قازاقستان كينو الەمىندەگى جاڭاشىلدىق تۋرالى «ۇلتتىق كينونى قولداۋ مەملەكەتتىك ورتالىعى» كەاق باسقارما توراعاسىنىڭ مىندەتىن اتقارۋشى, كينوپروديۋسەر, ستسەناريست گۇلنار سارسەنوۆا, ەۋروپا كينواكادەمياسىنىڭ مۇشەسى (EFA), پروديۋسەر اننا كاچكو, حالىقارالىق ونلاين جوبانىڭ يدەيا اۆتورى ەليزاۆەتا شماكوۆا مەن بەلگىلى اكتريسا, كاستينگ-ديرەكتور جاننا قۋانىشەۆا اڭگىمەلەپ بەردى.
جيىن اياسىندا Etalents.pro بىرەگەي پلاتفورماسىنىڭ تانىستىرىلىمى ءوتتى. بۇل سايت ارقىلى كاستينگ ديرەكتورلارى مەن الدەقاشان تانىلعان اكتەرلەر وزدەرىنىڭ جەتىستىكتەرى مەن تالانتىن كورسەتۋگە مۇمكىندىك السا, رەجيسسەرلەر مەن ستسەناريستەرگە كاسىبي ءتۇسىرىلىم توبىن جيناۋ پروتسەسى ەداۋىر جەڭىلدەتىلمەك. سەرۆيستى ازىرلەۋشىلەردىڭ ايتۋىنشا, بۇل جاي عانا اكتەرلىك بازا ەمەس, تولىققاندى باعدارلامالىق قامتاماسىز ەتىلگەن, قولدانۋعا وتە ىڭعايلى ءارى تۇسىنىكتى سايت.
ماسەلەن, اكتەرلەر وسى سايتتا تىركەلىپ, ءتيىستى ساۋالدامانى تولتىرعان سوڭ ءوزىنىڭ كاسىبي داعدىلارىن, فيلموگرافياسىن, ماراپاتتار ءتىزىمىن, فوتو جانە ۆيدەو ءتۇسىرىلىمىن ەنگىزۋى قاجەت. وسىدان سوڭ باعدارلاما اۆتوماتتى تۇردە جاساعان تۇيىندەمەگە وزگە كينوتسەحتىڭ باسقا قولدانۋشىلارى ۇسىنىستارىن بىلدىرە الادى. قاجەتتى ۇمىتكەردى ايقىن جانە ءدال ىزدەۋدى قامتاماسىز ەتەتىن 8 ىزدەۋ جۇيەسى ۇسىنىلادى. سەرۆيس الەمنىڭ نەگىزگى 10 تىلىندە قىزمەت ەتپەك. باسقاشا ايتقاندا, قازاقستاندىق اكتەرلەردەن, كينووپەراتورلار مەن رەجيسسەرلەردەن كوماندا قۇرۋ ەندى وڭاي, ساپالى, ەڭ باستىسى, جەدەل ءارى زاماناۋي تەحنولوگيالاردىڭ كومەگىمەن جۇزەگە اسىرىلادى.
«مەن ءبىر جارىم جىل بۇرىن «نارتاي» ءفيلمىنىڭ باستى رولىنە اكتەر تاڭداۋ ءۇشىن ەلىمىزدىڭ تانىمال كينوستۋديالارىنىڭ بىرىنە كەلىپ, ۇمىتكەرلەردى كورسەتۋدى وتىنگەن كەزدە ماعان جاي عانا فوتوسۋرەتتەر سالىنعان فايلداردى ۇستاتتى. سول كەزدە مەن تاڭعالدىم... سوندىقتان ءبىز وسى باعىتتا قادام جاساۋعا شەشىم قابىلدادىق. ونلاين-پلاتفورما كينويندۋستريا بويىنشا دەرەكتەردى عانا ەمەس, ادامداردى دا بىرىكتىرەدى. بۇل پلاتفورمانى تەك قازاقستاندا عانا پايدالانۋ ءۇشىن جاسامايمىز. سەبەبى ءبىزدىڭ تالانتتاردى رەسپۋبليكادان تىس جەرلەردە دە كورگىمىز كەلەدى», – دەدى گ.سارسەنوۆا.
يدەيا اۆتورى اننا كاچكونىڭ ايتۋىنشا, مۇنداي پلاتفورمالار بىرنەشە ەلدىڭ قىزمەت تاجىريبەسىندە بار.
