اتىراۋ وبلىسى يندەر اۋدانىنىڭ ورتالىعىندا ەكى بىردەي ءسوز سۇلەيىنە ارنالعان قۇرمەت - ەلباسىنىڭ " ۇلى دالانىڭ جەتى قىرى" باعدارلامالىق ماقالاسى اياسىندا مۇمكىن بولىپ وتىر.
"سويلەمەسەم كىم بىلەر, قىزىل ءتىلدىڭ جورعاسىن",-دەپ جىرلاعان ايتىسكەر اقىن, ايگىلى جىراۋ مۇرات موڭكە ۇلىنىڭ ماڭگىلىك مەكەنى - يندەر اۋدانىنىڭ جارسۋات اۋىلى ماڭىندا. زامانا سىرىن تولعاعان اقىن ەسكەرتكىشىنىڭ اۆتورى - سۋرەتشىلەر وداعىنىڭ مۇشەسى جاقىپ قۇتتىبەك. ەسكەرتكىشتى اشۋ قۇرمەتى جازۋشىلار وداعى باسقارما توراعاسىنىڭ ورىنباسارى مەرەكە قۇلكەنوۆ پەن مۇرات اقىن ۇرپاعى كوشكىنباي ەستاەۆقا بەرىلدى.
"ماڭگى باقي مەكەنىمدى تابۋ ءۇشىن دەندەردەن, مەن دە ءبىر كۇن كەتەر مە ەكەم باقۇلداسىپ سەندەرمەن",-دەپ قازاققا تاڭسىق گيتارا اسپابىن جىراۋلىق ونەرمەن شەبەر شەندەستىرگەن بارد اقىن تابىلدى دوسىموۆتىڭ ومىردەن وزعانىنا دا بيىل 9 جىل. بار عۇمىرىن تۋعان جەرىنىڭ مادەنيەتى مەن رۋحانياتىنا ارناعان اقىننىڭ دەندەرى دارىندى ۇلىن ەسكە الدى. تازا قولادان قۇيىلعان بەلگىلى اقىن, بىرەگەي كومپوزيتوردىڭ ەسكەرتكىشى - سۋرەتشىلەر وداعىنىڭ مۇشەسى باقىتبەك مۇحامەتجانوۆتىڭ جۇمىسى. اقىننىڭ دوستارى ارمان سقابىل ۇلى مەن تالعات قايىرجانوۆ ەسكەرتكىشتىڭ لەنتاسىن قيدى.ەڭبەك سىڭىرگەن قايراتكەر, بەلگىلى اقىن سۆەتقالي نۇرجاننىڭ تولعانا ايتقان سوزىنە تەبىرەنبەگەن جان بولمادى.
-تۋعان جەردىڭ تالانتتى پەرزەنتتەرىن ۇلىقتاۋ ارقىلى وسكەلەڭ ۇرپاقتى وتانسۇيگىشتىككە تاربيەلەۋدىڭ ماڭىزى زور. بۇل ەكى ەسكەرتكىش تە حالىقتىڭ ويىندا جۇرگەن, كوپتەن كۇتكەن دۇنيە ەدى,-دەدى سالتاناتتى شاراعا قاتىسقان وبلىس اكىمىنىڭ ءبىرىنشى ورىنباسارى سەرىك شاپكەنوۆ.
دەندەردەگى رۋحانيات مەرەكەسىنە ەلىمىزگە بەلگىلى ونەر قايراتكەرلەرى, ايماقتاعى زيالى قاۋىم وكىلدەرى, پارلامەنت دەپۋتاتتارى, جالپى جۇرتشىلىق جينالدى.
