وتكەن عاسىردا قاتەرلى ىسىك دياگنوزى قويىلسا شوشيتىن حالىق, قازىر بۇل اۋرۋدىڭ ەرتەرەك انىقتاسا جازىلۋعا بولاتىن كادىمگى سوزىلمالى سىرقات ەكەنىن بىلە باستاعان. سونداي-اق ۋاقىتتى وتكىزىڭكىرەپ العاننىڭ وزىندە حالىقارالىق تاجىريبەدە ونكولوگيالىق ناۋقاستاردى راديكالدى ەمدەپ, ولاردىڭ ءومىرىن ۇزارتۋدا جوعارى تەحنولوگيالىق ادىستەردى قولدانۋ جاقسى ناتيجە كورسەتەتىنەن دە حاباردار بولا باستادى. وسى ىسپەتتى جاڭا تەحنولوگياعا نەگىزدەلگەن ەمدەۋ جولى – «TomoTherapy HD» جابدىعى كومەگىمەن جاڭا زاماناۋي توموتەراپيا ءادىسى بويىنشا ونكولوگيالىق ناۋقاستاردى ەمدەۋگە جول اشادى.
– بۇل بىرەگەي قوندىرعى ءاربىر پاتسيەنتتىڭ دەرتىنە سايكەس كەلەتىن ەڭ ءدال جانە جوعارى ساپالى ساۋلەلەنۋدى جۇزەگە اسىرادى. قوندىرعى پاتسيەنتكە قاجەتتى ساۋلە دوزاسىن شىعارعان كەزدە ونىڭ بىرەگەي سپيرالدى رەجىمى كۇردەلى, ءارى قولجەتىمدىلىگى قيىن تۇستا ورنالاسقان ىسىكتەردى ساۋلەلەندىرۋمەن قاتار, ونىڭ اسەرىنەن قورشاعان ساۋ تىندەردى ءتيىمدى قورعاۋعا مۇمكىندىك بەرەدى. بۇل ەمدەلۋشىلەردىڭ ءتۇرلى ساناتتارى ءۇشىن ساۋلەلىك تەراپيانى پايدالانۋدىڭ مۇمكىندىگىن كەڭەيتەدى. تاياۋدا دۇنيەجۇزىلىك ونكولوگتار كونگرەسىنە قاتىسقان وتاندىق ونكوديسپانسەرلەردىڭ باسشىلارى ءبىزدىڭ ورتالىقتا بولىپ, ناۋقاستار ەمىندەگى ءتيىمدى جول رەتىندە بىزگە پاتسيەنتتەردى جىبەرۋ قاجەت دەگەن ۇيعارىمعا كەلدى. بۇگىنگى تاڭدا 21 ادام ەمدەلۋ ۇستىندە, 9 ادام جوسپاردا تۇر, ال 18 پاتسيەنت قارالۋ ۇستىندە. ال نەگىزى قوندىرعىدان 106 ادام ەمدەلىپ شىقتى, – دەيدى «دامۋ» قورى ارقىلى 1 ملرد تەڭگە شاماسىنداعى قوندىرعىنى الىپ, دەرتتى جاندارعا ءۇمىت سىيلاعان ء«ۇمىت» توموتەراپيا جانە يادرولىق مەديتسينا اۋرۋحانا كەشەنى» جشس-نىڭ ديرەكتورى ەرجان شاياحمەتوۆ,
ال «Digital System Servis» جشس تەلەكوممۋنيكاتسيالىق نارىقتا 2005 جىلدان باستاپ جۇمىس ىستەپ كەلەدى. وسى كەزەڭ ىشىندە كومپانيا ءوزىن Mitel, Aastra, Ericsson, Avaya, Cisco, Advantech Wireless جانە باسقا دا الەمدىك جەتەكشى تەلەكوممۋنيكاتسيالىق جابدىقتاردى وندىرۋشىلەردىڭ تابىستى ءارى سەنىمدى سەرىكتەسى رەتىندە كورسەتە ءبىلدى. جوبالاۋ, جەتكىزۋ, مونتاجداۋ, كەشەندى ينتەگراتسيا, پايدالانۋعا بەرۋ جانە سەرۆيستىك قىزمەت كورسەتۋ, سونداي-اق IT سالاسىنداعى اۋتسورسينگتى قامتيتىن تەلەكوممۋنيكاتسيالىق جوبالاردى ازىرلەۋ جانە ىسكە اسىرۋ بويىنشا قىزمەتتەردىڭ تولىق سپەكترىن ۇسىناتىن كومپانيا تەلەكوممۋنيكاتسيالىق جابدىقتاردى ءوندىرۋ جونىندەگى زاۋىت قۇرىلىسىن جوسپارلاۋدى ويلاستىرادى. بۇل جوسپارعا قولداۋ كورسەتكەن نۇر-سۇلتان قالاسىنىڭ اكىمدىگى 2016 جىلى «استانا – جاڭا قالا» ارنايى ەكونوميكالىق ايماعىنىڭ №1 يندۋستريالدى پاركىنىڭ اۋماعىنان تەلەكوممۋنيكاتسيالىق جابدىق-مودەمدەر, كوممۋتاتورلار شىعاراتىن زاۋىت قۇرىلىسىنا جەر ۋچاسكەسىن ءبولدى. ال جوبانى ىسكە اسىرۋعا قاراجات كەرەك. وسى رەتتە كومپانيا باسشىلىعى «دامۋ» قورىنىڭ استانالىق فيليالىنا جۇگىنەدى. سونىمەن «Digital System Servis» جشس زاۋىت قۇرىلىسىنا قاجەتتى ينۆەستيتسيالىق ماقساتتارعا 14,25%-بەن نەسيە الادى, ونىڭ 40%-ىن مەملەكەت «بيزنەستىڭ جول كارتاسى – 2020» باعدارلاماسى شەڭبەرىندە سۋبسيديالايدى. ال اراداعى ايىرماشىلىقتى 5 جىل نەسيە مەرزىمىمەن كاسىپكەر تولەپ, كەپىلدىكتى قامتاماسىز ەتۋدىڭ جەتكىلىكتىلىكسىزدىگىنە بايلانىستى «دامۋ» قورى قارىز سوماسىنان 30% مولشەرىندە كەپىلدىك بەرىپتى. سونداي-اق كومپانيالار وڭدەۋشى ونەركاسىپتەگى كاسىپكەرلەردى قولداۋ باعدارلاماسى اياسىندا 6%-عا وندىرىستىك ستانوكتاردى ساتىپ الۋعا دا قارىز بەرەدى. وسىنداي ناقتى قولداۋ ارقىلى كومپانيا 2018 جىلدان باستاپ مودەمدەر, كوممۋتاتورلار, تەلەفون ستانسالارى سىندى تەلەكوممۋنيكاتسيالىق جابدىقتاردى وندىرۋگە كىرىستى.
1992 جىلى قۇرىلعان «ۆەستا» تىگىن سالونى جشس 25 جىلدىڭ جۇزىندە سىرتقى كيىم, جەڭىل كيىم, اسكەري كيىم, مەكتەپ فورماسىن تىگۋمەن اينالىسادى. العاشقى اياق الىستارى تۋرالى سەرىكتەستىك ديرەكتورى فاريزا شادىجەۆا: ء«بىرىنشى جۇمىسىمىز ۆەتروۆكالار (جەڭىلدەتىلگەن كۋرتكالار), پالتو, قىسقى كۋرتكالار مەن كوستيۋمدەر تىگۋ بولدى. دايىن ونىمدەرىمىز تەز ساتىلدى. جالپى جۇرتشىلىقتان, ۇيىمداردان تاپسىرىس الا باستادىق. جاڭاجىلدىق پرەزيدەنت شىرشاسىنا كونتسەرتتىك كوستيۋمدەر, وركەسترلىك كيىمدەر تىگىپ, تىنىسىمىز كەڭەيە تۇسكەندە كۇشتىك قۇرىلىمدارى, الدىمەن قارجى, توتەنشە جاعدايلار مينيسترلىكتەرى, سالىق كوميتەتى, ۇلتتىق قاۋىپسىزدىك كوميتەتى جانە باسقا دا مەملەكەتتىك ۆەدومستۆولار تاپسىرىس بەرە باستادى. كاسىپورىن 1996 جىلدان باستاپ, ياعني 20 جىلدان استام مەملەكەتتىڭ بارلىق كۇشتىك قۇرىلىمدارى ءۇشىن اسكەري كيىم تىگۋگە مامانداندى. قازىر وندىرىستە 50-گە جۋىق ادام, تىگىن ءىسىنىڭ ۇزدىك ماماندارى مەن شەبەرلەرى جۇمىس ىستەيدى. «دامۋ» قورىنىڭ قولداۋىمەن جەڭىلدەتىلگەن نەسيە الىپ, ءوندىرىستى كەڭەيتۋ ماقساتىندا كاسىپورىننىڭ جاڭا عيماراتىن سالۋعا كىرىستىك. قازىر قۇرىلىس تامامدالۋعا جاقىن, كەلەسى ماۋسىمدا قازىرگىدەي 50 ەمەس, 100-150 ادامدى جۇمىسپەن قامتيتىن ءوندىرىس ورنىن ىسكە قوسامىز», دەيدى.
«دامۋ» ارقىلى دامۋعا قول جەتكىزگەندەردىڭ ءبىرى – «كوركەم 2011» جشس. مەكتەپكە دەيىنگى ءبىلىم بەرۋ قىزمەتىن كورسەتۋ سالاسىندا تاجىريبەسى بار كاسىپورىن جۇمىسىن باستاعان سوڭ ۋاقىت وتە كەلە بالاباقشاعا بالاسىن ورنالاستىرعىسى كەلەتىندەردىڭ مەسەلىن قايتاراتىن بولدى. سەبەبى بىرەۋ-اق – ورىن جەتكىلىكسىز. سوندىقتان ەكىنشى بالاباقشا اشۋ كەرەك دەگەن ۇيعارىمعا كەلگەن ولار Bi Group قۇرىلىس كومپانياسىنان لايىقتى ورىن-جايدى تاۋىپ, «دامۋ» كاسىپكەرلىكتى دامىتۋ قورىنا قولداۋ كورسەتۋگە ءوتىنىش ءبىلدىردى. جوبانى «قازاقستان حالىق بانكى» اق دا قارجىلاندىرىپ, كومپانيا جىلدىق 14,5%-بەن ينۆەستيتسيالىق ماقساتتا قارىز الادى. بۇل بورىشتىڭ 40%-ىن مەملەكەت «بيزنەستىڭ جول كارتاسى-2020» باعدارلاماسى شەڭبەرىندە سۋبسيديالادى, ال ايىرماشىلىقتى كاسىپكەر تولەيدى. ناتيجەسىندە 2019 جىلدىڭ 16 قاڭتارىندا جالپى سىيىمدىلىعى 100 ادامدىق جاڭا بالاباقشا اشىلدى. بۇدان ءارى مەملەكەتتىڭ دوتاتسياسى الىنعان بالاباقشادا بالدىرعاندار بەس مەزگىل تاماقتانىپ, ويىندار مەن ساباقتار وتكىزىلەدى. سونداي-اق بالاقايلار سەرۋەندەپ, قوسىمشا ۇيىرمەلەر جۇمىسىنا قاتىسىپ, مەكتەپكە تولىق دايارلىقپەن باراتىن جاعدايعا جەتتى. «بىزدە جۇمىس ىستەيتىن ادامدار قالاداعى وزگە جەكەشەلەنگەن بالاباقشاداعى ارىپتەستەرىنە قاراعاندا 1,5 ەسە ارتىق جالاقى الادى» دەيدى ايجان جاقسىگەلدينوۆا.
ءباسپاسوز تۋرى بارىسىندا 4 كاسىپورىن وكىلدەرى دە «ارينە, ءبىز كۇندەلىكتى اتقاراتىن ءىسىمىزدى جالعاستىرا بەرەتىنىمىز ايان. بىراق ءبىر ورىندا تۇرىپ ءوسۋ, دامۋ قيىن. ال «دامۋ» قورى ءبىزدىڭ تىنىسىمىزدى كەڭەيتىپ, جاڭا مۇمكىندىككە جول اشتى. سول ءۇشىن مەملەكەت تاراپىنان جاسالعان قولداۋعا ءدان ريزامىز» دەستى.
