمونيانىڭ شەتتەرى» اتتى شىعارماشىلىق جۇمىستار جيناعىنىڭ اۆتورى.
جاقىندا يتاليانىڭ ميلان قالاسىندا راحات-بي ابدىساعيننىڭ «سەزىلمەيتىن جۇلدىزدار سەرەناداسى» تۋىندىسىنىڭ الەمدىك تۇساۋكەسەرى ءوتتى دەگەن ءسۇيىنشى حابار جەتكەن بولاتىن. ەسكە سالا كەتسەك, راحات-بي يتاليانىڭ ءۇش بىردەي اتاقتى جوعارى وقۋ ورنىنا دوكتورانتۋراعا قابىلدانعان بولاتىن. ولار – دجۋزەپپە ۆەردي اتىنداعى ميلان كونسەرۆاتورياسىنا Master di II Livello (كومپوزيتسيا), چەزارە پولليني اتىنداعى پادۋيا كونسەرۆاتورياسىنا Master di II Livello (فورتەپيانو) جانە ريم قالاسىنداعى سانتا-چەچيليا اكادەمياسىنا Corso di Perfezionamento (كومپوزيتسيا). وسى جىلى ول اتالعان وقۋ ورىندارىن نەبارى 20 جاسىندا ءتامامدادى.
ونەر جولىندا وزىندىك قولتاڭباسىن قالدىرىپ ۇلگەرگەن جاس دارىندى بارلىعى «قازاقتىڭ موتسارتى» دەپ اتايدى. ون ەكى جاسىنان مۋزىكا جازا باستاعان ول كوپتەگەن بەدەلدى حالىقارالىق جارىستاردىڭ لاۋرەاتى اتاندى. 100-دەن استام مۋزىكالىق شىعارمانىڭ اۆتورى, سونىڭ ىشىندە كەڭ اۋقىمدى سيمفونيالىق جانە ءارتۇرلى كامەرالىق شىعارمالاردىڭ اۆتورى. راحات-بي وسىدان ەكى جىل بۇرىن ناۋرىز ايىندا پ.ي.چايكوۆسكي اتىنداعى ممك-دەن ءبىر ايلىق تاجىريبەدەن وتكەن بولاتىن. ماسكەۋ قالاسىنداعى اتى اڭىزعا اينالعان «كومپوزيتور» باسپا ۇيىنەن راحات-بي ابدىساعيننىڭ «God’s dwelling» («جيليششە بوگا») مەن «Over the vault of depth» («ناد سۆودوم گلۋبينى») اتتى سيمفونيالىق كارتينالارىنىڭ پارتيتۋرالارى شىقتى. ءدال قازىرگى ۋاقىتتا راحات-بي ابدىساعين ءار جىل سايىن 24 ەلدەن 200-گە جۋىق الەمگە ايگىلى مۋزىكانتتار مەن پەداگوگتار قاتىساتىن پ.ي.چايكوۆسكي اتىنداعى جاسوسپىرىمدەر كونكۋرسىنىڭ ادىلقازىلار مۇشەسى بولىپ تابىلادى.
سونىمەن بىرگە ر.ابدىساعين – «قازاقستاننىڭ 100 جاڭا ەسىمى» بايقاۋىنىڭ جەڭىمپازى.
