«قازاقستان ۇيىنە كەلگەندەي بولدىم عوي», - ك ۇلىپ ايتتى ديماش قازاقستاننىڭ بىرىككەن ۇلتتار ۇيىمى جانىنداعى تۇراقتى وكىلدىگىنە كەلگەندە. سونداي –اق بۇۇ–داعى قازاقستاننىڭ تۇراقتى وكىلىنىڭ كەڭەسشىسىنىڭ ۇسىنعان بەينە كورىنىستە ديماشتىڭ قازاقستاننىڭ مەملەكەتتىك تۋىنىڭ قاسىندا تۇرىپ «الەمگە بەيبىتشىلىك تىلەيمىن» دەپ تۇرعان ءساتى تاسپاعا ءتۇسىپ قالعان.
ديماش قۇدايبەرگەن قازىر نيۋ-يوركتەگى قازاقستاندىق ديپلوماتتارمەن جانە ولاردىڭ وتباسىلارىمەن كەزدەستى.
مۇنىڭ الدىندا ول Instagram پاراقشاسىندا رەسەيلىك كومپوزيتور يگور كرۋتويدىڭ نيۋ-يوركتە وتكەن شوۋىنان ۆيدەوۇزىندى جاريالاعان بولاتىن.
ايتا كەتسەك, يگور كرۋتويدىڭ برۋكلينداعى (نيۋ-يورك) Barclays Center ساحناسىندا يگور كرۋتويدىڭ «65-كە ومىردە, ءبىر-اق رەت تولامىز» اتتى كەشى وتكەن بولاتىن. كونتسەرتتىك زالعا 19 مىڭ ادام سيادى.
شوۋ نيۋ-يورك ۋاقىتى بويىنشا 26 قازاندا ساعات كەشكى 19.00-دە باستالدى. قازاق انشىسىمەن بىرگە امەريكالىق ساحنادا رەسەيدىڭ تانىمال انشىلەرى فيليپپ كيركوروۆ, نيكولاي باسكوۆ, سەرگەي لازارەۆ, يرينا اللەگروۆا, «ا-ستۋديو» قاتارلى انشىلەرى مەن توپتارى ونەر كورسەتتى. ديماشتىڭ جانكۇيەرلەرى ءانشىنى اۋەجايدىڭ وزىندە قارسى الىپ, كونتسەرتىندە ۇزاق قوشەمەتپەن قۇرمەت كورسەتتى.
ول ءوزىنىڭ Instagram پاراقشاسىندا جانكۇيەرلەرىنە العىسىن ءبىلدىردى.
«راحمەت, نيۋ-يورك 10 جەلتوقساندا ءدال وسى جەردە مەنiڭ كونتسەرتiمدە كەزدەسكەنشە!» - دەپ جازدى ءانشى.
ەسكە سالا كەتسەك, بۇعان دەيىن ديماش قۇدايبەرگەننىڭ نيۋ-يورك قالاسىنداعى «Barclays Center» ارەناسىندا 10 جەلتوقساندا كونتسەرت بەرەتىنىن جازعان بولاتىنبىز. ءانشى ءوزىنىڭ «ارناۋ» باعدارلاماسىن ورىنداماق. مادەني شارانى مادەنيەت جانە سپورت مينيسترلىگى ۇيىمداستىرادى.
ءانشى امەريكادا ءتورت تىلدە ان شىرقايدى.
