كەزدەسۋ بارىسىندا ەلباسى ۆلاديمير زەلەنسكيدى ۋكراينانىڭ پرەزيدەنت سايلاۋىنداعى جەڭىسىمەن قۇتتىقتادى.
– ۋكراينانىڭ جاڭالىقتارىن كۇندەلىكتى قاداعالاپ وتىرامىن. مەن ءۇشىن ءسىزدىڭ ەلىڭىزدىڭ ورنى ەرەكشە. بۇل كەزىندە ۋكراينادا ەكى جىل وقىعانىم ءۇشىن عانا ەمەس. تاۋەلسىزدىكتىڭ العاشقى كۇندەرىنەن باستاپ ۋكراينا پرەزيدەنتتەرىمەن جاقىن تانىس بولدىم, – دەدى قازاقستاننىڭ تۇڭعىش پرەزيدەنتى.
سونىمەن بىرگە, نۇرسۇلتان نازارباەۆ ۋكرايناداعى وقيعالارعا ءوز الاڭداۋشىلىعىن ءبىلدىردى.
ەلباسى ۋكراينانىڭ وڭتۇستىك-شىعىسىنداعى قاقتىعىستى بەيبىت جولمەن شەشۋدىڭ ماڭىزدىلىعىن اتاپ ءوتتى.
– ءسىز سايلاۋدا حالىقتىڭ ۇلكەن سەنىمىنە يە بولدىڭىز. جوسپارلارىڭىزدى جۇزەگە اسىرۋ ءۇشىن بارلىق مۇمكىندىك بار, – دەدى ەلباسى.
ءوز كەزەگىندە, ۆلاديمير زەلەنسكي ۋكراينانىڭ قازاقستان رەسپۋبليكاسىن كەڭ اۋقىمدى ماسەلەلەر بويىنشا ءاردايىم قولداعانىن اتاپ ءوتتى.
كەلىسسوزدەر بارىسىندا, ۆ.زەلەنسكي قازاقستان پرەزيدەنتى ق-ج.توقاەۆپەن نيۋ-يورك قالاسىندا كەزدەسكەنىن ايتا كەلە ەلباسىنى ۋكرايناعا شاقىردى.
سونىمەن قاتار, تاراپتار ەكى ەل اراسىنداعى ساۋدا-ساتتىقتى ارتتىرىپ, قاتىناستاردى نىعايتۋ ماسەلەلەرىن تالقىلادى.
