ەكىجاقتى كەزدەسۋ بارىسىندا نۇرسۇلتان نازارباەۆ قازاقستان مەن ازەربايجان اراسىنداعى قارىم-قاتىناستىڭ سەرپىندى دامىپ كەلە جاتقانىن اتاپ ءوتتى.
– بۇگىن مەن سىزدەرگە العاش رەت باسقا مارتەبەمەن كەلىپ تۇرمىن. قازاقستاندا تاۋەلسىزدىكتى نىعايتۋ جانە ەكونوميكالىق دامۋدىڭ باعدارلامالارىن جۇزەگە اسىرۋ بويىنشا قولعا الىنعان جۇمىستار جالعاسىن تابۋدا. باۋىرلاس ەكى ەلدىڭ بايلانىسى ۋاقىت وتكەن سايىن بەكىپ جاتىر. قازىرگى تاڭدا بىزدە ىنتىماقتاستىقتى كەڭەيتۋدىڭ مۇمكىندىگى مول. قازاقستان-ازەربايجان ساۋدا-ساتتىق كولەمىن ارتتىرۋ قاجەت. ءبىز ءتيىستى لوگيستيكانى قالىپتاستىردىق. مەن قۇرمەتتى توراعا مارتەبەسىن ريزاشىلىقپەن قابىل الدىم. ويتكەنى ءبىزدىڭ مەملەكەتتەرىمىزدىڭ ىنتىماقتاستىعىن نىعايتۋعا ءالى دە ۇلەسىمدى قوسقىم كەلەدى, – دەدى ەلباسى.
ءوز كەزەگىندە يلحام اليەۆ ەلباسىنا تۇركى كەڭەسىنە قاتىسۋ ءۇشىن ارنايى ات باسىن بۇرعانىنا العىسىن ءبىلدىرىپ, ونىڭ ەكىجاقتى قارىم-قاتىناستاردى نىعايتۋعا سىڭىرگەن ەڭبەگىن ەرەكشە اتاپ ءوتتى.
– ءبىز ءۇشىن ازەربايجان جەرىندە قازاقستاننىڭ تۇڭعىش پرەزيدەنتىن قارسى الۋ – ۇلكەن قۇرمەت. ءسىز – ازەربايجاننىڭ ۇلكەن دوسىسىز. كوپتەگەن حالىقارالىق ماسەلە بويىنشا ءسىز ءبىزدىڭ ەلىمىزدى ءاردايىم قولداپ كەلەسىز. تۇركىتىلدەس ەلدەر اراسىنداعى ىنتىماقتاستىقتى نىعايتۋ ىسىنە دە قوسقان ۇلەسىڭىز وراسان. ءبىز مەرەيتويلىق ءسامميتتىڭ باكۋدە وتەتىنىنە وتە قۋانىشتىمىز, – دەدى ازەربايجان پرەزيدەنتى.
بۇعان قوسا يلحام اليەۆ قازاقستاننىڭ جاڭا استاناسىن سالۋى باكۋ قالاسىن دامىتۋ جولىندا ۇلگى بولعانىن ايتتى.
– مەن سىزدەردىڭ ەلوردالارىڭىزدىڭ قارقىندى وزگەرىپ جاتقانىن كورىپ وتىرمىن. ەكسپو كورمەسىنە قاتىسقان كەزىمدە قۇرىلىس اۋقىمىنا جانە ساۋلەت شەبەرلىگىنە قايران قالدىم. قازاقستاننىڭ بارلىق جەتىستىگى ءسىزدىڭ اتىڭىزبەن تىكەلەي بايلانىستى, – دەدى ازەربايجان پرەزيدەنتى.
ورىنبەك وتەمۇرات,
«Egemen Qazaqstan» – باكۋدەن (ازەربايجان)
