قاسىم-جومارت توقاەۆ نيكول پاشينيانعا قوناقجايلىعى مەن جوعارى ەۋرازيالىق ەكونوميكالىق كەڭەس وتىرىسىن بيىك دارەجەدە ۇيىمداستىرعانى ءۇشىن العىس بىلدىرە وتىرىپ, ەكى ەل اراسىندا قالىپتاسقان سەنىمدى ديالوگتى اتاپ ءوتتى.
– قازاق حالقى ارميان حالقىن قۇرمەتتەيدى. ءبىز قوس مەملەكەت اراسىنداعى قارىم-قاتىناستى نىعايتۋعا نيەتتىمىز. ەكى ەلدىڭ ورتاسىنداعى ساۋدا-ەكونوميكالىق ىنتىماقتاستىققا ەرەكشە نازار اۋدارۋىمىز كەرەك. جۇمىستى جانداندىرىپ قانا قويماي, بەرىك ىنتىماقتاستىقتىڭ قوسىمشا مۇمكىندىكتەرىن قاراستىرۋ قاجەت, – دەپ اتاپ ءوتتى قاسىم-جومارت توقاەۆ.
نيكول پاشينيان ەكونوميكا سالاسىنداعى قازاقستان مەن ارمەنيانىڭ ءوزارا قارىم-قاتىناسى ودان ءارى جاندانا بەرەتىنىنە سەنىم ءبىلدىردى.
– سوڭعى ۋاقىتتا ءبىزدىڭ ساۋدا-ەكونوميكا سالاسىنداعى قارىم-قاتىناستارىمىز جاڭا بەلەسكە كوتەرىلدى. بىراق ءبىزدىڭ الەۋەتىمىز بۇدان الدەقايدا جوعارى دەپ ويلايمىن. ءبىز وسى الەۋەتىمىزدى بارىنشا جانداندىرۋعا كۇش سالۋىمىز كەرەك. ويتكەنى ەۋرازيالىق ەكونوميكالىق وداق ءبىزدىڭ ەلدەرىمىز ءۇشىن جاڭا مۇمكىندىكتەر اشىپ وتىر, – دەدى ارمەنيا پرەمەر-ءمينيسترى.
