«ەڭ الدىمەن, قازاقستانىمىزدىڭ ءتورى, قازاق ەلىنىڭ ەلورداسى - نۇر-سۇلتان قالاسىنا قوش كەلدىڭىزدەر! سونىمەن بىرگە بۇكىل ەۋرازيا ەلدەرىنىڭ پارلامەنتتەرى ءۇشىن ماڭىزى زور ەرەكشە جيىنعا قاتىسىپ وتىرعاندارىڭىزعا شىن جۇرەكتەن العىس بىلدىرۋگە رۇقسات ەتىڭىزدەر. بۇگىنگى فورۋم زاڭ شىعارۋشى ورگاندار اراسىندا جان-جاقتى ديالوگ ورناتۋعا, ءوزارا سەنىمدى نىعايتۋعا, پارلامەنتارالىق ىنتىماقتاستىقتى ودان ارى كۇشەيتۋگە كەڭ جولا اشادى دەپ سەنەمىز», دەدى پارلامەنت ءماجىلىسىنىڭ توراعاسى نۇرلان نىعماتۋلين.
فورۋمعا 60-تان استام ەلدىڭ پارلامەنتتىك دەلەگاتسيالارى مەن 16 حالىقارالىق ۇيىم وكىلدەرى قاتىسۋدا.
ايتا كەتەيىك, ەۋرازيالىق مەملەكەتتەردىڭ زاڭنامالىق ورگاندارى باسشىلارىمەن جان-جاقتى ديالوگ ورناتۋ ماقساتىندا ۇيىمداستىرىلىپ جاتقان فورۋم بيىل قازاقستاندا ءبىرىنشى رەت ءوتىپ جاتىر. بۇعان دەيىن ەۋرازيا ەلدەرى پارلامەنتتەرى توراعالارىنىڭ كەڭەسى رەسەيدە, وڭتۇستىك كورەيادا جانە تۇركيا رەسپۋبليكاسىندا وتكەن ەدى.
قاتىسۋشىلار قاتارىندا ەقىۇ مەن ۇقشۇ پارلامەنتتىك اسسامبلەيالارى, پارلامەنتارالىق وداق, ازيا پارلامەنتتىك اسسامبلەياسى, حالىقتىڭ قونىستانۋى جانە دامۋى جونىندەگى پارلامەنتاريلەردىڭ ازيالىق فورۋمى, ەۋروپالىق پارلامەنت, ازياداعى ءوزارا ءىس-قيمىل جانە سەنىم شارالارى كەڭەسى, يسلام ىنتىماقتاستىق ۇيىمى پارلامەنتتىك وداعى, تمد پاا, شىۇ سىندى ۇيىمدار بار.
