قارماعىن قامداپ, كول جاعالاي قوناقتاعان بالىقشىلاردىڭ جاس ەرەكشەلىكتەرى ءارتۇرلى ەكەن. ەڭ جاسى ون سەگىزدەگى بوزبالا بولسا, ەگدەسى – جەتپىستى القىمداعان اقساقال. قۇمارلىق شىركىن جاسقا قارامايدى-اۋ, تەگى. فەستيۆالدىڭ شارتى بويىنشا ءار بالىقشىعا تۇپ-تۋرا ەكى ساعات ۋاقىت بەرىلەدى. وسى ۋاقىت ىشىندە ەكى رەت ورىن ايىرباستاپ, قارماعىن, جەمىن جاڭارتۋعا قۇقىلى.
– بالىق اۋلاۋ فەستيۆالىن بيىلعى جىلى ەكىنشى رەت وتكىزىپ وتىرمىز, – دەيدى شارانى ۇيىمداستىرۋشى دارحان ءالىموۆ. ەڭ باستى ماقسات – سەكسەن كولدى ومىراۋىنا سەكسەن مارجان ەتىپ تاققان كورىكتى كوكشە ءوڭىرىن, سۇلۋ تابيعاتىن, بۋرابايدىڭ باۋىرىنداعى بەرەكەنى ناسيحاتتاۋ. الداعى جىلى باستاما ءورىسىن كەڭەيتىپ, رەسپۋبليكالىق دەڭگەيدە وتكىزەمىز بە دەگەن ويىمىز بار.
بالىقشىلار ساقاداي سايلانىپ كەلگەن-اق ەكەن. ءتىپتى وتباسىمەن قاتىسىپ جاتقاندار دا بار.
–ماسەلە بالىقتى كوپ ۇستاۋدا ەمەس, – دەيدى الەكسەي پيروۆسكي, – ەڭ باستىسى, تىلسىم تابيعاتتىڭ قۇشاعىندا وزگەشە ءبىر سەزىمگە بولەنىپ, ءبىر جاساپ قالۋ. اسىلىندا, بۇل دا سپورتتىڭ ءبىر ءتۇرى. بىرىنشىدەن, جارىس بولعان سوڭ ارقاڭ قوزادى, ونىڭ ۇستىنە شالت قيمىل كوبەيەدى.
جارىس قورىتىندىسى بويىنشا تۇڭعىش بالىق, ەڭ ءىرى بالىق اتالىمدارى بويىنشا قارماعى قارا سۋدان بوس قايتپاعاندار ماراپاتتالدى. اۋلانعان ەڭ ءىرى بالىقتىڭ سالماعى ءۇش كەلىگە تاياۋ بولدى.
اقمولا وبلىسى
