ايماقتار • 27 قىركۇيەك، 2019

ۆوكزالدىڭ قاسبەتى – قالانىڭ اسپەتى

23 رەتكورسەتىلدى

قاراعاندىنىڭ قايتا جاڭعىرتىلىپ جاتقان تەمىر جول ۆوكزالى الا جازداي اڭگىمە بولدى. وبلىس، قالا باسشىلىعى دۇركىن-دۇركىن قۇرىلىس باسىنا بارىپ، مەردىگەر كومپانيانىڭ جۇمىسىن ءجىتى قاداعالاپ ءجۇردى. جولاۋشىلاردى ايتپاعاندا، قالا تۇرعىندارى دا جاز بويى جابىق بولعان ۆوكزالدىڭ قۇرىلىسى قاشان بىتەدى، قالاي بولىپ شىعار ەكەن دەپ اسىعا كۇتتى. ويتپەگەندە شە، ۆوكزال دەگەن كەز كەلگەن قالانىڭ، ەلدى مەكەننىڭ بەت-بەينەسى، اسپەتى ەمەس پە؟!

جالپى، قاراعاندى تەمىرجول ۆوكزالى جوسپار بويىنشا جىلدىڭ سوڭىنا تامان تولىقتاي اشىلۋى ءتيىس بولاتىن. تاپسىرىس بەرۋشىلەر مەن مەردىگەرلەر كەرۋەن ساراي قاي­تا جاڭارتىلعاننان كەيىن ءسان-سال­تاناتى بويىنشا ەلىمىز­دەگى ەڭ ۇزدىك ۆوكزالداردىڭ ءبىرى بولادى دەپ سەن­دىرگەن. مىسالى، عيماراتتى ارلەۋ جۇمىس­تارىنا زاماناۋي ماتە­ريالدار، اتاپ ايتقاندا، تابيعي تاسقا ۇق­ساس­تىعى وتە جاقىن تراۆەرتين قولدا­نىلدى. ۆوكزالدىڭ ءۇش قاباتتى جا­ڭا بولىگىندە  كاسسالار، كۇتۋ زالدارى، مەدپۋنكت، مۇمكىندىگى شەكتەۋلى ادامدارعا ارنالعان دەمالىس بولمەسى، انا مەن بالا بولمەسى، فۋدكورتتار مەن ساۋدا دۇڭگىرشەكتەرى ورنالاس­تى. جولاۋ­شىلار پەررونعا ءۇستى جابىق جەر ءۇستى وتكەلدەرى بويىنشا تۇسەتىن بولادى. قۇرى­لىسشىلار جىلۋ جانە ەلەكترمەن قامتاماسىز ەتۋ جەلىلەرىن تولىقتاي اۋىستىردى. ىشكى كليمات-باقىلاۋ جانە ەدەندى جىلىتۋ جۇيەلەرى ورناتىلعان. سونداي-اق كەرۋەن سارايدىڭ جولاۋشىلار وتكىزۋ قابىلەتى 2،5 ەسە ارتادى دەپ جوس­پار­لانعان. ءبىر سوزبەن ايتقاندا، ۆوك­زالدىڭ كەلۋشىلەر ءۇشىن ىڭعايلى، قاۋىپ­سىز ءارى كەڭ بولۋى باستى ماقسات ەتىپ قويىلعان.

مىنە، وسىنداي اۋقىمدى جۇمىس­تار اتقارىلىپ جاتقاندا قوعامنىڭ قىراعى كوز وكىلدەرى بىرەۋگە مايدا-شۇيدە، ال بىرەۋگە اسا ماڭىزدى كەم­شى­لىكتى بايقاپ قالدى. ول – جاڭعىر­تىلعان ۆوكزالدىڭ قاسبەتىنە قاتىستى اڭگىمە ەدى.

وسىدان ءبىر ايداي بۇرىن «قتج» ۇك» اق فيليالى – «قاراعاندى ماگيس­ترالدىك جەلى ءبولىمى» ۆوكزالدىق شارۋاشىلىق جونىندەگى ديرەكتوردىڭ ورىنباسارى ءومىرتاي شەريازدانوۆ جاڭا­رتۋدان كەيىن عيمارات تاريحي ارحيتەكتۋرالىق كەلبەتىن جو­عالت­پايتىن بولادى، ۆوكزال قاسبەتىنىڭ ءستيلى وزگەرىسكە ۇشىرامايدى، ال عي­مارات ىشىندەگى بىرەگەي ورنەكتەلگەن جاپسىرمالار ساقتاۋلى كۇيىندە قالا­دى دەپ ۋادە بەرگەن ەدى. الايدا جاڭار­عان، جاسارعان ۆوكزالدىڭ قاسبەتى جاۋاپتى قىزمەتكەر ايتقانداي جانە جۇرت كۇتكەندەگىدەي بولماي شىقتى. قاس­بەتتىڭ تاريحي كەلبەتىنەن ايىرىلىپ، قارادۇرسىن بولىپ شىققانىنا شىداي الماعان ءبىراز جۇرت الەۋمەتتىك جەلىدە نارازىلىقتارىن ءبىلدىرىپ، ايقاي-شۋ كوتەردى.

بۇل اڭگىمە وبلىستىڭ جاڭادان تاعايىندالعان اكىمى جەڭىس قاسىم­بەككە دە جەتتى. ال ءوڭىر باسشىسى بول­سا، تەمىر جول ۆوكزالىن قايتا جاڭعىر­تۋ كەزىندە تۋىن­داعان ماسەلەنى شەشۋ كەرەك دەپ سانايدى.

– تۇرعىنداردى نىساننىڭ سىرت­قى كەلبەتى قىزىقتىرادى – بۇل قا­لا­نىڭ كورىكتى جەرلەرىنىڭ ءبىرى بول­عان. ءبىز يندۋستريا جانە ينفراقۇ­رى­لىمدىق دامۋ مينيسترلىگى مەن «قازاقستان تە­مىر جولى» ۇك اق باسشى­لىعىمەن سوي­لەستىك. جوبا بو­يىنشا ۆوكزالدىڭ وتكىزۋ قابىلەتىنىڭ ارتۋىنا بايلانىستى عيماراتتىڭ اۋدانى كەڭەيتىلدى، بۇل ورتالىق كىرەبەرىستىڭ سىرتقى قاسبەتىنە اسەر ەتتى. قتج باسشىلىعى جوندەۋ جۇ­مىس­تارىنان كەيىن عيماراتتىڭ جاڭا قاسبەتى بۇرىنعى تاريحي كەلبەتىنە بارىنشا ۇقساي تۇسەتىنىنە سەندىرگەن. سوندىقتان سوڭعى كۇندەرى الەۋمەتتىك جەلىلەردە تۇرعىندار كوتەرگەن ماسە­لەلەر شەشىلىپ، جاڭا عيماراتتا ادام­دار­دىڭ جايلىلىعى ءۇشىن بارلىق جاعداي جاسالاتىن بولادى، – دەدى ول.

سونىمەن، ەندىگى ءسوز مەردىگەردە. ونىڭ بۇگىندە قۇرىلىسى اياقتالىپ قالعان ۆوكزال قاسبەتىن قايتىپ، قانداي جولمەن بۇرىنعى قالپىنا كەلتىرەتىنى بەي­مالىم. ماسەلەن، قاراعاندى قالا­لىق ساۋلەت-قالا قۇرىلىسى جونىندەگى كەڭەستەگى مامانداردىڭ پىكىرىن بىلگە­نىمىزدە، ولار عيماراتتىڭ سىرتى قاپ­تال­عان تراۆەرتين تاس ماتەريالىنا ويۋ-ورنەك سالىپ، بەدەرلى ءپىشىم بەرۋ وڭاي شارۋا ەمەس ەكەنىن ايتتى. ونى شەبەر قولدار جاساماسا، بۇگىنگىنىڭ ستانوگى ءدال وسى تۇستا شاراسىز كو­رىنەدى. ەگەر، مەردىگەر قاسبەتتى تۋرا تا­ريحي قالپىنا ۇقساتىپ ىستەۋگە نيەت بىلدىرسە، وندا بۇعان كوپ ۋاقىت جانە قىرۋار قارجى كەرەك ەكەن...

قاراعاندى

 

سوڭعى جاڭالىقتار

ەگەمەندىكتەر ەلگە شىقتى

قازاقستان • بۇگىن، 11:19

ەلوردا ورتالىعىندا اۆتوكولىك ورتەندى

قازاقستان • 15 قاراشا، 2019

ءباسپاسوز ءرولى – باستى ماسەلە

ادەبيەت • 15 قاراشا، 2019

قازاقستانعا شەتەلدىك بانكتەر كەلەدى

ەكونوميكا • 15 قاراشا، 2019

قوستاناي فيلارمونياسىنا 75 جىل تولدى

رۋحانيات • 15 قاراشا، 2019

جاڭا ۇلگىدەگى كولىكتەر

قوعام • 15 قاراشا، 2019

ۇقساس جاڭالىقتار