– كونتسەرتىمىز XVIII عاسىرداعى مۋزىكا ونەرىنىڭ كورنەكتى وكىلدەرىنىڭ ءبىرى انتونيو ۆيۆالدي شىعارماشىلىعىنا ارنالادى. ەكى بولىمنەن تۇراتىن كەڭ اۋقىمدى دا قىزىقتى باعدارلاماعا «بايازەت» يرەنا جانە «گريزەلدا» وپەراسىنان كونستانتسانىڭ سيرەك ورىندالاتىن اريالارى, ايگىلى «جىل مەزگىلدەرى» توپتاماسى, ەكى سكريپكا مەن وركەسترگە ارنالعان كونتسەرت, ەكى گوبوي مەن وركەسترگە ارنالعان كونتسەرت, فاگوت پەن وركەسترگە ارنالعان كونتسەرت ەنگەن. وسى توپتاما اياسىندا ءبىز تىڭدارمان نازارىنا باروككو داۋىرىمەن بايلانىستى گ.پەرسەلل, ي.س.باح, گ.ف.گەندەل, T.د.البينوني سىندى بىرقاتار كومپوزيتوردىڭ شىعارمالارىن ۇسىنۋدى جوسپارلاۋدامىز. تەاتر ارتىستەرىمەن بىرگە ساحنا تورىنە قازاقستان مەن شەتەلدەن شاقىرتىلعان مۋزىكانتتار شىعادى. كونتسەرتتەر ءبىرشاما وزگەشە فورماتتا وتەتىن بولادى, كورەرمەندەرگە ازىرلەگەن توسىنسىيىمىز كوپ, – دەدى جوبا اۆتورى, ديريجەر ابزال مۇحيتدينوۆ.
«ماڭگى وشپەس ءىز قالدىرعان» اتتى سيمفونيالىق كونتسەرتتەردىڭ جاڭا توپتاماسى كورەرمەندەردى تىڭ جانرلاردىڭ نەگىزىن سالىپ, ولاردىڭ بولاشاقتا دامۋىن انىقتاعان كورنەكتى كومپوزيتورلارمەن, مۋزىكالىق باعىت وكىلدەرىمەن تانىستىرۋعا باعىتتالعان. توپتاما انتونيو ءۆيۆالديدىڭ شىعارماشىلىعىمەن اشىلادى, ول دارىندى سكريپكاشى جانە كومپوزيتور رەتىندە بەس كۇننىڭ ىشىندە ءۇش ءبولىمدى وپەرا مۋزىكاسىن جازا الاتىن ءارى ءبىر تاقىرىپتا كوپتەگەن ۆارياتسيانى قۇراستىرۋعا قابىلەتتى كومپوزيتور رەتىندە كەڭىنەن تانىمال بولعان. ءۆيۆالديدىڭ اسپاپتىق كونتسەرتتەرى كلاسسيكالىق سيمفونيانىڭ قالىپتاسۋ جولىنداعى كەزەڭ بولىپ تابىلادى.
سونداي-اق كونتسەرتكە تەاتردىڭ جەتەكشى ءسوليسى, باشقۇرتستاننىڭ ەڭبەك سىڭىرگەن ءارتىسى الفيا كاريموۆا (سوپرانو), باتىرجان سماقوۆ (كونترتەنور), «استانا وپەرا» وركەسترىنىڭ ءسوليسى جانە ءبىرىنشى سكريپكاشىسى, قازاقستاننىڭ ەڭبەك سىڭىرگەن قايراتكەرى باعدات ءابىلحانوۆ, «مادەنيەت قايراتكەرى» ايسۇلۋ بايكەنوۆا, ءمادينا كاپەۋ (سكريپكالار), اسەت نەلدىباەۆ (فاگوت), داميليا ماحپيروۆا, نۇرگۇل ساپاروۆا (گوبويلار) قاتىسادى.
«ەگەمەن-اقپارات»
