ءىس-شارانىڭ نەگىزگى ماقساتى – وزبەكستان قازاق دياسپوراسى وكىلدەرىمەن ىسكەرلىك قارىم-قاتىناس ورناتۋ.
جيىنعا قاتىسۋشى ىسكەر وتانداستاردى الدىمەن دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ قۇتتىقتاپ, وزبەكستانداعى قانداستارمەن بيزنەس-فورۋم وتكىزۋدىڭ ماقساتى مەن ميسسياسىن ءتۇسىندىردى جانە ەكى ەل اراسىنداعى عاسىرلار بويى قالىپتاسقان باۋىرلاستىقتى ودان ءارى نىعايتۋ ءۇشىن ىسكەرلىك بايلانىستاردى كۇشەيتۋ كەرەك ەكەندىگىنە توقتالدى. زاۋىتبەك قاۋىسبەك ۇلى ءوز سوزىندە دۇنيەجۇزى قازاقتارىنىڭ قاۋىمداستىعى مەن «وتانداستار قورى» قىزمەتتەرىنىڭ نەگىزگى باعىتتارىن, سونداي-اق شەتەلدەگى دياسپورامەن جۇمىس ىستەۋ جونىندەگى نەگىزگى جوبالارىن اتاپ ءوتتى.
اتالعان ءىس شاراعا قر وزبەكستانداعى وكىلەتتى ەلشىسى دارحان امانگەلدى ۇلى ساتىبالدى ارنايى كەلىپ, قاتىسۋشىلاردى «وتانداستار قورىنىڭ» ۇيىمداستىرۋىمەن وزبەكستانداعى قانداستار اراسىندا العاش رەت وتكىزىلگەن بيزنەس-فورۋممەن قۇتتىقتادى.
وزبەكستانداعى قازاق مادەني ورتالىعىنىڭ توراعاسى سەرىكباي ۇسەنوۆ اتالعان ەلدەگى قازاق دياسپوراسى وكىلدەرىنىڭ ەكونوميكالىق مۇمكىندىكتەرى جايىندا ءسوز قوزعاپ, ىسكەر قانداستاردىڭ نەگىزگى كاسىپ سالالارىن جانە قازاقستانمەن ىسكەرلىك بايلانىستى نىعايتۋ ءۇشىن الدىمەن ساۋدا-ساتتىقتى كۇشەيتۋ قاجەت ەكەنىن العا تارتتى.
بيزنەس-فورۋم بارىسىندا دۇنيەجۇزى قازاقتارىنىڭ قاۋىمداستىعى توراعاسىنىڭ ورىنباسارى ارعىن وسپانوۆ پەن «وتانداستار قورى» پرەزيدەنتىنىڭ كەڭەسشىسى بولات ديدار شاراعا قاتىسۋشىلارمەن ءوزارا ءىس-قيمىل تەتىكتەرىن, شاعىن جانە ورتا بيزنەس سالاسىنداعى بيزنەس-باستامالاردى ىنتالاندىرۋ, سونداي-اق ستارتاپتاردى قولداۋ جانە دامىتۋ تەتىكتەرىن ەگجەي-تەگجەيلى تالقىلادى. توقىما ونەركاسىبىنىڭ, اۋىل شارۋاشىلىعىنىڭ, قىزمەت كورسەتۋ سالاسىنىڭ دامۋىنا, تەحنولوگيالىق وندىرىستەردى قۇرۋعا نەگىزدەلگەن وزبەكستان نارىعىنىڭ بەيىنىن ەسكەرە وتىرىپ, وسى سالالارعا باسا نازار اۋدارىلدى. فورۋم قاتىسۋشىلارىنا قازاقستان وبلىستارىنىڭ ينۆەستيتسيالىق الەۋەتى تانىستىرىلدى.
فورۋم جۇمىسىنا 50-دەن استام ادام قاتىستى. ولار وزدەرىن قىزىقتىراتىن ستارتاپتار, بيزنەس-باستامالار, قولدا بار جوبالار تۋرالى ايتىپ, سپيكەرلەرگە سۇراقتار قويىپ, بيزنەس جوسپارلار مەن باستامالاردى قازاقستاندا, سونداي-اق حالىقارالىق نارىقتا جىلجىتۋ مۇمكىندىكتەرىن تالقىلادى.
فورۋم سوڭىندا دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك قاۋىسبەك ۇلى وزبەكستاندا تۇراتىن قانداستارعا وتانداستار قورىنىڭ ۇسىنىستارعا اشىق جانە تۇراتىن جەرىنە قاراماستان بارلىق وتانداستارمەن بايلانىستا تۇرعانىن, ول ءۇشىن بارلىق وزەكتى ماسەلەلەر بويىنشا كەڭەس بەرەتىن جانە اقپاراتتىق قولداۋ كورسەتەتىن وتانداستار ماسەلەلەرى جونىندەگى بىرىڭعاي بايلانىس ورتالىعى ارنايى قۇرىلعانىن ايتتى.
وزبەكستانداعى بيزنەس-فورۋم تامىز ايىندا سان-فرانتسيسكو قالاسىندا وتكەن فورۋمنان كەيىنگى ءتورتىنشى بيزنەس-فورۋم. ءار ەلدە تۇراتىن وتانداستارمەن 8 ەلدە (گفر, اقش, ۇلىبريتانيا, شۆەتسيا, قىتاي حالىق رەسپۋبليكاسى, وزبەكستان, تۇركيا جانە رەسەي) بيزنەس-فورۋم وتكىزۋ جوسپارلانعان, كەلەسى بيزنەس-فورۋم 2019 جىلى 20 قىركۇيەكتە لوندون قالاسىندا ( ۇلىبريتانيا) وتەدى.
