جۇزدەسۋشىلەر قازاقستان مەن قىتاي قاتىناستارىنىڭ ناتيجەلى دامۋىنا ريزاشىلىقتارىن ءبىلدىردى. لي چجانشۋدىڭ پىكىرىنشە, ۇلت كوشباسشىسى ن.ءا.نازارباەۆ پەن قىتايدىڭ جوعارى باسشىلىعى اراسىنداعى سەنىمدى ديالوگ ءوزارا تابىستى ءىس-قيمىلدى دامىتۋدا ماڭىزدى ءرول اتقارىپ كەلەدى. ول تۇڭعىش پرەزيدەنتتىڭ باسشىلىعىمەن قازاقستاننىڭ الەۋمەتتىك-ەكونوميكالىق دامۋدا زور جەتىستىكتەرگە جەتكەنىن جانە ەلىمىزدىڭ حالىقارالىق ارەناداعى بەدەلىنىڭ ارتا تۇسكەنىن اتاپ ءوتتى. «بۇگىندە ءبىزدىڭ قارىم-قاتىناسىمىز بيىك ىنتىماقتاستىق دەڭگەيىنە جەتتى جانە كورشى مەملەكەتتەرگە ۇلگى بولىپ تابىلادى», - دەدى قحر ءحوبج تۇراقتى كوميتەتىنىڭ توراعاسى.
سەنات باسشىسى قازاقستان پرەزيدەنتى ق.توقاەۆتىڭ بيىلعى قىركۇيەك ايىنداعى قىتايعا مەملەكەتتىك ساپارىنىڭ ماڭىزىن اتاپ وتە كەلىپ: «ساپار بارىسىندا قول قويىلعان قازاقستان رەسپۋبليكاسى مەن قىتاي حالىق رەسپۋبليكاسىنىڭ بىرلەسكەن دەكلاراتسياسى قازاقستان مەن قىتايدىڭ ءوزارا ءىس-قيمىلىنىڭ جاڭا ءداۋىرىنىڭ باستالۋىنا نەگىز بولدى», - دەدى.
ءوزارا ءتيىمدى ىنتىماقتاستىقتىڭ كەلەشەگى تۋرالى ايتا كەلىپ, تاراپتار ءوزارا پارلامەنتارالىق ءىس-قيمىلدى جانداندىرۋعا, كەدەيلىكپەن جانە كيبەر قىلمىسپەن كۇرەس, يننوۆاتسيا, ەكولوگيا, اۋىل شارۋاشىلىعى جانە تاعى باسقا سالالاردا تاجىريبە الماسۋعا كەلىستى.
ءحوبج تۇراقتى كوميتەتىنىڭ توراعاسى لي چجانشۋ سەنات باسشىسىن قحر-عا ساپارمەن كەلۋگە شاقىردى.
تاراپتار سونداي-اق حالىقارالىق كۇن تارتىبىندەگى وزەكتى ماسەلەلەردى, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى نىعايتۋدىڭ كەلەشەگىن تالقىلادى.
«قىتايداعى جاڭارۋلار مەن جاڭعىرۋلار جىلدامدىقتارى زور اسەر قالدىرادى. بولاشاققا قادام باسقان قىتايدىڭ ازاماتتارى ەڭبەكقورلىعىن پاش ەتىپ وتىر. ەكى ەلدىڭ تۋريستىك الەۋەتىن دامىتۋ, ءبىر-ءبىرىن جاقسى ءبىلۋ ءۇشىن جاستار ءتۋريزمىن ىنتالاندىرۋ كەرەك», - دەدى سەنات باسشىسى.
داريعا نازارباەۆا قىتاي دەلەگاتسياسىنا سەنات عيماراتىن تانىستىرىپ, زاڭدار قابىلداناتىن جوعارى زاڭ شىعارۋ ورگانى قالاي جۇمىس ىستەيتىنىن ايتتى.
