قاسىم-جومارت توقاەۆ ءوز سوزىندە قازاقستان-امەريكا بيزنەس-قاۋىمداستىعىنىڭ وكىلدەرىن قاۋىمداستىقتىڭ قۇرىلعانىنا 20 جىل تولۋىمەن قۇتتىقتاپ, وسى ءىس-شارانى ۇيىمداستىرعانى ءۇشىن ريزاشىلىعىن ءبىلدىردى.
پرەزيدەنت ءسوز باسىندا ەلباسى نۇرسۇلتان نازارباەۆتىڭ 2018 جىلدىڭ قاڭتار ايىنداعى اقش-قا ساپارى اياسىندا جاسالعان قازاقستاندىق-امەريكالىق كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمەگە قول قويىلعانىنا توقتالىپ, سول كەزدەن باستاپ ەكى ەل اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ ايتارلىقتاي نىعايا تۇسكەنىن اتاپ ءوتتى.
مەملەكەت باسشىسى اقش قازاقستان ەكونوميكاسىنىڭ ءىرى ينۆەستورلارىنىڭ ءبىرى ەكەنىن دە ايتتى. بۇگىندە ءبىزدىڭ ەلىمىزگە امەريكالىق ينۆەستورلار جالپى كولەمى 45 ميلليارد دوللاردان استام قارجى سالعان. قازاقستاندا 500-دەن اسا امەريكالىق كومپانيا جۇمىس ىستەيدى.
– 2018 جىلى قازاقستانعا تىكەلەي تارتىلعان امەريكالىق ينۆەستيتسيالار كولەمى 5,3 ميلليارد دوللارعا جەتىپ, جاڭا رەكورد ورناتتى. ال ءوزارا ساۋدا كولەمى ەكى ەسەگە ارتىپ, 2018 جىلى 2,8 ميلليارد دوللاردى قۇرادى, – دەدى قاسىم-جومارت توقاەۆ.
قازاقستاننىڭ ەكونوميكالىق مۇمكىندىكتەرى تۋرالى ايتقان پرەزيدەنت امەريكالىق بيزنەسمەندەردىڭ نازارىن ەل دامۋىنداعى ءۇش ماڭىزدى ماسەلەگە اۋداردى. ولار: قولايلى ينۆەستيتسيالىق احۋال, نارىق پەن كوممۋنيكاتسيانى دامىتۋ جانە ادامي كاپيتالدى نىعايتۋ.
مەملەكەت باسشىسى امەريكالىق سەرىكتەستەرگە قازاقستان ۇكىمەتىنىڭ ينۆەستيتسيالىق احۋالدى جاقسارتۋ ماقساتىندا زاڭ ۇستەمدىگىن, كەلىسىم-شارتتارعا قول سۇعىلماۋىن جانە زياتكەرلىك مەنشىك قۇقىعىن قورعاۋدى قامتاماسىز ەتۋ باعىتىنداعى جۇمىستاردى جالعاستىرا بەرەتىنىن جەتكىزدى. ونىڭ ايتۋىنشا, ينۆەستورلارمەن جۇمىس ىستەۋدەگى باستى ماسەلە تۇراقتىلىق پەن اشىقتىقتى ساقتاۋ بولىپ تابىلادى.
اڭگىمە بارىسىندا قازاقستاننىڭ ەنەرگەتيكا, اۋىل شارۋاشىلىعى, قارجى جانە ادامي كاپيتال سالالارىنداعى الەۋەتى تۋرالى دا ايتىلدى. سونىمەن قاتار, قاسىم-جومارت توقاەۆ ەلىمىزدىڭ كولىك-لوگيستيكالىق مۇمكىندىكتەرىنە دە جەكە توقتالدى.
– قازاقستان شىعىس پەن باتىستى جالعايتىن ماڭىزدى كولىك حابى بولىپ ەسەپتەلەدى. ترانسكونتينەنتالدىق باعىتتاردىڭ 70 پايىزدان استامى قازاقستان اۋماعى ارقىلى وتەدى, – دەپ اتاپ ءوتتى قازاقستان پرەزيدەنتى.
ءسوز سوڭىندا قاسىم-جومارت توقاەۆ امەريكانىڭ ىسكەر توپ وكىلدەرىنە ەل پرەزيدەنتى رەتىندە قازاقستان مەن اقش اراسىنداعى ەكونوميكالىق ارىپتەستىكتىڭ ارتۋىنا كۇش-جىگەرىن جۇمسايتىنىن ايتتى.
وسى كۇنى مەملەكەت باسشىسى تاعى دا بىرقاتار ءىرى حالىقارالىق كومپانيالاردىڭ باسشىلارىمەن كەزدەسۋ وتكىزدى.
پرەزيدەنت «Royal Dutch Shell» كومپانياسىنىڭ باس اتقارۋشى ديرەكتورى بەن ۆان باردەنمەن مۇناي-گاز جوبالارىن جۇزەگە اسىرۋ جونىندەگى ىنتىماقتاستىق جايىن تالقىلادى.
مەملەكەت باسشىسى «JPMorgan Chase & Co.» ترانسۇلتتىق كومپانياسى ديرەكتورلار كەڭەسىنىڭ توراعاسى جانە باس اتقارۋشى ديرەكتورى دجەيمي دايمونمەن قارجى ينستيتۋتتارى ارقىلى ءوزارا ءىس-قيمىل ماسەلەسىن قارادى.
«Tyson Fresh Meats» كومپانياسىنىڭ پرەزيدەنتى ستيۆ ستاۋففەرمەن جانە «Valmont Industries» كومپانياسىنىڭ باس اتقارۋشى ديرەكتورى ستيۆ كانەۆسكيمەن كەزدەسۋىندە اۋىل شارۋاشىلىعى سالاسىنداعى ينۆەستيتسيالىق جوبالاردى ىسكە اسىرۋ ماسەلەلەرى قوزعالدى.
«Plug' n Play» كومپانياسىنىڭ باس اتقارۋشى ديرەكتورى سايد اميديمەن, «500 Startups» ستارتاپ-اكسەلەراتورىنىڭ جانە ۆەنچۋرلىك قورىنىڭ ۆيتسە-پرەزيدەنتى, باسقارۋشى سەرىكتەسى بەدي يانگپەن كەزدەسۋ كەزىندە ستارتاپ-جوبالار سالاسىنداعى ىنتىماقتاستىق پەرسپەكتيۆالارى ءسوز بولدى.
سونداي-اق, قازاقستان پرەزيدەنتى «Amazon Web Services» كومپانياسىنىڭ جاھاندىق مەملەكەتتىك ساياسات جونىندەگى ۆيتسە-پرەزيدەنتى مايكل پۋنكپەن ەلەكتروندى ساۋدا سالاسىنداعى ءوزارا ءىس-قيمىل جاعدايىن تالقىلادى.
