بەسىنشى وتىرىستىڭ تاقىرىبى: «ۇلكەن ەۋرازيا: جاھاندىق ىنتىماقتاستىقتىڭ جاڭا قۇرىلىمى جولىندا».
كلۋبتىڭ ساراپتامالىق تالقىلاۋىنا اقش, قىتاي جانە رەسەي اراسىنداعى قىرعي-قاباقتىڭ ۋشىعۋى, ساۋدا پروتەكتسيونيزمى مەن پوپۋليستىك كوڭىل-كۇيدىڭ ارتۋى, سونداي-اق يران مەن سولتۇستىك كورەيا توڭىرەگىندە جاڭا شيەلەنىستەردىڭ بوي كورسەتۋى سىندى ماسەلەلەر ارقاۋ بولماق.
اسىرەسە, ەۋرازيادا ىنتىماقتاستىقتىڭ بولاشاق قۇرىلىمىن قالىپتاستىرۋعا ۇلكەن كوڭىل ءبولىنىپ, جاھاندىق قاۋىپسىزدىكتىڭ سىن-تەگەۋرىندەرىنە قارسى تۇرۋ جولدارىن ىزدەۋ, سونداي-اق يادرولىق قارۋدى باقىلاۋسىز تاراتۋ ماسەلەلەرىنە نازار اۋدارىلادى.
شارا اياسىندا الەمدىك ەكونوميكا جانە ساياسات ينستيتۋتى استانا كلۋبىنىڭ قولداۋىمەن جاھاننىڭ جەتەكشى ساراپشىلارىنىڭ ستراتەگيالىق بولجامىن جيناقتاعان «ەۋرازيا 2020 ءۇشىن 10 باستى سىن-قاتەر» رەيتينگىسىنىڭ كەزەكتى شىعارىلىمى تانىستىرىلادى.
استانا كلۋبىنىڭ بەسىنشى وتىرىسىنداعى سەسسيا تاقىرىپتارى:
- «الەمدىك تارتىپ(سىزدىك): بولاشاق تاريحتى كىم جازادى؟»
- «كوپپوليارلى ەۋرازيا: ۇزدىكسىز قاقتىعىستار كەڭىستىگى؟»
- «ساۋدا سوعىسى جانە پروتەكتسيونيزم – جاھاندىق ەكونوميكانىڭ جاي-كۇيى نە بولماق؟»
- «دۇنيەجۇزىلىك تەحنولوگيالىق جارىس: جاھاندىق قاقتىعىستىڭ جاڭا الاڭى»
- «يادرولىق قارۋسىزدانۋدىڭ جاڭا تۇجىرىمداماسى: نە ىستەۋ كەرەك؟»
- «ورتالىق ازيا جاھاندىق مۇددەلەر توعىسىندا: حارتلەندتىڭ ارتىقشىلىقتارى مەن كەمشىلىكتەرى»
كەزەكتى باسقوسۋعا شارتاراپتىڭ 23 مەملەكەتىنەن گەوساياسات, ەكونوميكا مەن حالىقارالىق قاتىناستار سالاسىنىڭ ماڭدايالدى ساراپشىلارى رەتىندە مويىندالعان 50-دەن استام حالىقارالىق سپيكەرلەر قاتىسادى دەپ كۇتىلۋدە. قۇرمەتتى مەيمانداردىڭ قاتارىندا - 3 بۇرىنعى مەملەكەت باسشىسى, 5 ەكس-پرەمەر-مينيستر, 10 مينيستر جانە 1 نوبەل سىيلىعىنىڭ لاۋرەاتى بار. فورۋمعا قاتىساتىن ساراپشىلاردىڭ گەوگرافياسى كەڭ. اتاپ ايتساق, اقش, يسپانيا, يتاليا, رەسەي, جاپونيا, سەربيا, اۆستريا, نورۆەگيا, قىتاي, ءۇندىستان, بەلگيا, اۋعانستان, شۆەتسيا, پورتۋگاليا, وڭتۇستىك كورەيا, ەگيپەت, بانگلادەش, سلوۆەنيا, قىرعىزستان, يران, ۇلىبريتانيا, پاكىستان ەلدەرى بار.
قازاقستاننىڭ تۇڭعىش پرەزيدەنتىنىڭ توراعالىعىمەن وتەتىن كلۋبتىڭ پلەنارلىق وتىرىسى – ءىس-شارانىڭ نەگىزگى وزەگى «ۇلكەن ەۋرازيانى قۇرۋ: سەرىكتەستىكتىڭ جاڭا ۇلگىسى» تاقىرىبىن قاۋزاۋعا ارنالادى.
اعىمداعى جىلعى «استانا كلۋبىنىڭ» نەگىزگى سپيكەرلەرىنىڭ قۇرامى:
- مۇحاممەد ءال-بارادەي, نوبەل سىيلىعىنىڭ لاۋرەاتى (2005), ماگاتە-ءنىڭ باس ديرەكتورى (2013-2014), ەگيپەت
- دجەيكوب فرەنكەل, JP Morgan Chase International ديرەكتورلار كەڭەسىنىڭ توراعاسى, 30 (G 30) حالىقارالىق توبىنىڭ توراعاسى, يزرايل ۇلتتىق بانكىنىڭ توراعاسى (1991—2000), اقش
- جوزە مانۋەل بارروزۋ, ەۋروپالىق كوميسسيا توراعاسى (2004-2014 جج.), Goldman Sachs International اتقارۋشى ەمەس توراعاسى, پورتۋگاليا.
- حاميد كارزاي, اۋعانستان پرەزيدەنتى (2001-2014), اۋعانستان.
- حوسە لۋيس ساپاتەرو, يسپانيا پرەمەر-ءمينيسترى (2004-2011), يسپانيا
- يۆ لەتەرم, بەلگيا پرەمەر-ءمينيسترى (2008, 2009-2011), IDEA حالىقارالىق ينستيتۋتىنىڭ باس حاتشىسى, بەلگيا.
- شاۋكات ازيز, پاكىستان پرەمەر-ءمينيسترى (2004-2007), پاكىستان.
- دانيلو تيۋرك, سلوۆەنيا پرەزيدەنتى (2007-2012), سلوۆەنيا.
- يۋن بيونسە, كورەيا رەسپۋبليكاسىنىڭ سىرتقى ىستەر ءمينيسترى (2013-2017), وڭتۇستىك كورەيا.
- فرانكو فراتتيني, يتاليانىڭ سىرتقى ىستەر ءمينيسترى (2002-2004, 2008-2011), يتاليا.
- ميحايل فرادكوۆ, رەسەي ستراتەگيالىق زەرتتەۋ ينستيتۋتىنىڭ ديرەكتورى, رف ۇكىمەتىنىڭ توراعاسى (2004-2007), رف سىرتقى بارلاۋ قىزمەتىنىڭ ديرەكتورى (2007-2016).
شارا ۇيىمداستىرۋشىسى - قازاقستان رەسپۋبليكاسى تۇڭعىش پرەزيدەنتى - ەلباسىنىڭ قورى جانە الەمدىك ەكونوميكا جانە ساياسات ينستيتۋتى.
«استانا كلۋبىنىڭ» ميسسياسى - قازاقستاننىڭ سىرتقى ساياساتىنىڭ باسىمدىقتارى تۇرعىسىنان جاھاندىق كۇنتارتىبىن قالىپتاستىرۋ ءۇشىن ەۋرازيانىڭ جەتەكشى ساراپشىلارى, ساياسي كوشباسشىلارى مەن ديپلوماتتارىن ءبىر الاڭعا بىرىكتىرۋ.
«استانا كلۋبىنىڭ» جۇمىسىنا ءداستۇر بويىنشا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازارباەۆ قاتىسادى.
«استانا كلۋبى» وتىرىستارىنىڭ ءبىر بولىگى «Chatham house» ەرەجەلەرىنە سايكەس وتكىزىلەدى. بۇل تالقىلاۋدىڭ جابىق سيپاتتا ءوتۋىن ساقتايدى جانە قازىرگى ۋاقىتتاعى ەۋرازيا مەن الەمنىڭ ەڭ وزەكتى ماسەلەلەرىنىڭ وتكىر ءارى اشىق تالقىلانۋىنا مۇمكىندىك بەرەدى.
وسى جىلدار ىشىندە كلۋب وتىرىستارىنا 40 ەلدەن 200-دەن استام سپيكەر قاتىستى.
