مەملەكەت باسشىسىنىڭ جازباسىنان كەيىن كوپ ۇزاماي دەنساۋلىق ساقتاۋ ءمينيسترى ەلجان ءبىرتانوۆ تا twitter پاراقشاسىندا وسى ىسكە قاتىستى جازبا جاريالادى. وندا «پرەزيدەنتتىڭ تاپسىرماسى بويىنشا ماسەلەنى جەكە باقىلاۋعا الدىم. بارلىعى زاڭ اياسىندا بولاتىنىنا سەنىمدىمىن. ارىپتەستەرىمنەن سابىر ساقتاپ, ورتاق ميسسيانى ءارى قاراي جالعاستىرۋلارىن سۇرايمىن» دەلىنگەن.
وقيعا تۋرالى قىسقاشا باياندايتىن بولساق, وتاندىق باق-تاردا الماتى قالاسىنداعى №4 اۋرۋحانانىڭ دارىگەرى قانات تەزەكباەۆتىڭ تۇتقىندالۋىنا بايلانىستى ونىڭ جۇبايى دينا تەزەكباەۆانىڭ اشىق حاتى جاريالاندى. مەملەكەت باسشىسىنىڭ اتىنا جازىلعان اشىق حاتتا ايتىلعانداي, 2019 جىلعى شىلدە ايىندا جول اپاتىنا ۇشىراعان نۇرسۇلتان كۇدەباەۆ №7 اۋرۋحاناعا, ارتىنشا №4 اۋرۋحاناعا جەتكىزىلىپ, سول جەردە وپەراتسيا جاسالعان. ارتىنشا گەرمانياداعى اۋرۋحاناعا جىبەرىلگەن ن.كۇدەباەۆ الماتىداعى وپەراتسيادان كەيىن 26 كۇن وتكەندە سول جاقتا قايتىس بولدى. ن.كۇدەباەۆ الماتى قالاسى ىشكى ىستەر دەپارتامەنتىنىڭ باسشىسى سەرىك كۇدەباەۆتىڭ ۇلى ەكەنىن ايتا كەتەيىك.
ن.كۇدەباەۆ قايتىس بولعاننان كەيىن قانات تەزەكباەۆ №4 اۋرۋحانانىڭ باس دارىگەرى قىزمەتىنەن بوساتىلىپ, ەشقانداي ءتۇسىندىرۋسىز, كەپىلمەن بوساتۋ قۇقىعىنسىز تۇتقىنعا الىنعان. دارىگەر قانات تەزەكباەۆ ن.كۇدەباەۆقا جاسالعان وپەراتسياعا تەك ەكى كومەكشىنىڭ ءبىرى رەتىندە قاتىسقانى, وپەراتسيانى جاساۋعا جانە ناتيجەسىنە تىكەلەي جاۋاپتى بولماعانى تۋرالى دا اشىق حاتتا جازىلعان. №4 قالالىق اۋرۋحانانىڭ قىزمەتكەرلەرى دە تۇتقىنعا الىنعان قانات تەزەكباەۆ پەن انەستەزيولوگ اسقار تۇڭعىشباەۆتىڭ ءوز ىسىنە بەرىلگەن بىلىكتى ماماندار ەكەنىن ايتىپ, تەرگەۋدىڭ ءادىل جۇرگىزىلۋىن سۇراپ, اشىق حات جاريالادى.
ق.توقاەۆتىڭ تۆيتتەر جازباسىنان كەيىن كوپ ۇزاماي كەشە كەشقۇرىم قانات تەزەكباەۆ ەشقايدا كەتپەۋ تۋرالى تىلحاتپەن بوساتىلدى.
