كونفەرەنتسيانىڭ ماقساتى - ەكونوميكا سالالارىنىڭ پراكتيكالىق مىندەتتەرىن شەشۋ ءۇشىن عارىش قىزمەتىنىڭ ناتيجەلەرىن پايدالانۋ بويىنشا وزىق تاجىريبە الماسۋ.
«قازاقستان قۇرعان عارىش توبى مەملەكەتتىك جانە جەرگىلىكتى اتقارۋشى ورگاندار ءۇشىن مامانداندىرىلعان گەوقىزمەتتەردە ەكونوميكا سالالارىندا عارىش مونيتورينگىن دەربەس جۇرگىزۋگە مۇمكىندىك بەردى. ءوز كەزەگىندە عارىش مونيتورينگى اۋىل شارۋاشىلىعى, توتەنشە جاعدايلار, ەكولوگيا جانە تابيعاتتى پايدالانۋ, جەردى پايدالانۋ, گەودەزيا, كارتوگرافيا, قورعانىس, ۇلتتىق قاۋىپسىزدىك جانە باسقا دا ماسەلەلەردى شەشۋ ءۇشىن جقز دەرەكتەرىنە دەربەس جانە جەدەل قول جەتكىزۋگە مۇمكىندىك بەرەدى», – دەپ اتاپ ءوتتى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى مارات نۇرعوجين.
كونفەرەنتسياعا قاتىسۋشىلار عارىش تەحنيكاسى مەن تەحنولوگيالارىنىڭ وتاندىق ۇلگىلەرىن ازىرلەۋدەگى قازاقستاندىق سەرپىلىستى جوعارى باعالاي وتىرىپ, ەلىمىزدىڭ زاماناۋي عارىشتىق ينفراقۇرىلىمىن تالقىلادى. سونداي-اق ەكى وپتيكالىق اپپارات (ورتا جانە جوعارى كەڭىستىكتىك رۇقساتتار), عارىش اپپاراتتارىن جەرۇستى باسقارۋ كەشەنى جانە عارىش اپپاراتتارىنان دەرەكتەردى قابىلداۋ جانە وڭدەۋ ءۇشىن جەرۇستى ماقساتتى كەشەنى ۇسىنىلعان جەردى قاشىقتىقتان زوندتاۋ جۇيەسىنە دا ەرەكشە نازار اۋدارىلدى. جقز مالىمەتتەرىنە تالداۋ جاساۋ جانە قولدانبالى مىندەتتەردى شەشۋ ءۇشىن NASA عالىمدارى بۇل جۇمىستى بىرلەسىپ جالعاستىرۋدى ۇسىندى.
NASA, GEOGLAM باعدارلاما جەتەكشىسى كريس دجاستيس (Chris Justice) جەردى قاشىقتىقتان زوندتاۋ بويىنشا قازاقستاندىق مامانداردىڭ جۇمىسىن جوعارى باعالاپ, قازاقستاننىڭ عارىش مونيتورينگىنىڭ ناتيجەلەرىن جەردىڭ جاھاندىق مونيتورينگىنە ەنگىزۋ قاجەت دەپ سانايدى. ء«بىزدىڭ كەزدەسۋىمىز ۇيىمدار مەن ۋنيۆەرسيتەتتەردىڭ قاتىسۋىمەن حالىقارالىق باعدارلامالاردى جۇزەگە اسىرۋ بويىنشا دەرەكتەر مەن تاجىريبە الماسۋدىڭ ورتالىق ازيا جەلىسىن قۇرۋ ماسەلەسىنە باعىتتالعان. شەشىمدەردىڭ ءبىرى قازاقستاندا NASA ورتالىق ازيا ايماقتىق اقپاراتتىق ورتالىعىنىڭ اشىلۋى بولماق», - دەپ اتاپ ءوتتى عالىم.
كونفەرەنتسيا قورىتىندىسى بويىنشا جول كارتاسىن قابىلداۋ جوسپارلانۋدا, ول NASA-مەن تەحنولوگيالار ترانسفەرتىنە جانە ودان ارعى جۇمىستارعا, سونداي-اق وتاندىق سالاعا جەتەكشى عارىش اگەنتتىكتەرىنىڭ دەڭگەيىنە جەتۋگە باعىتتالاتىن بولادى.
كونفەرەنتسياعا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ, NASA شتاب-پاتەرىنىڭ, مەريلەند شتاتى ۋنيۆەرسيتەتىنىڭ, ميچيگان شتاتى ۋنيۆەرسيتەتىنىڭ, ەللادى زەرتتەۋ جانە تەحنولوگيا ورتالىعىنىڭ (گرەتسيا) جانە «قازاقستان عارىش ساپارى» ۇلتتىق كومپانياسىنىڭ» وكىلدەرى قاتىسۋدا.
