-قۇرىلىس جۇمىسى كەڭ سارايدىڭ كورىنىسىن قالاي وزگەرتسە, تاعدىرىن دا سولاي وزگەرتەدى. مەملەكەت تە سولاي. ول كوپ جىلداردى تالاپ ەتەدى. ەلدىڭ تۇڭعىش پرەزيدەنتى رەتىندە 30 جىلعا جۋىق ۋاقىت بويى قازاقستان رەسپۋبليكاسى دەپ اتالاتىن مەملەكەتتى قۇرۋ, ەلدى باسقارۋ باقىتى بۇيىردى. وسىنشاما ۋاقىت بويى حالىق ماعان ەلدى ب ۇلىڭعىر جولدا كوش باستاۋىما سەنىم ارتتى. وسىنشاما ۋاقىت ەلدى باسقارىپ كەلىپ, بيىل ءوز ەركىممەن وكىلەتتىگىمىزدى توقتاتۋ تۋرالى شەشىم قابىلدادىم. ارنايى قابىلدانعان زاڭعا سايكەس, ەلباسى – تۇڭعىش پرەزيدەنت مارتەبەم بار جانە قازىر ونى جۇزەگە اسىرىپ جاتىرمىن, - دەدى ەلباسى.
بۇدان ءارى نۇرسۇلتان نازارباەۆ قازاقستاننىڭ تاۋەلسىزدىك العاننان كەيىنگى جەتىستىكتەردى اتادى.
-وسى ۋاقىتتىڭ ىشىندە ەلىمىز الەمنىڭ دامىعان 50 ەلىنىڭ قاتارىنا قوسىلدى. جالپى ىشكى ءونىم 18 ەسە ءوسىپ, رەسپۋبليكا ەكونوميكاسىنىڭ كولەمى بۇكىل ورتالىق ازيا ەلدەرىنىڭ ءجىو-سىنەن 2 ەسە اسا ءتۇستى. حالىقتىڭ جان باسىنا شاققانداعى تابىسى دوللارمەن ەسەپتەگەندە 9 ەسە ارتىپ, كەدەيشىلىك دەڭگەيى 40 پايىزدان 4 پايىزعا دەيىن تومەندەدى. سوڭعى 20 جىلدا 320 ملرد دوللار تىكەلەي شەتەل ينۆەستيتسياسى تارتىلدى,- دەدى تۇڭعىش پرەزيدەنت.
ايتا كەتەيىك, ەۋرازيالىق مەملەكەتتەردىڭ زاڭنامالىق ورگاندارى باسشىلارىمەن جان-جاقتى ديالوگ ورناتۋ ماقساتىندا ۇيىمداستىرىلىپ جاتقان فورۋم بيىل قازاقستاندا ءبىرىنشى رەت ءوتىپ جاتىر. بۇعان دەيىن ەۋرازيا ەلدەرى پارلامەنتتەرى توراعالارىنىڭ كەڭەسى رەسەيدە, وڭتۇستىك كورەيادا جانە تۇركيا رەسپۋبليكاسىندا وتكەن ەدى.
فورۋمعا قاتىسۋشىلار قاتارىندا ەقىۇ مەن ۇقشۇ پارلامەنتتىك اسسامبلەيالارى, پارلامەنتارالىق وداق, ازيا پارلامەنتتىك اسسامبلەياسى, حالىقتىڭ قونىستانۋى جانە دامۋى جونىندەگى پارلامەنتاريلەردىڭ ازيالىق فورۋمى, ەۋروپالىق پارلامەنت, ازياداعى ءوزارا ءىس-قيمىل جانە سەنىم شارالارى كەڭەسى, يسلام ىنتىماقتاستىق ۇيىمى پارلامەنتتىك وداعى, تمد پاا, شىۇ سىندى ۇيىمدار بار.
