قازاقستانداعى فرانتسۋز رەسپۋبليكاسىنىڭ توتەنشە جانە وكىلەتتى ەلشىسى فيليپپ مارتينەمەن سۇحبات بارىسىندا پرەمەر-ءمينيستردىڭ ورىنباسارى رومان سكليار, بۇگىنگى كۇندە فرانتسيا قازاقستاننىڭ نەگىزگى 5 ساۋدا-ساتتىق سەرىكتەسىنىڭ بىرىنە كىرەتىنىن جانە ەلىمىزدىڭ ەكونوميكاسىنا نەگىزگى ينۆەستورلاردىڭ ءبىرى ەكەنىن, سونداي-اق, تاۋار اينالىمى ءوسۋىنىڭ وڭ قارقىنىن اتاپ ءوتتى. سوڭعى 14 جىلدا فرانتسيادان قازاقستانعا كەلگەن تىكەلەي ينۆەستيتسيالاردىڭ جالپى كولەمى 15 ملرد اقش دوللارىنان استى.
بۇدان وزگە, بيىل جەلتوقساندا فرانتسيا پرەزيدەنتى ەممانۋەل ماكروننىڭ قازاقستانعا ساپارى جوسپارلانعان. ءوز كەزەگىندە ءبىزدىڭ ەل وعان ۇلكەن نازار اۋدارۋدا, سوندىقتان 8 قازاندا پاريجدە قازاقستان-فرانتسۋز بيزنەس-فورۋمىنىڭ وتكىزىلۋى قازاقستان مەن فرانتسيا اراسىنداعى ەكىجاقتى ىنتىماقتاستىقتى تەرەڭدەتۋگە مۇمكىندىك بەرەدى.
سونىمەن بىرگە بەلارۋس رەسپۋبليكاسىنىڭ توتەنشە جانە وكىلەتتى ەلشىسى اناتولي نيچكاسوۆپەن رەسمي كەزدەسۋ بارىسىندا بۇرىننان كەلە جاتقان ەكىجاقتى قاتىناستاردىڭ دامۋىنىڭ نەگىزگى كەزەڭدەرى, ەاەك شەڭبەرىندەگى ىنتىماقتاستىقتىڭ نەگىزگى ماسەلەلەرى, سونداي-اق, 2019 جىلعى 8-9 قازاندا نۇر-سۇلتان قالاسىندا جوسپارلانعان قازاقستان-بەلارۋس ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ 15-وتىرىسىنىڭ وتكىزىلۋىنە دايىندىق ماسەلەلەرى تالقىلاندى. ۇكىمەتارالىق كوميسسيا شەڭبەرىندە قازاقستان رەسپۋبليكاسى مەن بەلارۋس رەسپۋبليكاسى اراسىنداعى ونەركاسىپتىك كووپەراتسيا جانە تەحنيكانى جەتكىزۋ, مادەني-گۋمانيتارلىق سالالارداعى ماڭىزدى ماسەلەلەر, ساۋدا-ەكونوميكالىق ىنتىماقتاستىق پەن ونى كەڭەيتۋ پەرسپەكتيۆالارى جانە باسقا سۇراقتار كوتەرىلىپ, قارالاتىن بولادى.
كەزدەسۋ قورىتىندىلارى بويىنشا تاراپتار تاتۋ كورشىلىك قاتىناستاردى دامىتۋدىڭ وڭ ۆەكتورىن ودان ءارى ساقتاپ قالىپ, ولاردىڭ نىعايۋىنا بار كۇش-جىگەرلەرىن سالۋعا ۋاعدالاستى.
