العاشقى «التىن تۇلپار» بايگەسى 43 شاقىرىم بولعانى جانكۇيەرلەر ەسىندە. «جۇيرىكتەن جۇيرىك وزار جارىسقاندا» دەگەندەي, 2014 جىلعى الاماندا قاراعاندى وبلىسىنىڭ جۇيرىگى باقتورى الدىنا قارا سالماي دارا كەلدى. ەلىمىزدىڭ اتبەگىلەرى سول جولى بايگە قاشىقتىعىنىڭ 43 شاقىرىمنان دا كوبىرەك بولۋىن وتىنگەن-ءدى. ءسويتىپ 2015 جىلى «التىن تۇلپاردىڭ» بايگە جولى 51 شاقىرىمعا ۇزارتىلدى. بۇل قاشىقتىقتا جامبىل وبلىسىنىڭ تۇلپارى «Cامالدان» وزعان قىلقۇيرىقتى بولعان جوق. 2016 جىلعى بايگەدە جەتىسۋ ولكەسىنىڭ جۇيرىگى جاننۇر مارەدەن جارقىراپ جالعىز ءوتتى. 2017 جىلى جوعارىداعى سامال اتتى سايگ ۇلىك «التىن تۇلپاردىڭ» ون ميلليون تەڭگەلىك باس بايگەسىن ەكىنشى مارتە قانجىعاسىنا بايلادى.
«التىن تۇلپاردى» تەك ەلوردا توڭىرەگىندە عانا ەمەس, ەلىمىزدىڭ باسقا وڭىرلەرىندە دە وتكىزۋدى ۇيعارعان ۇلتتىق سپورت قاۋىمداستىعى كەزەكتى الامان بايگەنى اتىراۋ وڭىرىندە ۇيىمداستىرۋدى ءجون كورىپ وتىر. جارىستىڭ رەسمي اتاۋى – «التىن تۇلپار – جايىق جاعاسىندا». ياعني, بيىلعى جىلدىڭ باستى بايگەسى 12 قازاندا اتىراۋ وبلىسى, ماحامبەت اۋدانى, تالدىكول اۋىلىنىڭ ىرگەسىندە ۇيىمداستىرىلماق.
جايىق جاعاسىندا وتەتىن الامان بايگەگە بارلىق جۇيرىك تۇقىمدار قوسىلادى. ەلىمىزدىڭ 14 وبلىسى جانە نۇر-سۇلتان, الماتى, شىمكەنت قالالارىنىڭ ارقايسىسىنان 5 سايگ ۇلىكتەن قاتىسادى. جۇلدە قورى – 22 ميلليون تەڭگە. باس جۇلدە – 10 ميلليون. شىلبىر ۇستاتقان العاشقى توعىز جۇيرىككە جۇلدە بەرىلەدى.
اتىراۋ ولكەسىندە بەسىنشى مارتە ۇيىمداستىرىلاتىن بيىلعى ايتۋلى الامانعا ەلىمىزدىڭ ەڭ تاڭداۋلى جەتپىستەن استام سايگ ۇلىكتەرى باق سىنايدى دەپ كۇتىلۋدە. ءبىر قىزىعى, 2015 جىلى جانە 2017 جىلى «التىن تۇلپاردا» ەكى رەت باس بايگە العان سامال سايگ ۇلىكتىڭ, سونداي-اق 2017 جىلعى الاماندا ەكىنشى ورىن العان جەتىسۋلىق جۇيرىك قويانقاسقانىڭ اتبەگىلەرى بابى كەلىسكەن تۇلپارلارىنىڭ باعىن اتىراۋ توپىراعىندا تاعى ءبىر سىناپ كورمەككە بەكىنىپتى. سوندىقتان بىلىكتى ماماندار پىكىرىنشە جايىق جاعاسىندا وتەتىن «التىن تۇلپار» بايگەسىنىڭ بۇل جولعى باسەكەسى ءتىپتى ەرەكشە بولماقشى.
