جيىنعا مادەنيەت جانە سپورت ءمينيسترى اقتوتى رايىمقۇلوۆا, جاپونيانىڭ قازاقستانداعى ەلشىسى تاتسۋحيكو كاساي, «نەۆادا-سەمەي» انتيادرولىق قوزعالىسىنىڭ كوشباسشىسى ولجاس سۇلەيمەنوۆ, حالىقارالىق قوزعالىس مۇشەلەرى, نوبەل سىيلىعىنىڭ لاۋرەاتتارى قاتىستى.
كونفەرەنتسيانىڭ اشىلۋىندا ءسوز العان مادەنيەت جانە سپورت ءمينيسترى ا. رايىمقۇلوۆا جينالعاندارعا قازاقستاننىڭ تۇڭعىش پرەزيدەنتى – ەلباسى ن. نازارباەۆتىڭ قۇتتىقتاۋ حاتىن وقىپ بەردى. بۇگىنگى قۇتتىقتاۋى مەن يادرولىق سىناقتى توقتاتۋعا قوسقان ەڭبەگىنە ريزاشىلىق بىلدىرگەن اقىن, «نەۆادا-سەمەي» انتيادرولىق قوزعالىسىنىڭ كوشباسشىسى و. سۇلەيمەنوۆ ەلباسى ن. نازارباەۆقا قوزعالىستىڭ 30 جىلدىعىنا ارناپ شىعارىلعان مەرەيتويلىق مەدالىن تاپسىردى. سونداي-اق مەرەيتويلىق مەدال مادەنيەت جانە سپورت مينيسترىنە دە تاپسىرىلدى.
«بۇگىنگى شارا – قوزعالىستىڭ سالتاناتتى مەرەيتويى عانا ەمەس, قازاقستاندىق قوعام مەن بارشا ادامزاتتىڭ بەيبىتشىلىك پەن تازا عالامشار ءۇشىن كۇرەسىنىڭ ماڭىزدى كەزەڭى. «نەۆادا-سەمەي» حالىقارالىق انتيادرولىق قوزعالىسى بەلسەندىلەرىنىڭ, قوعامنىڭ ارقاسىندا 1989 جىلعا جوسپارلانعان 18 يادرولىق سىناقتىڭ 11-ءى جاسالمادى. وسىنداي كۇش-جىگەر مەن باتىل قادامدارىڭىزبەن سىزدەر عالامدىق سانانى وزگەرتۋگە ۇلەس قوسىپ, بەيبىتسۇيگىشتىك يدەيانىڭ ماڭىزدىلىعىن ءىس جۇزىندە دالەلدەدىڭىزدەر», - دەدى مادەنيەت جانە سپورت ءمينيسترى ا. رايىمقۇلوۆا.
قازاق جەرىندە 1949 جىلدان 40 جىلداي يادرولىق سىناق جۇرگىزىلدى. 450-دەي سىناقتىڭ سالدارىنان رادياتسيالىق ساۋلەنىڭ كۇشتى دوزاسىن العان پوليگون ماڭىنداعى اۋىل تۇرعىندارى ونىڭ زاردابىن ءالى كۇنگە تارتىپ كەلەدى. و. سۇلەيمەنوۆ 1989 جىلى يادرولىق سىناققا قارسى «نەۆادا-سەمەي» قوزعالىسىن قۇرۋ تۋرالى ۇندەۋ تاستادى. اراعا 2 جىل سالىپ, پرەزيدەنت ن. نازارباەۆتىڭ جارلىعىمەن پوليگون تولىقتاي جابىلدى. كەيىننەن 29 تامىز – حالىقارالىق يادرولىق قارۋعا قارسى كۇرەس كۇنى بولىپ بەكىتىلدى.
