سپورتتىق مەديتسينا تاقىرىبىنداعى اۋقىمدى ءىس-شارا قازاقستاندا العاش رەت وتكىزىلىپ وتىر. كونفەرەنتسيانى قازاقستان ۇلتتىق وليمپيادالىق كوميتەتى «وليمپيادالىق ىنتىماقتاستىق» باعدارلاماسىنىڭ قولداۋىمەن ۇيىمداستىردى. سونداي-اق, بۇل جيىن PROSPORT زاماناۋي سپورت ورتالىعىنىڭ اشىلۋىنا ورايلاستىرىلعان. اشىلۋ سالتاناتىنا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر, قازاقستان ۇوك ۆيتسە-پرەزيدەنتى دانيار ابۋلگازين, قر مادەنيەت جانە سپورت ۆيتسە-مينيسترى ەلدوس رامازانوۆ قاتىستى.
سپورتتىق-مەديتسينالىق ورتالىقتاعى جاڭا تەحنيكالىق جابدىقتار مەن قىزمەت كورسەتۋ اۋقىمىنىڭ كەڭدىگى الەمدىك دەڭگەيدەگى سپورتشىلار مەن سالاۋاتتى ءومىر سالتىن ۇستاناتىن قاراپايىم جاندارعا ساپالى دياگنوستيكالىق, مەديتسينالىق جانە رەابيليتاتسيالىق قىزمەت كورسەتۋگە مۇمكىندىك بەرەدى.
«جاقىندا ۇوك باس اسسامبلەياسىنىڭ وتىرىسى ءوتىپ, تيمۋر اسقار ۇلى ق ۇلىباەۆ اتالعان ۇيىمنىڭ پرەزيدەنتى قىزمەتىنە قايتا سايلانعانىن بىلەسىزدەر. العاش رەت ونى باسشىلىق قىزمەتكە 2015 جىلى سايلادى. سول كەزدەن باستاپ تيمۋر اسقار ۇلى ءبىزدىڭ سپورتشىلاردى مەديتسينالىق تۇرعىدان قامتاماسىز ەتۋدى جەتىلدىرۋ جاعىن قولعا العان. جوبانى ىسكە اسىرۋ ماقساتىندا بارلىق وليمپيادالىق سپورت تۇرلەرى كەشەندى عىلىمي توپتارمەن جابدىقتالدى. PROSPORT مەديتسينالىق ورتالىعى - ءبىزدىڭ العاشقى قارلىعاشىمىز. ەكىنشى ورتالىق نۇر-سۇلتاندا اشىلادى.
بايانداما جاساپ, ءوز تاجىريبەلەرىمەن بولىسكەندەر قاتارىندا حوك وكىلى, Aspetara سپورتتىق مەديتسينا ورتالىعىنىڭ كلينيكالىق جوبالار جونىندەگى رەابيليتاتسيا جانە ورتوپەديا گوسپيتالى ساپاسى جونىندەگى دەپارتامەنت ديرەكتورىنىڭ ورىنباسارى رود ۋايتلي, بۇكىلالەمدىك دوپينگكە قارسى اگەنتتىكتىڭ سپورتشىنىڭ بيولوگيالىق پاسپورتى جونىندەگى ساراپشىلار توبىنىڭ جەتەكشىسى, بۇكىلالەمدىك دوپينگكە قارسى اگەنتتىك مۇشەسى دوكتور يورك ولاف شۋماحەر, حالىقارالىق وليمپيادا كوميتەتىنىڭ مەديتسينا جانە عىلىمي كوميسسياسىنىڭ مۇشەسى, برايتون ۋنيۆەرسيتەتىنىڭ سپورتتىق عىلىم جونىندەگى پروفەسسورى يانيس پيتسيلاديس, ۋكراينا دەنە تاربيەسى جانە سپورت ۇلتتىق ۋنيۆەرسيتەتىنىڭ وليمپيادالىق سپورت تاريحى مەن تەورياسى كافەدراسىنىڭ پروفەسسورى ۆلاديمير پلاتونوۆتار بار.
كونفەرەنتسيا بايانداما جانە ارنايى شەبەرلىك ساعاتتارى فورماتىندا ءوتتى. سپورتتىق مەديتسينا سالاسىنداعى ماڭىزدى تاقىرىپ مەن ساۋالداردى كەڭىرەك قاۋزاۋ ءۇشىن جيىن ءۇش ءىرى بولىمنەن تۇردى. ولار – «سپورتتىق مەديتسينا», «فۋنكتسيونالدى دياگنوستيكا, وڭالتۋ جانە جاتتىعۋ ۇدەرىسى» جانە «سپورتتاعى پسيحولوگيا». قاتىسۋشىلار سپورتشىلاردىڭ وليمپيادا ويىندارىنا دايىندىعى, جارىس الدىندا جانە جارىس كەزىندە قالپىنا كەلۋ نەگىزدەرى مەن اتلەتتەردى كەشەندى تۇردە تەكسەرۋگە ارنالعان زاماناۋي ادىستەر تۋراسىندا اڭگىمە ءوربىتتى.
حوك وكىلى رود ۋايتلي وليمپياداشىلاردى وڭالتۋعا قاتىستى شەبەرلىك ساباعىن وتكىزدى. سونىمەن قاتار كونفەرەنتسيادا فارماتسەۆتيكالىق ونىمدەر مەن جاڭا مەديتسينالىق تەحنولوگيالارعا ارنالعان كورمە ۇيىمداستىرىلدى.
ايتا كەتەلىك, كونفەرەنتسياعا قاتىسۋ ءۇشىن 200-دەن اسا ادام تىركەلدى. ولاردىڭ اراسنىدا مەديتسينا ۋنيۆەرسيتەتتەرىنىڭ وكىلدەرى, سپورتتىق دارىگەرلەر, ديسپانسەر قىزمەتكەرلەرى, باپكەرلەر مەن انتيدونينگ سالاسىنىڭ قىزمەتكەرلەرى بار.
