قىركۇيەكتىڭ باسىنان ەلىمىزدەگى استىقتى ايماقتاردىڭ ءبىرى سانالاتىن اقمولا وبلىسىنىڭ ەگىستىك القاپتارى دۇرىستاپ ءبىر دەگدىمەدى دەسەك تە بولعانداي. بۋراباي, ءبىرجان سال, زەرەندى اۋداندارىندا 24-36,2 ميلليمەتر شاماسىندا ىلعال ءتۇستى. ال جارقايىڭ, ەسىل, جاقسى اۋداندارىنداعى جاۋىن-شاشىننىڭ مولشەرى 11-22,4 ميلليمەتر دەڭگەيدە بولدى. قورعالجىن اۋدانىنان وزگە وڭىرلەردە كۇن قاباعى ءبىر اشىلمادى. جۇمىستىڭ جۇرۋىنەن تۇرۋى كوپ بولعان سوڭ قانشا كۇش سالعانىمەن, ناۋقاننىڭ العاشقى كۇندەرىندە ديقانداردىڭ ادىمى اشىلمادى.
ەندى ۋاقىتتان ۇتۋ ءۇشىن كەز كەلگەن اشىق ءساتتى ءتيىمدى پايدالانعان ءلازىم. وراق جۇمىسى ەگىندى تىكەلەي ورسا, جيىن-تەرىم تەزىرەك اياقتالار ەدى. بىراق دەستەگە تۇسىرمەي تاعى بولمايدى. كەي القاپتاردىڭ ەگىنى ءالى جاپ-جاسىل. دەستەدە جاتىپ ءپىسىپ جەتىلمەسە, قامىرلىلىعى ارتپاي, تۇقىمعا دا جاراماي قالۋى مۇمكىن. سوندىقتان ديقاندار بىتىك وسكەن قۇنارلى جەرلەردى دەستەگە دە جىعىپ جاتىر. جاۋىن-شاشىن مول جىلى مۇنىڭ وزىندىك ماشاقاتى كوپ. دەستەدە استىقتىڭ كوكتەپ كەتۋى ىقتيمال. كوكتەدى-اق ەكەن, شىعىنى شاش-ەتەكتەن.
وبلىس ديقاندارى ۇستىمىزدەگى جىلى 4 ميلليون 379 600 گەكتار جەرگە ءداندى داقىل تۇقىمىن سىڭىرگەن بولاتىن. بۇگىنگە دەيىن 3 ملن 21,7 مىڭ گەكتار جەردىڭ استىعى دەستەگە ءتۇسىرىلىپ, 2 ملن 996,3 مىڭ گەكتار القاپ باستىرىلدى. بۇل بارلىق كولەمنىڭ 68,4 پايىزى. گەكتار بەرەكەسى ازىرگە 10,3 تسەنتنەردەن اينالۋدا. كارتوپ ەگىلگەن القاپتاردان 9,9 مىڭ گەكتارىنان نەمەسە ءونىمنىڭ 57,1 پايىزى جينالدى. كوكونىستىڭ 74,9 پايىزى قويماعا جەتكىزىلدى.
اۋا رايى قولايسىزداۋ بولعانىنا قاراماستان, وبلىس ديقاندارى بيدايدىڭ ءار گەكتارىنان – 10,3, كارتوپتىڭ ءار گەكتارىنان – 118,5, كوكونىستىڭ ءار گەكتارىنان 94,7 تسەنتنەردەن ءونىم جيناۋدا.
القاپتارداعى استىقتى شاشپاي-توكپەي جيناپ الۋ ءۇشىن جۇمىسقا 8,4 مىڭ استىق جينايتىن كومباين تارتىلدى. ولاردىڭ 3518-ءى ونىمدىلىگى جوعارى شەتەلدىك تەحنيكا. استىق تاسىمالداۋ ءبىرشاما ۇتىمدى ۇيىمداستىرىلۋدا. قىرماننان قامباعا دەيىن 4708 جۇك كولىگى, 7730 تراكتور تىركەمەسى جۇيتكىپ ءجۇر. قىزىل ءدان 494 مەحانيكالاندىرىلعان قىرمانعا تۇسۋدە. بۇل ارادا قولبايلاۋ بولىپ وتىرعان تۇيتكىل جوق.
كۇزگى دالا جۇمىستارىن ۋاقتىلى وتكىزۋ ءۇشىن 77,5 مىڭ توننا ديزەل وتىنى قاجەت. بيىل وبلىسقا كەپىلدەندىرىلگەن 72 مىڭ توننا ديزەل وتىنى بولىنگەن بولاتىن. ونىڭ قازىر 78,8 پايىزى نەمەسە 66,1 مىڭ تونناسى عانا جەتكىزىلگەن. وبلىس ديقاندارى كۇن اشىق بولسا الداعى 8-10 كۇننىڭ ىشىندە ەگىن وراعىن تولىق اياقتايمىز دەپ وتىر.
وبلىس اكىمدىگى ەنەرگەتيكا مينيسترلىگىنە جانە اۋىل شارۋاشىلىعى مينيسترلىگىنە ءوڭىردىڭ تاۋار وندىرۋشىلەرىنە قاجەتتى 30 مىڭ توننا ديزەل وتىنىن ءبولۋدى سۇراپ ءوتىنىم جاسادى. ديزەل وتىنى ەگىندى جيناپ الۋعا جەتكەنىمەن, ىلعال ءداندى كەپتىرۋگە جەتپەيدى. ەگەر وسى كولەمدە جەتكىزىلسە, استىق قابىلداۋ كاسىپورىندارى مەن كەپتىرگىش اگرەگاتتارى بار اۋىلشارۋاشىلىق قۇرىلىمدارىنا ءبولىنىپ بەرىلمەك. قازىر قامبالارعا 581 مىڭ توننا ءدان جەتكىزىلدى. ونىڭ 326,7 مىڭ تونناسى جۇمساق جانە قاتتى بيداي. ءبىر قۋانارلىعى, قامباعا تۇسكەن استىقتىڭ 80 پايىزعا جۋىعى ءۇشىنشى كلاسقا جاتاتىن ساپالى ءونىم. جاۋىن كوپ بولعان سوڭ استىقتىڭ قامىرلىلىعى ازايادى دەگەن كۇنى بۇرىن ايتىلعان ساۋەگەيلىك تەرىسكە شىقتى.
اقمولا وبلىسى
