سوڭعى جىلدارى باسىلىمداعى وزگەرىستەردىڭ وقىرمان ءھام باسەكەلەستىك تالابىنا ساي جۇرگىزىلىپ جاتقانى, رەسمي سارىن ازايىپ, ەسەسىنە سىني, حالىقارالىق جاعدايلارعا قاتىستى ماتەريالدار, شەتەلدىك ساراپشىلاردىڭ پىكىرلەرىنە كوپ ورىن بەرىلە باستاعانى دا زيالى قاۋىم وكىلدەرى تاراپىنان ايتىلدى.
تۇركىستان وبلىستىق قوعامدىق دامۋ باسقارماسىنىڭ قولداۋىمەن, قازاقستان جۋرناليستەر وداعى تۇركىستان وبلىستىق فيليالىنىڭ ۇيىمداستىرۋىمەن وتكەن فورۋمدا كەزىندە ەل گازەتىندە ەڭبەك ەتكەن ارداگەرلەرگە قۇرمەت كورسەتىلىپ, باسىلىمنىڭ بۇگىنگى جاڭاشىل قادامدارى ۇلگى ەتىلدى. تۇركىستان, جامبىل, قىزىلوردا وبلىستارىنان, الماتى, شىمكەنت قالالارىنان كەلگەن بەلگىلى جۋرناليستەر رەسپۋبليكامىزدىڭ باس گازەتىنىڭ تورقالى تويىنا قۇتتى بولسىن ايتتى. تۇركىستاندا وڭتۇستىك وڭىرلەر جۋرناليستەرىنىڭ باسىن قوسقان فورۋمعا تىلەكتەستىگىن ءبىلدىرىپ, ۇسىنىسى مەن قۇتتىقتاۋلارىن جىبەرگەندەر دە از ەمەس. مىسالى, قازاق باسىلىمىنىڭ جاناشىرلارى سەنات دەپۋتاتتارى نۇرتورە ءجۇسىپ پەن ايگۇل قاپباروۆا, ءماجىلىس دەپۋتاتى دارحان مىڭبايدان ارنايى قۇتتىقتاۋلار كەلىپ ءتۇستى. ال «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالىنىڭ قۇتتىقتاۋ حاتىن فورۋم جۇمىسىن جۇرگىزگەن جۋرناليستەر وداعى تۇركىستان وبلىستىق فيليالى توراعاسى عالىمجان ەلشىباي وقىپ بەردى. «بۇگىنگى اقپارات ايدىنى وتە شاپشاڭ دامۋدا. وسىنداي سىندارلى كەزەڭ زامانا كوشىنە ىلەسىپ قانا قويماي, كەز كەلگەن قيىندىقتاردان جاڭاشىلدىقپەن جول تاۋىپ, تىڭ پىكىرلەرمەن زاماناۋي تىلمەن ايتقاندا كرەاتيۆتى يدەيالارعا ارقا سۇيەۋدى قاجەت ەتەدى. مۇنداي جاعدايدا مەدياكەڭىستىكتە تەر توگىپ, اقپارات سالاسىنىڭ قازانىندا قايناپ جۇرگەن قىزمەتكەرلەردىڭ باسىن قوسۋ, تاجىريبە ءبولىسۋدىڭ ماڭىزى وتە زور. تەك تۇركىستان عانا ەمەس, رەسپۋبليكانىڭ بىرنەشە وڭىرىندەگى بۇقارالىق اقپارات قۇرالدارىنىڭ, بلوگەرلەرىنىڭ باسىن قوسقان بۇگىنگى مەديافورۋمنىڭ العا قويعان ماقساتى – وسى سالادا جۇرگەن مامانداردىڭ تاجىريبەسىن ۇشتاۋ, قۇندى پىكىرلەردى العا قاراي ىلگەرىلەتۋ دەپ ەسەپتەيمىن», دەلىنگەن باسقارما توراعاسىنىڭ قۇتتىقتاۋ حاتىندا. سونداي-اق القالى جيىندا ءسوز العان جۋرناليستەر ەل گازەتىنىڭ وتكەنى مەن بۇگىنىنە, باسەكەلەستىككە ساي وزگەرىستەرىنە كەڭىنەن توقتالدى. كوپ جىلدار ەل گازەتىندە ەسەلى ەڭبەك ەتكەن بەلگىلى قالامگەر, «الاش» ادەبي سىيلىعىنىڭ يەگەرى, جازۋشى مارحابات بايعۇت «ەگەمەننىڭ» ەل تاريحىنداعى ەرەكشە ورنى مەن بۇگىنگى باعىتى تۋرالى اڭگىمەلەدى. ءارى جاس جۋرناليستەردى جاڭاشىلدىققا, ءوز مىندەتىن اتقارۋدا جاۋاپكەرشىلىككە ۇندەدى. كەزىندە باس باسىلىمنىڭ دامۋىنا وزىندىك ۇلەس قوسقان الاش ارىستارى تۇرار رىسقۇلوۆ پەن سۇلتانبەك قوجانوۆتىڭ قازاق گازەتتەرىنە جاناشىرلىعىن تىلگە تيەك ەتىپ, رۋحاني بايلىق ىزدەگەن تۇلعالاردىڭ اعارتۋشىلىق باعىتتاعى ەڭبەكتەرىن وسكەلەڭ ۇرپاققا ۇلگى-ونەگە ەتۋگە شاقىردى. ال ق.ا.ياساۋي اتىنداعى حقتۋ جۋرناليستيكا كافەدراسىنىڭ وقىتۋشىسى, عالىم سەيدوللا سادىقوۆ «ەگەمەننەن» ەلىمىزدىڭ 100 جىلدىق تاريحىن ايقىن كورۋگە بولاتىنىن اتاپ ءوتتى. «زۇلمات جىلداردىڭ ەلەسى, اشارشىلىق, رەپرەسسيا, ەكىنشى دۇنيەجۇزىلىك سوعىس, تىڭ يگەرۋ سياقتى حالقىمىزدىڭ باسىنان وتكەن شەجىرەلى كەزەڭنىڭ بارلىق كورىنىسىن باسىلىمنان تابا الاسىز. ۇلتتىق ادەبيەتىمىزدىڭ كلاسسيكالىق وزىق ۇلگىلەرى, ءسوز مارجاندارى دا وسى گازەتتە جاريالاندى. مەن ءوزىمنىڭ عىلىمي مونوگرافيالارىمدى جازۋ بارىسىندا وسى باسىلىمنىڭ مۇراعاتىن اقتاردىم. ستاليندىك جاپپاي رەپرەسسيالاۋ كەزىندەگى قارالاۋ, بيلىك تاراپىنان قولدان ۇيىمداستىرىلعان ىرىتكى سالارلىق دەرەكتى ماقالالار دا, جالپى قازاق حالقىنىڭ ءجۇرىپ وتكەن جولى, وتكەن كۇنىنىڭ شەجىرەسىن وسى ەلىمىزدىڭ باس گازەتى مۇراعاتىنان تابۋعا بولادى. باسىلىمنىڭ بۇگىنگى باعىتى, نارىقتىق زامانداعى ىزدەنىستەرى دە ۇلگى ەتەرلىك. جۋرناليستيكانى تاڭداعان جاستارعا بەرەرى مول باسىلىم», دەيدى سەيدوللا سادىقوۆ. سونداي-اق جامبىل وبلىستىق «اق جول» گازەتىنىڭ باس رەداكتورى كوسەمالى ءساتتىباي ۇلى مەملەكەتتىك ساتىپ الۋ, گازەتكە جازىلۋ جانە باسقا دا ماسەلەلەر بويىنشا ءوز كوزقاراسىن اشىق ايتتى. «تار زاماندا الاش زيالىلارى ەلدىڭ باي-ماناپتارىن قازاق باسپاسوزىنە جازىلۋعا شاقىرعان. قازاق باسىلىمدارىن توبەسىنە كوتەرگەن بۇل ەرلىك گازەتكە قىرىن قارايتىندارعا ساباق بولسا», دەپ اعىنان اقتارىلدى ك.ءساتتىباي ۇلى. ال «Egemen Qazaqstan» گازەتىنىڭ جامبىل وبلىسى بويىنشا مەنشىكتى ءتىلشىسى حاميت ەسامان باسىلىمنىڭ بۇگىنگى باعىتى, جاڭا ايدارلار, ينتەرنەت رەسۋرستاعى جەتىستىكتەرى جونىندە اڭگىمەلەدى. تۇركىستان وبلىستىق قوعامدىق دامۋ باسقارماسىنىڭ باسشىسى دامير ءجۇنىسوۆ «ەگەمەننىڭ» اقپاراتتىق كەڭىستىكتەگى ساياسي سالماعىنىڭ باسىمدىعىن ايتىپ, وڭىردە وڭدى ىستەردىڭ ەل گازەتى ارقىلى رەسپۋبليكاعا تارالىپ جاتقاندىعىنا توقتالدى. سونداي-اق فورۋمدا «ەگەمەننىڭ» باي فوتومۇراعاتىندا جيناقتالعان ەل تاريحىنان, تاۋەلسىزدىكتىڭ سىندارلى ساتتەرى مەن جارقىن جەتىستىكتەرىنەن سىر شەرتەتىن فوتوسۋرەتتەردى, ەلباسى مەن كورنەكتى تۇلعالاردىڭ, قازاقستان قالالارى مەن كورىكتى مەكەندەرىنىڭ سيرەك كەزدەسەتىن كورىنىستەرىن بۇگىنگى نارىقتىق سۇرانىسقا ساي ءتيىمدى پايدالانۋدى ۇسىنعاندار دا بولدى.
كەلەلى كەڭەستە كەزىندە «Egemen Qazaqstan» گازەتىندە قىزمەت ىستەگەن ارداگەر جۋرناليستەر مارحابات بايعۇت پەن كوسەمالى ءساتتىباي ۇلىنىڭ يىعىنا شاپان جابىلىپ, قۇرمەت كورسەتىلدى. «زاڭ مەديا» جشس باس ديرەكتورى دوسىمبەك قونىسبەك, رەسپۋبليكالىق «ۇلان» گازەتىنىڭ باس رەداكتورى جۇلدىز ءابدىلدا, «وتىرار» مەدياحولدينگىنىڭ ديرەكتورى ايگەرىم جۇماعۇلوۆا, «وڭتۇستىك رابات» گازەتىنىڭ رەداكتورى جانىبەك نۇرىش, جامبىل وبلىستىق «اراي» گازەتىنىڭ باس رەداكتورى داۋلەت تولەندى «جاڭا جانە ءداستۇرلى مەديا: ىنتىماقتاستىقتىڭ زاماناۋي مودەلدەرى» تاقىرىبىندا وي تولعادى. «فەيك جاڭالىقتار يندۋسترياسى: زاردابىمەن كۇرەسۋ جولدارى» تاقىرىبى دا قىزۋ تالقىلانىپ, ۇسىنىس-پىكىرلەر ورتاعا سالىندى.
تۇركىستان تورىندەگى فورۋم اياسىندا قازاقستان جۋرناليستەر وداعى تۇركىستان وبلىستىق فيليالىنىڭ توراعاسى عالىمجان ەلشىبايدىڭ ۇيىتقى بولۋىمەن وداقتىڭ جامبىل, قىزىلوردا, تۇركىستان وبلىستىق, شىمكەنت قالالىق فيليالدارى جانە «مەدياكراتيا» قوعامدىق بىرلەستىگى اراسىندا بىرلەسكەن مەموراندۋمعا قول قويىلدى. فورۋمعا قوناق رەتىندە قاتىسقان قازاقستان جۋرناليستەر وداعى باسقارماسىنىڭ توراعاسى سەيىتقازى ماتاەۆ تىرشىلىگى قايناعان تىلشىلەر قاۋىمىن بەرەكە-بىرلىككە شاقىرىپ, ەلدىك مۇددە جولىندا ەڭبەك ەتۋگە شاقىردى. جۋرناليستەر وداعىنا مۇشەلىككە قابىلدانعان بىرقاتار ارىپتەستەرگە مۇشەلىك كۋالىكتى تابىس ەتتى.
تۇركىستان
