جۋالى اۋدانىنىڭ تۇرعىنى داميرا جولجانقىزى بۇگىنگى تاڭدا اۋدانداعى العاشقى قاناتقاقتى جوبانى ىسكە اسىرىپ, بالالارعا قامقورلىق كورسەتىپ كەلەدى. جولداسى ەكەۋى ءوز قاراجاتتارىنا اۋدان ورتالىعى باۋىرجان مومىش ۇلى اۋىلىنان «جۋالى» بەيىمدەۋ جانە وڭالتۋ ورتالىعىن اشتى. داميرا جولجانقىزىنىڭ بۇل باستاماسىنا سەبەپ بولعان ۇلكەن ۇلى ەراسىلدىڭ جاعدايى ەكەن. بۇگىندە 14 جاسقا كەلگەن ەراسىلدىڭ سويلەمەيدى دەگەنى بولماسا, اناسى ونىڭ سۋرەت ونەرىنە دەگەن قىزىعۋشىلىعى جوعارى ەكەنىن, ءتۇرلى تاقىرىپتارعا سۋرەتتەر سالاتىنىن دا ايتتى.
اتالعان ورتالىق 25 بالاعا ارنالعان. قازىرگى كەزدە مۇندا 10 مۇمكىندىگى شەكتەۋلى بالا قابىلدانعان. بۇل ورتالىققا تەك مۇگەدەكتىگى تانىلعان بالالار عانا الىنادى ەكەن. مۇندا ماماندار بالالاردى ومىرگە بەيىمدەپ, ولارعا كۇندەلىكتى سويلەۋدى جانە ءوزىن ءوزى قامتاماسىز ەتۋدى ۇيرەتەدى. سونىمەن قاتار ورتالىقتا لوگوپەد, پسيحولوگ, دەفەكتولوگ ماماندارى, تاربيەشىلەر مەن بالا كۇتۋشىلەر جۇمىس ىستەيدى. قوزعاۋ تىرەگى بۇزىلعان بالالارعا ارنالعان ارنايى ماسساج جاساۋشى دا بار.
«تالاي ۋاقىت بويى بوس تۇرعان عيماراتتى جالعا الىپ, اتالعان ورتالىقتى اشتىق. ونىڭ جوندەۋ جۇمىستارىنا, بالالارعا قاجەتتى زاتتار الۋعا ءبىراز قاراجات كەتتى. اۋدان اكىمى نارباي ەرگەبەكوۆ ءبىزدىڭ بۇل باستامامىزدى قولداپ, عيماراتتى ارزان باعامەن جالعا الۋعا كومەكتەستى. ەندى ۇكىمەت تاراپىنان قولداۋ بولسا ەكەن دەگەن تىلەگىمىز بار. ءبىز مۇمكىندىگى شەكتەۋلى بالالارمەن قاتار, ولاردىڭ اتا-انالارىنا دا كومەك كورسەتسەك دەپ ويلايمىز», دەيدى داميرا جولجانقىزى.
قازىرگى كەزدە ورتالىقتا 9 ادام جۇمىس ىستەيدى. نەگىزى 13 قىزمەتكەر بولۋ كەرەك ەكەن. الايدا ورتالىق جەتەكشىسى قاراجاتتىڭ جەتىسپەۋشىلىگىنە بايلانىستى قوسىمشا ماماندار شاقىرۋعا مۇمكىندىك بولماي وتىرعانىن جەتكىزدى. ال العاشقى ءبىر ايدا اتا-انالار 10 مىڭ تەڭگەدەن تولەگەن بولسا, كەيىننەن بۇل دا تەگىن بولعان. جوبا جەتەكشىسى ەڭ باستىسى بالالار مەن اتا-انالارعا كومەك كورسەتۋ نيەتىندە ەكەنىن ايتتى. سونىمەن قاتار, مۇندا بالالارعا 5 مەزگىل تاماق بەرىلەدى. ارنايى ينۆاتاكسي بالالاردى تاڭەرتەڭ ۇيىنەن الىپ كەتىپ, كەشكە ۇيىنە اپارىپ سالادى ەكەن. «بالالارعا ارناپ كىلەم, توسەك سياقتى ءبىرتالاي زات الدىق. عيماراتقا جوندەۋ جۇمىستارىن جۇرگىزدىك. جالپى, جۇمىستى باستاۋعا 3 ملن تەڭگە جۇمسالدى. ءالى دە تالاي زات جەتىسپەيدى. سونىمەن قاتار ورتالىق قىزمەتكەرلەرىنە دە ايلىقتى ءوزىمىز تولەيمىز», دەيدى داميرا جولجانقىزى.
جامبىل وبلىسى
