جۋىردا عانا جامبىل وبلىسىندا 4 ادام ءسىبىر جاراسى اۋرۋىن جۇقتىرىپ, اۋرۋحاناعا تۇسكەن بولاتىن. بىراق بولجام بولماسا, ولاردىڭ ناقتى نەدەن اۋرۋ جۇقتىرعانى بەلگىسىز. تۇسىنىكسىز كەسەلگە شالدىققانداردىڭ ءبىرى جۋالى اۋدانى, شاقپاقاتا اۋىلىنداعى شارۋا قوجالىعىنىڭ شوپانى بولسا, ەكىنشىسى سول شوپاننىڭ ايەلى ەكەن. ال كەسەل جۇقتىرعان وزگە ەكى ازامات جامبىل اۋدانىنىڭ تۇرعىندارى, ياعني قاساپشىلار بولىپ شىقتى. بۇل ناۋقاستارعا اسا قاۋىپتى ىندەت مال سويعان كەزدە جۇققان دەگەن بولجام بار. ويتكەنى ناۋقاستار ون شاقتى كۇن بۇرىن قىستاقتاعى قوجايىننىڭ سيىرىن سويعانىن راستاعان. ارتىنشا ءبارىنىڭ دە دەنەسىن جارا باسىپ كەتكەن.
جالپى, ءسىبىر جاراسى مال اراسىندا وتە كەڭ تاراعان قاۋىپتى كەسەلدىڭ ءبىرى. الايدا مامانداردىڭ ايتۋىنشا, بۇل اۋرۋ ادام بالاسىنا جۇققان جاعدايدا, ونىڭ ومىرىنە قاۋىپ توندىرەدى. ابىروي بولعاندا ناۋقاستارعا دەر كەزىندە كومەك كورسەتىلىپ, قايعىلى جاعداي ورىن العان جوق. اق حالاتتىلار بۇگىندە اسا قاۋىپتى ىندەتكە شالدىققان 4 ناۋقاستىڭ جاعدايىنىڭ قالىپتى ەكەنىن ايتىپ وتىر. ولارعا تيىسىنشە ناقتى كومەكتەر كورسەتىلۋدە. «قازىر ناۋقاستار ءتيىستى ەم قابىلداۋدا. ولار وبلىستىق جۇقپالى اۋرۋلار اۋرۋحاناسىندا 20 كۇن بولادى. ءسىبىر جاراسى ادام ومىرىنە وتە قاۋىپتى ىندەت», دەيدى وبلىستىق ينفەكتسيالىق اۋرۋلاردىڭ قاتەرلەرىن باقىلاۋ كەڭەستىك-ادىستەمەلىك ورتالىعىنىڭ جەتەكشىسى گۇلفايرا مىرزابەكوۆا. بۇگىندە ناۋقاستارمەن بايلانىستا بولعان 44 ادام مەن اۋىلدىڭ مال دارىگەرى دە قاتاڭ باقىلاۋعا الىنعان. ال وڭىردەگى ۆەتەرينار ماماندار كاسىپكەردىڭ قوراسىندا ولگەن 6 باس سيىردان سىناما العان. الايدا, ولگەن مالداردىڭ بىردە-بىرەۋىنەن كۇيدىرگى دەرتىنىڭ بەلگىلەرى انىقتالماپتى. ەندى مال دارىگەرلەرى بۇل كەسەلدىڭ قايدان كەلگەنىن بىلمەي باس قاتىرۋدا. «قازىر ءبىز اۋرۋدىڭ وشاعىن ىزدەۋ ۇستىندەمىز. بىراق كەسەلدىڭ نەدەن بولعانىن تاپپاي جاتىرمىز», دەيدى وبلىستىق ۆەتەريناريا باسقارماسىنىڭ ءبولىم باسشىسى قاناتبەك قارتاباەۆ.
بۇل ماسەلە وبلىستىق دەنساۋلىق ساقتاۋ باسقارماسىنىڭ دا قاتاڭ قاداعالاۋىندا. باسقارما ناۋقاستارعا ۋاقىتىندا ءتيىستى ەم كورسەتۋ جۇمىستارىنا قاداعالاۋ جۇرگىزۋدە. اتالعان باسقارمانىڭ ءباسپاسوز قىزمەتىنىڭ جەتەكشىسى تولقىن ومىرباەۆانىڭ ايتۋىنشا, ولار اۋرۋحاناعا تۇسكەن كەزدە 3 ناۋقاسقا «تۇينەمە» دياگنوزى قويىلعان. سونىمەن قاتار تۇينەمە دياگنوزىن بولدىرماۋ ماقساتىندا جارانىڭ ىشىندەگىسىن الىپ, وبلىستىڭ سانەپيدساراپتاما ورتالىعىنىڭ اسا قاۋىپتى زەرتحاناسىنا جىبەرىلگەن. «جۇمىس بارىسىندا سەرولوگيالىق تالداۋدىڭ وڭ ناتيجەسى الىندى. كەيىن بارلىق 4 ناۋقاستىڭ دا دياگنوزى ءسىبىر جاراسى, تەرى ءتۇرى رەتىندە راستالدى. بۇگىندە بارلىق ناۋقاستار بوكستالعان 2 پالاتاعا جەكە ورنالاستىرىلدى. ولار ءتيىستى ەم الادى. قازىر ناۋقاستاردىڭ جاعدايى تۇراقتى», دەيدى باسقارمانىڭ ءباسپاسوز حاتشىسى.
اتالعان جاعداي جامبىل وبلىستىق اكىمدىگىنىڭ دە نازارىندا. وبلىس اكىمى اسقار مىرزاحمەتوۆ وڭىردە ءسىبىر جاراسىنىڭ شىعۋىنا بايلانىستى پىكىر ءبىلدىردى. «تۇينەمە اۋرۋىمەن 4 ادامنىڭ اۋىرعاندىعى انىقتالدى. ولار اۋرۋحانعا جاتقىزىلعان. دارىگەرلەردىڭ مالىمدەمەلەرىنە سايكەس, بۇگىن ولاردىڭ ومىرىنە ەشقانداي قاۋىپ جوق. ال ەندى ولارمەن بايلانىستا بولدى دەلىنگەن ادامدار دا تەكسەرىلىپ جاتىر. مۇنان بولەك, ورىن العان جاعدايعا قاتىستى قىلمىستىق ءىس قوزعالىپ, زاڭ اياسىندا ءتيىستى شارالاردىڭ بارلىعى اتقارىلۋدا», دەدى ا.مىرزاحمەتوۆ. اكىمنىڭ ايتۋىنشا, وڭىردە كارانتين ەنگىزۋ ءۇشىن قازاقستان رەسپۋبليكاسىنىڭ باس سانيتار دارىگەرىنىڭ رەسمي شەشىمى قاجەت ەكەن. الايدا قازىرگى ۋاقىتتا ۆەتەريناريا كوميتەتى تاراپىنان وبلىس اكىمدىگىنە ەشقانداي قۇجات كەلىپ تۇسپەگەن. اكىم سوندىقتان دا اكىمدىك وزدىگىنەن كارانتين ەنگىزە المايتىنىن ايتتى. وسى ماسەلەگە وراي, ا.مىرزاحمەتوۆتىڭ تاپسىرماسىمەن وبلىستىق ارنايى شتاب قۇرىلىپ, ءتيىستى باسشىلارعا اۋرۋدىڭ وشاعىن انىقتاۋ ءۇشىن تاپسىرمالار بەرىلدى. سونىمەن قاتار قازىر وبلىستا تۇرعىنداردىڭ ءسىبىر جاراسىن نەدەن جۇقتىرعانىن انىقتاۋ جۇمىستارى جۇرگىزىلۋدە.
ازىرگە ىندەتتىڭ شىعۋ جانە ناۋقاستاردىڭ جۇقتىرۋ سەبەبىن ەشكىم انىقتاي الماي وتىر. ال ەل اراسىندا كۇيدىرگىدەن ولگەن 20-دان استام ءىرى قارانىڭ ەتى تاراز قالاسىنداعى شۇجىق تسەحىنا وتكىزىلگەن دەگەن قاۋەسەت تاراعان. بىراق بۇل دا ناقتى ەمەس. بۇل ورايدا وبلىستىق ۆەتەريناريا باسقارماسىنىڭ ءبولىم باسشىسى قاناتبەك قارتاباەۆ اۋرۋدىڭ وشاعىن انىقتاۋ بويىنشا ءتيىستى جۇمىستار جۇرگىزىلىپ جاتقانىن جەتكىزدى. اۋرۋ وشاقتارىندا جۋالى جانە جامبىل اۋداندارىنىڭ, سونىمەن قاتار تاراز قالاسىنىڭ ەپيدەميولوگتارى مەن ۆەتەريناريالىق قىزمەتكەرلەرى ەپيدەميولوگيالىق تەكسەرۋ مەن پروفيلاكتيكالىق جانە ەپيدەمياعا قارسى ءىس-شارالار كەشەنىن جۇرگىزۋدە. ال وبلىستىڭ تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ دەرەكتەرى بويىنشا, ءوڭىردىڭ 11 ايماعىنىڭ اۋماعىندا 191 ءسىبىر جاراسىنىڭ وشاقتارى ورنالاسقان. اعىمداعى جىلى ەپيدەميولوگتار مەن ۆەتەريناريا قىزمەتكەرلەرى 1 مىڭنان استام توپىراق سىنامالارىن زەرتتەۋ ءۇشىن العان. بىراق كۇيدىرگىنىڭ قوزدىرعىشتارى تابىلماعان. جامبىل وبلىستىق دەنساۋلىق ساقتاۋ باسقارماسىنىڭ مالىمەتىنشە, بيىل ءسىبىر جاراسىنا قارسى ەگۋ توبى 2159 ادامدى قامتىعان.
ءسىبىر جاراسى جامبىل وڭىرىندەگى 4 بىردەي تۇرعىندى سەرگەلدەڭگە سالدى. ەڭ باستىسى, ادامدار امان. بىراق جەرگىلىكتى تۇرعىندار ءۇشىن بۇل وقيعانىڭ جايشىلىقتا جاي تۇسكەندەي بولعانى انىق. ەندى قاۋىپتى كەسەلدىڭ وشاعى انىقتالىپ, ادامدارعا ونىڭ قايدان جۇققانى انىقتالسا يگى. ادامداردىڭ قاۋىپسىزدىگى قاي كەزدە دە ماڭىزدى.
جامبىل وبلىسى
