فورۋمنىڭ اشىلۋى بارىسىندا كەلگەن قوناقتارعا قوشەمەتىن بىلدىرگەن يۋنەسكو مادەنيەتتەردى جاقىنداستىرۋ ورتالىعىنىڭ ديرەكتورى, قوعام قايراتكەرى ولجاس سۇلەيمەنوۆ تاقىرىپتىڭ اۋقىمدىلىعىن قوزعاپ, بۇگىندە الەم ءۇشىن تۇراقتىلىق پەن بەيبىتشىلىكتىڭ ماڭىزدى ەكەندىگىن اتاپ ءوتتى.
فورۋمعا ارنايى كەلىپ, قۇتتىقتاۋ لەبىزدەرىن ايتقان قازاقستانداعى كونسۋلدىقتاردىڭ وكىلدەرى جۇزدەن استام ۇلتتار مەن ۇلىس وكىلدەرىن تىنىشتىقتا ۇستاپ وتىرعان ەل بيلىگىنە العىسىن ءبىلدىردى.
الەمدىك ديالوگ پەن مادەنيەتتىڭ ءوزارا ارەكەتتەسۋى ادامزاتتىڭ دامۋىندا شەشۋشى رولگە يە. فورۋم الاڭىندا كەزدەسكەن الەم عالىمدارى مۇسىلمان الەمىنىڭ وركەنيەت كەڭىستىگىندەگى ۇلەسى, عىلىمنىڭ ءاربىر سالاسىنىڭ دامۋىنداعى يگى جەتىستىكتەرىن ءسوز ەتتى. قازاقستاندىق عالىمدار ءا.دەربىسالى, ع.مۇتانوۆ, فرانتسيادان ا.فيشلەر, اقش-تان د.پەتريك, ءۇندىستاننان م.حايدەر, رەسەيدەن ر.ۆالەەۆ, وزبەكستاننان ف.مۋمينوۆا, ت.ب. زەرتتەۋ باعىتتارى بويىنشا بايانداما جاسادى.
شىعىس پەن باتىستىڭ اعارتۋشىلارىنىڭ ويلارى ادامزات وركەنيەتىنىڭ دامۋىنا, مادەنيەتتەردىڭ جاقىنداسۋى مەن عالامدىق سانانىڭ قالىپتاسۋىنا تيگىزەتىن اسەرىن كورسەتۋدى ماقسات ەتەتىن فورۋم باتىس پەن ورتا عاسىردىڭ تۇركى-اراب-مۇسىلمان الەمى: ءبىلىم ەستافەتاسى; بەيبىتشىلىك پەن تۇراقتى دامۋدىڭ قاينار كوزى - ءبىلىم مادەنيەتى; مادەنيەتتەردى جاقىنداستىرۋدىڭ جانە عالامدىق سانانىڭ قالىپتاسۋىنىڭ نەگىزى - دالەلدى ديالوگ ءۇش سەكتسيا بويىنشا وتۋدە.
الماتى
