قۇجاتتا ۇلى جەڭىستىڭ كەلەسى جىلعى ءىرى مەرەيتويىنا وراي الماتى قالاسىندا تۇراقتى تىركەلگەن جانە تۇراقتى تۇراتىن مۇقتاج ازاماتتاردىڭ جەكەلەگەن ساناتتارىنا ءبىر جولعى الەۋمەتتىك كومەك كورسەتىلمەك. وعان سايكەس, ۇلى وتان سوعىسىنىڭ قاتىسۋشىلارى مەن مۇگەدەكتەرىنە 2020 جىلى 250 مىڭ تەڭگەدەن بەرىلەتىن بولدى.
ەلىمىزدىڭ باستى ءىرى مەگاپوليسى رەتىندە بۇل قالا جەڭىستىڭ ءار مەرەيتويىندا ارداگەرلەرگە جانە باسقا دا تۇلعالارعا تولەنەتىن بىرجولعى تولەم كولەمىن ۇدايى ۇلعايتىپ وتىراتىن. ماسەلەن, 2005 جىلى ۇلى وتان سوعىسىنداعى جەڭىستىڭ 60 جىلدىعىندا ەلىمىزدەگى بارلىق ارداگەرلەرگە جانە سوعىس مۇگەدەكتەرىنە بىردەي – 30 مىڭ تەڭگە كولەمىندە بىرجولعى ماتەريالدىق كومەك بەرىلگەن. بۇعان 1 ملرد 16,1 ملن تەڭگە بيۋدجەت قاراجاتى شىعىندالىپتى. ال 2015 جىلعى جەڭىستىڭ 70 جىلدىعىندا ۇوس ارداگەرلەرى مەن تىل ەڭبەككەرلەرىنە ءار ءوڭىر ءارتۇرلى سىيلىق جاسادى. ەڭ ۇلكەن سومانى الماتى مەن استانا قالالارى بەردى. بۇلاردا اتالعان ساناتتاعى جانە سولارعا تەڭەستىرىلگەن ازاماتتاردىڭ ەسەپشوتتارىنا 150 مىڭ تەڭگەدەن اۋدارىلعان. وزگە وڭىرلەردە 120–150 مىڭ تەڭگە ارالىعىندا ۇسىنىلدى. بيىلعى جىلى «دوڭگەلەك» داتا بولعان جوق, دەگەنمەن الماتىدا 267 ۇوس قاتىسۋشىلارىنا جانە مۇگەدەكتەرىنە 250 مىڭ تەڭگەدەن ءبىر رەتتىك تولەم تولەندى.
2019 جىلعى 9 مامىردا ارداگەرلەرگە جالپى كولەمى 66 ملن تەڭگەدەن استام قارجى جۇمسالىپتى. بۇدان بولەك, جەڭىلدىكتەرى مەن كەپىلدىكتەرى بويىنشا سولارعا تەڭەستىرىلگەن تۇلعالارعا, اۋعان سوعىسىندا جاراقات العاندارعا دا 50 مىڭ تەڭگەدەن تولەمدەر تولەندى.
سول سۇراپىل مايداندا قايتىس بولعان جانە حابار-وشارسىز كەتكەن جاۋىنگەرلەردىڭ قايتادان نەكەگە تۇرماعان جەسىرلەرىنە دە وسىنشا كولەمدە بىرجولعى كومەك ۇسىنىلۋعا ءتيىس. اۋعانستانداعى سوعىس كەزەڭىندە جارالانۋ, كونتۋزيا الۋ, زاقىمدانۋ نەمەسە اۋرۋعا شالدىعۋ سالدارىنان قازا تاپقان, قايتىس بولعان, سونداي-اق حابار-وشارسىز كەتكەن اسكەري قىزمەتكەرلەردىڭ اتا-انالارى جانە قايتا كۇيەۋگە شىقپاعان ايەلدەرىنە نەمەسە ۇيلەنبەگەن كۇيەۋلەرىنە 100 مىڭ تەڭگەدەن تولەنەدى.
الماتىلىقتاردىڭ تاعى ءبىر ساناتى – ءىى دۇنيەجۇزىلىك سوعىس جىلدارىندا تىلداعى قاجىرلى ەڭبەگى جانە ءمىنسىز جاۋىنگەرلىك قىزمەتى ءۇشىن بۇرىنعى كەڭەس وداعىنىڭ وردەندەرىمەن جانە مەدالدارىمەن ماراپاتتالعان تۇلعالار, سونداي-اق 1941 جىلدىڭ 22 ماۋسىمى مەن 1945 جىلدىڭ 9 مامىرى ارالىعىندا كەم دەگەندە 6 اي ەڭبەك ەتكەن, بىراق وردەن-مەدالدارمەن ماراپاتتالماعان, اتالعان سانات بويىنشا ارناۋلى مەملەكەتتىك جاردەماقى الاتىن تۇلعالار 50 مىڭ تەڭگەدەن الادى دەپ كۇتىلۋدە.
الماتى
