ءدۇبىرلى دودادا جەر جاھاننىڭ 71 مەملەكەتىنەن كەلگەن 483 بالعىن بالۋان باق سىنادى. جارىس قوجايىندارى رەتىندە قازاقستان قۇراماسى ءار سالماق دارەجەسى بويىنشا قوس سپورتشىدان قوسۋعا مۇمكىندىك الدى. بۇل – الەم بىرىنشىلىگىندە بۇرىن-سوڭدى بولماعان ءۇردىس. حالىقارالىق دزيۋدو فەدەراتسياسى بيىلعى جىلدان باستاپ, وسىنداي قادامعا بارۋدى قۇپ كورگەن ەكەن. وسىلايشا, الماتىداعى جارىستا رەسپۋبليكامىزدىڭ 31 دزيۋدوشىسى ەل نامىسىن قورعادى.
جارىستىڭ العاشقى كۇنى وتانداستارىمىز ءۇشىن تابىستى بولدى. ۇلدار اراسىندا 50 كيلو سالماقتا ونەر كورسەتكەن نۇرقانات سەرىكباەۆ بەلارۋسسيالىق ۆيكتور زەليانكو, موڭعوليالىق مەندسايحان نيمسۋرەنگە سان سوقتىرىپ, جارتىلاي فينالدا ۋكراينالىق ميكيتا گولوبورودكونى جولىنان ىعىستىردى. قانداسىمىز فينالدا يتاليالىق رومەن ۆالاديەر پيكاردپەن كەزدەستى. ەكەۋى بىرازعا دەيىن ءبىر-ءبىرىن الا المادى. دەسەك تە باسەكە بەل ورتادان اسقان تۇستا قازاق دزيۋدوشىسى قارسىلاسىن تاتاميدە تىرپ ەتكىزبەي ۇستاپ, ايقىن جەڭىسكە قول جەتكىزدى. قۇتتى بولسىن, قازاعىم! نۇرقانات سەرىكباەۆ – الەم چەمپيونى!
قىزداردىڭ ەڭ جەڭىل سالماعىندا ءاليما جۇماعاليەۆا بالۋان شولاق اتىنداعى سپورت سارايىنا جينالعان جاكۇيەرلەردى قۋانتتى. باستاپقى قوس باسەكەدە ۇندىستاندىق پريا پريا مەن ارمەنيالىق سۋساننا ستەپانيانعا سان سوقتىرعان ول جارتىلاي فينالدا يتاليالىق انتونينا دەسپەنزاعا ەسە جىبەردى. ال ءۇشىنشى ورىن ءۇشىن تارتىستا ءاليما مەن برازيليالىق رەبەككا ۆەنسەسلاۋ ۇزاق تىرەستى. الايدا كەزدەسۋدىڭ اياقتالۋىنا نەبارى سەگىز سەكۋند قالعاندا قارشىعاداي قازاق قىزى قارسىلاسىن يپپونعا ءتۇسىردى. ءاليما جۇماعاليەۆا – الەم بىرىنشىلىگىنىڭ قولا جۇلدەگەرى!
ەكىنشى كۇنى جاس ورەندەرىمىز قوس قولا مەدالدى قانجىعاسىنا بايلادى. 60 كيلو سالماق دارەجەسىندە سىنعا تۇسكەن مارلەن ءادىل مەن نۇرسۇلتان زايزاعاليەۆ وزدەرىن جاقسى قىرلارىنان كورسەتتى. ءتورت بىردەي قارسىلاستارىن قاپى قالدىرعان جاس ورەندەرىمىز قولا مەدال ءۇشىن ءوزارا تالاستى. بۇل تارتىستا نۇرسۇلتان «ۆازاري» ادىسىمەن الدا كەلە جاتقان ەدى. الايدا تورەشىلەر تاراپىنان ءۇش ەسكەرتۋ كورسەتىلگەندىكتەن, باسەكە مەرزىمىنەن بۇرىن توقتالىپ, جەڭىس مارلەننىڭ ەنشىسىنە جازىلدى.
66 كيلو سالماقتاعى تىلەگەن تىنارباي العاشقى اينالىمداردا تاجىكستان مەن چەرنوگوريا وكىلدەرىن ۇتقانىمەن, ءۇشىنشى كەزەڭدە برازيليالىق بالۋانعا ەسە جىبەردى. ودان كەيىن ءۇندىستان مەن گرەكيا دزيۋدوشىلارىنا سان سوقتىرىپ, ءۇشىنشى تۇعىرعا تابان تىرەدى.
جارىستىڭ ءۇشىنشى كۇنى ايدار اراپوۆ قولا مەدالدى موينىندا جارقىراتتى. 81 كيلو سالماقتا ايقاسقان قانداسىمىزدىڭ تەك ۋكريانالىق تيمۋر ۆاليەۆقا عانا ءالى جەتپەدى. جارتىلاي فينالدا سوعان ەسە جىبەرگەن قانداسىمىز ءۇشىنشى ورىن ءۇشىن تارتىستا ۋكراينانىڭ تاعى ءبىر وكىلى نيكيتا باتيدەن باسىم ءتۇستى.
سوڭعى كۇنى +70 كيلو سالماقتاعى مادينا پاراعۇلعوۆا ءوز كورەرمەندەرىن قۋانتتى. كيپر, قىرعىزستان جانە فرانتسيا دزيۋدوشىلارىن جولدا قالدىرعان ول اقتىق سىندا برازيليالىق اننا سانتوسپەن سايىسقا ءتۇستى. قارسىلاسى ءبىزدىڭ قىزعا قاراعاندا الدەقايدا ەڭسەلى ەدى. سالماعى كەمىندە 20-30 كيلوداي ارتىق. سوعان قاراماستان مادينا ونى «ۆازاريگە» ءتۇسىردى. الايدا ارادا كوپ ۋاقىت وتپەي جاتىپ, سانتوس سان سوقىتىپ كەتتى. جەرلەسىمىزگە بۇيىرعانى –كۇمىس جۇلدە.
وسىلايشا, الماتىداعى الەم بىرىنشىلىگى ءوز مارەسىنە جەتتى. بىزدەر ءۇشىن ول تابىستى اياقتالدى دەپ ايتۋعا تولىق نەگىز بار. سەبەبى, بۇرىن-سوڭدى الەمدىك دودالاردا جەرلەستەرىمىز ەشۋاقىتتا التى جۇلدە العان ەمەس. ونىڭ ۇستىنە كوماندالىق ەسەپتە ءتورتىنشى ورىن الدىق. بۇل – وراسان زور تابىس. سونداي-اق, وسىعان دەيىنگى جارىستاردا ەلىمىزدىڭ قىزدار قۇراماسى بىردە-ءبىر جۇلدە الماعان. ال الاتاۋ باۋرايىندا قوس ارۋىمىز جەڭىس تۇعىرىنا كوتەرىلىپ, جەرگىلىكتى كورەمەندەردى قۋانتتى. بۇل دا ەل سپورتى تاريحىنداعى ەلەۋلى وقيعا.
