قوعام • 21 قازان، 2019

ءاربىر ساقتاندىرىلعان ازاماتقا 83،1 مىڭ تەڭگە جۇمسالادى

39 رەت كورسەتىلدى

«الەۋمەتتىك مەديتسينالىق ساقتاندىرۋ قورى» كەاق باسقارما توراعاسىنىڭ ەرىك ءبايجۇنىسوۆتىڭ مالىمدەۋىنشە، 2020 جىلى ءاربىر ساقتاندىرىلعان ادامعا كورسەتىلەتىن مەديتسينالىق كومەككە 83،1 مىڭ تەڭگە جۇمسالماق. ناتيجەسىندە ازاماتتاردىڭ دەنساۋلىققا جۇمسايتىن جەكە شىعىندارى ەداۋىر قىسقارادى.

ەلۆيرا سەرىكقىزى

ءتيىستى مەكەمەنىڭ الماتى قالاسى بويىنشا ءباسپاسوز قىزمەتىنىڭ مالىمەتى بويىنشا، رەسپۋبليكا تۇرعىندارى مەديتسينالىق كومەككە قاتىستى ساۋالدارىن 1406 نومىرىنە جولداپ، ناقتى جاۋاپتار الۋىنا مۇمكىندىگى بار. تەگىن مەديتسينالىق كومەككە بولىنەتىن قاراجات كولەمى جىل سايىن ارتىپ وتىرعانىنا قاراماستان، مەديتسينا سالاسىنداعى شىعىنداردىڭ 41 پايىزى حالىقتىڭ قالتاسىنان شىعادى. بۇل ددسۇ بەلگىلەگەن مەجەدەن ەكى ەسە كوپ.

قوردىڭ مالىمەتىنشە، قازىر حالىقتىڭ 93 پايىزى ساقتاندىرۋ جۇيەسىمەن قامتىلعان. ونىڭ پايىزى – مەملەكەت تاراپىنان ساقتاندىرىلاتىن جەڭىلدىگى بار 11 ملن ازامات. قالعانى – جالدامالى جۇمىسشىلار، جەكە كاسىپكەرلەر مەن بجت تولەۋشىلەر. ساقتاندىرىلعانداردىڭ ءبارى دە 2020 جىلدان باستاپ كەڭەيتىلگەن كولەمدە مەديتسينالىق كومەك الا الادى. ولاردىڭ قاتارىندا سالالىق ماماندار كەڭەسى، باعاسى قىمبات زەرتحانالىق اناليزدەر مەن مرت، كت سىندى دياگنوستيكالىق زەرتتەۋلەر دە بار.

«تۇرعىندارعا از مولشەردە جارنا تولەپ، اۋىرىپ قالعان جاعدايدا قۇنى ميلليونداعان تەڭگە تۇراتىن كومەككە قول جەتكىزۋگە بولاتىنىن ايتىپ ءتۇسىندىرۋىمىز كەرەك. مىسالى، جۇرەك نەمەسە باۋىر الماستىرۋ سىندى كۇردەلى وپەراتسيالار قولجەتىمدى بولماق. الەۋمەتتىك ساقتاندىرۋ دەگەنىمىز مىنە، وسى»، - دەدى ە.ءبايجۇنىسوۆ.

جۇرتشىلىقتى جۇمىستان شىعىپ قالعان جاعدايدا مەديتسينالىق كومەك كورسەتۋ ءتارتىبى وزگەرە مە دەگەن ساۋالدىڭ مازالايتىنى انىق. ونداي جاعدايدا «جۇمىسسىز قالعان ازاماتتار ءمامس پاكەتىنە ەنگەن قىزمەتتەردى جارنا تولەۋ توقتاعاننان كەيىن ءۇش اي بويى پايدالانا الادى. باسقا جۇمىسقا تۇرعاننان كەيىن جۇمىس بەرۋشى ونىڭ اتىنا اۋدارىم جاساي باستايدى. ال، «ەكى قولعا ءبىر كۇرەك» تاپپاعان جاعدايدا ءتيىستى ورىندارعا حابارلاسىپ، جۇمىسسىز رەتىندە رەسمي تىركەلۋ قاجەت. بۇل سانات مەملەكەت تاراپىنان ساقتاندىرىلادى».

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز