ۇلت بويىنداعى رۋحاني قۇندىلىقتاردى جاڭعىرتۋ ماقساتىندا تاراز قالاسىنداعى «بالاساعۇن» ورتالىق كونتسەرت زالىندا ءوڭىر تاريحىنىڭ اسا ماڭىزدى كەزەڭى قارساڭىندا «رۋحاني جاڭعىرۋ» باعدارلاماسى اياسىندا «ەلدىك ەلگە بايلانىستى» اتتى قوعامدىق فورۋم ءوتتى. اتالعان فورۋم وڭىردەگى قوعام بەلسەندىلەرىنىڭ باستاماسىمەن ۇيىمداستىرىلدى. فورۋم جۇمىسىنا جامبىل وبلىسىنىڭ اكىمى اسقار مىرزاحمەتوۆ, وڭىرگە بەدەلدى اقساقالدار, قوعام بەلسەندىلەرى, دەپۋتاتتار جانە جاستار قاتىستى. اتالعان شارانى جامبىل وبلىستىق ءماسليحاتىنىڭ دەپۋتاتى ماسات بەرىك جۇرگىزىپ وتىردى.
فورۋم بارىسىندا ۇلتتىق ءداستۇر مەن ادەت-عۇرىپتىڭ ۋاقىت اعىمىمەن وزگەرۋى تۋراسىندا تۇيتكىلدى ماسەلەلەر قوزعالسا, ىسىراپشىلدىق پەن داڭعازالىققا جول بەرمەۋ, جاستار تاربيەسىنىڭ وزەكتىلىگى توڭىرەگىندە اڭگىمە ءوربىدى. سونداي-اق وبلىس تۇرعىندارىن بىرلىك پەن ىنتىماققا, سابىرلىلىق پەن قاناعاتشىلىققا, بەرەكەلى ءومىر سۇرۋگە شاقىراتىن ۇندەۋ جولداندى.
قوعامدىق فورۋم قاتىسۋشىلارىنىڭ
ۇندەۋى
ءبىز, «ەلدىك ەلگە بايلانىستى» قوعامدىق فورۋمىنا قاتىسۋشىلار, قوعامدىق كەلىسىم مەن ساياسي تۇراقتىلىق, ەتنوسارالىق جانە كونفەسسياارالىق تاتۋلىق, بىرلىك پەن بەرەكە, ۇلتتىق قۇندىلىقتار سياقتى قوعام مەن مەملەكەتتىڭ جوعارى مۇددەلەرىن باسشىلىققا الا وتىرىپ, وبلىس تۇرعىندارىنا ۇندەۋ جولدايمىز.
تاريحتىڭ تاعىلىمى – ۇلت بولىپ ۇيىسىپ, ەل بولىپ ەڭسەنى تىكتەۋدىڭ باستى كەپىلى – بىرلىك پەن ەلدىك ەكەنى بەلگىلى.
ەندەشە, قوعامنىڭ, ۇلتتىڭ دامۋىندا كەدەرگى كەلتىرىپ, كەيبىر كەرتارتپا داعدىلار مەن ادەتتەر بۇگىندە بەلەڭ الىپ بارا جاتقان ۋاقىتتا ەلدىگىمىزدى, بىرلىگىمىزدى كورسەتەتىن كەزەڭ كەلدى.
تامىر-تانىستىققا, جۇزشىلدىك پەن رۋشىلدىققا, ىسىراپشىلدىق پەن استامشىلدىققا, داڭعويلىق پەن كەردەڭدىككە, مەيىرىمسىزدىك پەن قاتىگەزدىككە, جالعانعا ەلىكتەۋ مەن دۇنيەقۇمارلىققا, ماسىلدىق پەن مانساپقورلىققا, قاناعاتسىزدىق پەن ۇنەمسىزدىككە, ارسىزدىق پەن نامىسسىزدىققا, قالا بەردى جالپى مادەنيەتسىزدىككە كوزىمىز دە, ەتىمىز دە ۇيرەنىپ بارا جاتقان سياقتى. سوندىقتان وركەنيەت ەمەس وسەككە, زيالىلىق ەمەس زياندىققا, پاراساتتىلىق ەمەس پاسىقتىققا, ىزگىلىك ەمەس ىبىلىستىككە يتەرمەلەيتىن مۇنداي «عۇرىپتارعا» ەل بولىپ توسقاۋىل قويىلاتىن ۋاقىت كەلدى.
شىلدەحانادان باستاۋ الاتىن استا-توك تويلار, استار, ءمانى مەن ءسانى مۇلدە وزگەرگەن داستارقاندىق باسقوسۋلار, ەلدى ىزەتتىلىككە, قاراپايىمدىلىققا, قايىرىمدىلىققا, يماندىلىققا ەمەس, وزگە جولعا باستاۋدا.
قۇرمەتتى جەرلەستەر!
سىزدەردى وسىنداي كەلەڭسىزدىكتەرگە بوي الدىرماۋعا شاقىرامىز جانە زاڭ تالاپتارىنا ساي شەشىم قابىلداۋدى جەرگىلىكتى اتقارۋشى جانە وكىلەتتى ورگانداردان سۇرايمىز.
«ىرگەلى ەلدىڭ ىرگەسىن ەسەر اعىم بۇزار» دەگەندەي, دەسترۋكتيۆتى ءدىني اعىمداردىڭ ەل اراسىنا ەنىپ, جاستاردىڭ ساناسىن ۋلاپ جاتقانى دا ءوز الدىنا ءبىر توبە. بۇل ۇردىسكە دە توسقاۋىل بولىپ, ۇلاعاتتى ۇرپاق تاربيەلەۋدە ۇلتتىق قۇندىلىقتارىمىزبەن ساباقتاستىرۋ – بارشامىزدىڭ باستى ماقساتىمىزعا اينالۋى ءتيىس. بۇل يگىلىكتى ىسكە وبلىسىمىزدىڭ ءدىني ۇيىمدارىمەن بىرگە جامبىل جۇرتشىلىعى جۇمىلا كىرىسۋى قاجەت.
وسى ورايدا, بۇقارالىق اقپارات قۇرالدارى قوعام, ۇلت الدىنداعى جاۋاپكەرشىلىگىن سەزىنە وتىرىپ, اتالعان ماسەلەگە ەرەكشە كوڭىل بولۋلەرى ءتيىس.
سونىمەن بىرگە, الەۋمەتتىك جەلىنى پايدالانۋشىلاردىڭ جاۋاپكەرشىلىگىن ارتتىرۋ ءۇشىن ارنايى زاڭ قابىلداۋ قاجەت دەپ ەسەپتەيمىز.
كوتەرىلىپ وتىرعان قۇندىلىقتاردى جاستاردىڭ بويىنا ءسىڭىرىپ, اتا-بابادان كەلە جاتقان ۇلتتىق بولمىسىمىزدى, قانداعى قاسيەتىمىزدى ساقتاپ, ەلىمىزدىڭ ەلدىگى مەن ەگەمەندىگىن نىعايتىپ, دامىتۋ – ءاربىر وتباسىنىڭ قاسيەتتى مىندەتى بولۋى ءتيىس.
فورۋمعا قاتىسۋشىلار, ۇندەۋدەن تۋىنداپ وتىرعان تالاپتاردىڭ ەلباسىنىڭ «رۋحاني جاڭعىرۋ» باعدارلاماسىمەن, پرەزيدەنتتىڭ ۇستانىمدارىمەن ۇيلەسىپ وتىرعانىن اتاپ ءوتىپ, ورىندالۋىنا تاريحى تەرەڭ, وركەنيەتتى, قاسيەتتى اۋليەاتا جەرىنىڭ ءاربىر ازاماتىن ۇلەس قوسۋعا شاقىرامىز!
ۇندەۋ قابىلدانعاننان كەيىن جامبىل وبلىستىق اۋماقتىق كاسىپوداقتار بىرلەستىگىنىڭ توراعاسى م.تولەپبەرگەن بۇگىنگى تويلارداعى, ءولىم-ءجىتىم كەزىندەگى ىسىراپشىلدىق پەن بەي-بەرەكەتسىزدىكتى تىلگە تيەك ەتىپ, ولاردى بىرىزدىلىككە ءتۇسىرۋ جايىندا ءوز ويىن ايتتى. بۇدان كەيىن ەڭبەك ارداگەرى, جۋالى اۋدانىنىڭ قۇرمەتتى ازاماتى ءا.ەرگەبەكوۆ, وبلىستىق ءماسليحاتتىڭ دەپۋتاتى ا.مايلىباەۆ, ارداگەر-ۇستاز ك.احمەتجانوۆا, «اسىل ارمان» قوعامدىق بىرلەستىگىنىڭ توراعاسى ر.نۇراقباەۆ, وبلىستىق ورتالىق «ھيباتۋللا تارازي» مەشىتىنىڭ نايب-يمامى ب.امرەەۆ جانە مەديتسينا عىلىمدارىنىڭ دوكتورى, پروفەسسور س.وردابەكوۆ بىرلىك پەن ىنتىماق, ۇلت تاربيەسى مەن ۇرپاقتار ساباقتاستىعى, وتباسى قۇندىلىعى مەن سالت-داستۇرلەر تاقىرىبىندا بايانداما جاسادى. ال تاراز قالالىق ءماسليحاتىنىڭ حاتشىسى ب.قۇلەكەەۆ ءوز سوزىندە فورۋمنىڭ ماڭىزدىلىعىن اتاپ ءوتىپ, وسى شارانى وبلىستىڭ اۋداندارىندا دا جالعاستىرۋ كەرەكتىگىنە توقتالدى.
«بالا تاربيەسىندە ورتا بۋىندى تاربيەلەۋدە قاريالاردىڭ اتقاراتىن ءرولى وتە جوعارى دەپ بىلەمىن. ولاي بولۋ ءۇشىن ۇلكەن كىسىلەر سويلەگەن سوزىنە, ءجۇرىس-تۇرىسىنا ۇلكەن جاۋاپكەرشىلىكپەن قاراۋ كەرەك. ءبىر ۇيگە بارعاندا ءبىزدىڭ قازاقتىڭ ادەت-عۇرپىن, سالت-ءداستۇرىن قادىرلەيتىن ءسوزدى ايتسا ەكەن دەپ وتىرامىن. ءبىر-بىرىنە وسەك ايتپاي, قايتا جاستاردى تاربيەلەيتىن ءمانى بار ءسوز ايتسا ەكەن دەگەن پىكىر ايتقىم كەلەدى. بولاشاعىمىز جاستار بولعاندىقتان, ارينە جاستار – بايلىعىمىز, جاستار –باقىتىمىز, سوندىقتان ولارعا ۇلكەن سەنىم ارتۋ كەرەك. جاستارعا جاقسى ۇلگى-ونەگە كورسەتۋىمىز كەرەك دەپ ويلايمىن. ءبىز جاستايىمىزدان ەڭبەكپەن ەسەيدىك, ىنتىماق پەن بىرلىكتى تۋ ەتىپ وستىك. ىنتىماققا ءوزىمىزدى عانا ەمەس, بۇكىل ەلدى, حالىقتى شاقىرۋىمىز قاجەت. بالالاردىڭ بويىنا ۇلكەننىڭ الدىن كەسپەۋ, ءاربىر ءىستى بەرەكەمەن باستاۋ, وڭ قولمەن تاماقتى الىپ جەۋ, كىسىنىڭ الدىنا قول سوزباۋ, كىسى اقىسىن جەمەۋ, وتىرىك ايتپاۋ, ادال ءجۇرۋ سەكىلدى قاسيەتتەردىڭ ءبارىن داستارقاننىڭ باسىندا ءسىڭىرىپ وتىرعانىمىز دۇرىس. بالا تاربيەسى ءبىز ءۇشىن وتە قاجەتتى نارسە», دەدى ءوز سوزىندە ابىلقاسىم ەرگەبەكوۆ.
فورۋمدى وبلىس اكىمى اسقار مىرزاحمەتوۆ قورىتىندىلاپ, كوتەرىلگەن ماسەلەلەر بويىنشا وبلىس تۇرعىندارىن بىرلىك پەن ىنتىماققا, سابىرلىق پەن قاناعاتشىلدىققا, بەرەكەلى ءومىر سۇرۋگە شاقىردى. سونىمەن قاتار ەجەلدەن اۋليەاتا ءوڭىرى بىرلىكتى بەكەم ۇستانعان, تاتۋلىقتى تۋ ەتكەن ولكە ەكەنىن اتاپ ءوتىپ, قابىلدانعان ۇندەۋدىڭ ءاربىر ازامات ءۇشىن اسا ماڭىزدى ەكەنىن جەتكىزدى.
جامبىل وبلىسى
