ل. كيورتيسپەن كەزدەسۋ بارىسىندا تاراپتار ەكىجاقتى ىنتىماقتاستىقتىڭ دامۋ قارقىنىنا قاناعاتتانۋشىلىق ءبىلدىردى. قر تۇڭعىش پرەزيدەنتى – ەلباسى نۇرسۇلتان نازارباەۆتىڭ 2018 جىلدىڭ قاڭتار ايىنداعى ۆاشينگتونعا ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردى ءىس جۇزىندە ىسكە اسىرۋ جانە قر مەن اقش اراسىنداعى كەڭەيتىلگەن ستراتەگيالىق ارىپتەستىكتى ودان ءارى ىلگەرىلەتۋ ماسەلەلەرى تالقىلاندى. م. تىلەۋبەردى قازاقستان كوپۆەكتورلى سىرتقى ساياساتتىڭ ساباقتاستىعى مەن رەتتىلىگىن جالعاستىراتىنىن جانە كوپتەگەن ماسەلەلەر بويىنشا اقش-پەن ستراتەگيالىق ارىپتەستىكتى نىعايتۋعا نيەتتى ەكەنىن اتاپ ءوتتى. وعان قوسا ول رەسپۋبليكامىزدا بولىپ جاتقان قازىرگى دەموكراتيالىق وزگەرىستەر تۋرالى كەڭىنەن تانىستىرىپ ءوتتى.
ل. كيورتيس ءوز كەزەگىندە اقش قازاقستاننىڭ اۋعانستاندى قولداۋ مەن دامىتۋعا قوسقان ۇلەسىن جوعارى باعالايتىنىن اتاپ ءوتتى. قر-دىڭ حالىقارالىق جانە وڭىرلىك قاۋىپسىزدىككە, سونىڭ ىشىندە ءوز ازاماتتارىن سيرياداعى اسكەري ءىس-قيمىل ايماقتارىنان قايتارۋ ارقىلى قوسقان ۇلەسىن تۋرالى ەرەكشە ايتىلدى.
ك. كراكپەن كەزدەسۋدە ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ وزەكتى ماسەلەلەرىنە باسا نازار اۋدارىلدى. ءسىم باسشىسى پرەزيدەنت ق. توقاەۆتىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالىققا جولداۋىندا ايتىلعان قازاقستاننىڭ ەكونوميكاسى مەن الەۋمەتتىك سالاسىن ءارى قاراي دامىتۋ جونىندەگى مىندەتتەر تۋرالى حاباردار ەتتى.
امەريكاندىق ديپلومات قر ۇكىمەتىنىڭ ەلدەگى ينۆەستيتسيالىق احۋالدى جاقسارتۋ, ونىڭ ىشىندە زاڭنىڭ ۇستەمدىگىن قامتاماسىز ەتۋ, سىبايلاس جەمقورلىققا قارسى كۇرەستى كۇشەيتۋ جانە ت. ب. ارقىلى كۇش-جىگەرىن قولدادى.
مينيستر قازاقستانداعى ءىرى ينۆەستورلاردىڭ ءبىرى اقش ەكەنىن اتاپ ءوتىپ, قر ەكونوميكاسىنداعى امەريكالىق كاپيتال سالىمدارىن ءارتاراپتاندىرۋ قاجەتتىلىگىنە نازار اۋداردى.
سول كۇنى قر سىرتقى ساياسي ۆەدومستۆوسىنىڭ باسشىسى ءوزىنىڭ اۋستريالىق ارىپتەسى – ەۋروپا, ينتەگراتسيا جانە سىرتقى ىستەر فەدەرالدىق ءمينيسترى الەكساندر شاللەنبەرگپەن كەلىسسوزدەر وتكىزدى. تاراپتار ەكىجاقتى ساياسي, ەكونوميكالىق جانە مادەني-گۋمانيتارلىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى. تاراپتار ەكىجاقتى قارىم-قاتىناستاردى ودان ءارى دامىتۋعا جوعارى دەڭگەيدە ءوزارا ساپارلار بەرەتىمەن كەلىستى.
اۋستريالىق مينيستر قازاقستانمەن جاڭارتىلاتىن ەنەرگيا مەن تسيفرلاندىرۋ سالالارىن قوسا العاندا, ءتۇرلى سالالاردا ءوزارا ءتيىمدى ىنتىماقتاستىقتى دامىتۋعا ءوز ەلىنىڭ مۇددەلىلىگىن ءبىلدىردى.
