– اپكە، ارتىق بيلەتىڭىز جوق پا؟ قانشا بولسا دا ساتىپ الامىن... – دەپ قيىلدى ستۋدەنت قىز.
– جوق، ءوزىم دە بيلەت تاپپاي، نە ىستەرىمدى بىلمەي تۇرمىن، – دەدى بالا جەتەكتەگەن ورتا جاستاعى كەلىنشەك كۇمىلجي.
بۇل – م.اۋەزوۆ تەاترى الدىنداعى «فاريزا» سپەكتاكلىنىڭ پرەمەراسى كۇنگى كورىنىس. الماتىنى قانشا جەردەن مادەنيەتتىڭ ورداسى دەسەك تە، ءدال وسىنداي ەسىككە ەنتەلەي ىشكە كىرۋگە ۇمتىلعان ەسەپسىز كورەرمەننىڭ قاراسىن كورمەگەلى كوپ بولىپ ەدى. قۋاندىق ءھام ويلاندىق. حالىق اقىنىن ساعىنىپتى...

سول ساعىنىش ءبىزدى دە ارقادان الاتاۋعا قاراي اسىقتىرعان. الىپ-ۇشىپ جەتكەندەگى ماقساتىمىز – «فاريزانى» كورۋ، ساحناداعى اقىن جىرىمەن، اقىن مۇڭىمەن سىرلاسۋ. سول كەشتەگى تەاتردىڭ ءىشى مەن سىرتىن لىق تولتىرعان ءار كورەرمەننىڭ كوڭىل تۇكپىرىندەگى تولقىنىستى سەزىم ەدى بۇل. ارقايسىمىز ىشىمىزدەگى وسى ءبىر تولعانىسپەن ءوز فاريزامىزدى ىزدەپ تەاتر تابالدىرىعىن اتتادىق.
بۇل كۇنى حالىق كوپ جينالدى. جاس تا، كارى دە، اقىن دا، جازۋشى دا، اكتەر دە، ءانشى دە – تەاترعا تابانى جەتكەننىڭ بارلىعى قاراشاڭىراق تورىنەن تابىلدى. «فاريزانى» كورۋ ءۇشىن عانا رەسپۋبليكانىڭ تۇكپىر-تۇكپىرىنەن المالى قالاعا ارنايى ساپارلاپ كەلگەندەردىڭ قاراسىندا شەك جوق. قويىلىمنىڭ تۇساۋكەسەرى ونەردىڭ شىن مانىندەگى مەرەكەسىنە اينالعانداي. ءيا، حالىق اقىنىن ساعىنىپتى...
دەمىمىزدى ىشىمىزگە تارتىپ، تاعاتسىزدانا شىمىلدىق اشىلار ءساتتى كۇتتىك. ول دا ۇزاق توستىرمادى. ۋادە ەتىلگەن ۋاقىتتا جارىق ءسونىپ، سپەكتاكل باستالىپ كەتتى. ساحنا تۇكپىرىنەن جاۋىن استىندا مالمانداي سۋ بولعان جالعىز بەينە كورىندى. قۋانعانى ما، قينالعانى ما – كەيىپكەر كوڭىل كۇيىن اجىراتۋ قيىن. ۇزاق ۇنسىزدىكتەن سوڭ فاريزا ءتىل قاتتى. ولەڭىمەن ومىرگە جان ءبىتىردى. كوپشىلىككە سىر اقتاردى.
دارا كۇندەرىمنىڭ،
نالا تۇندەرىمنىڭ
سەرىگى بولعانىڭ ءۇشىن،
سەنىمى بولعانىڭ ءۇشىن
مەن سەنى ايالاپ وتەم، ولەڭ!
ازاپتى قايعى-مۇڭىمدى
وزىممەن بولىسكەنىڭ ءۇشىن.
مەنىڭ مىناۋ قيىنداۋ
تاعدىرىم بولىپ
و باستا كورىسكەنىڭ ءۇشىن.
مەن سەنى ايالاپ وتەم، ولەڭ!
ءومىرىن ولەڭگە بالاعان فاريزانى وزگەشە مۇسىندەۋ مۇمكىن دە ەمەس ەدى. وسىنى تەرەڭ ۇعىنعان اۆتور روزا مۇقانوۆا وقيعا جەلىسىن پەنداۋي، تۇرمىستىق قايشىلىقتاردان الشاق اكەتىپ، اقىن مەن تاعدىر اراسىنداعى تارتىسقا قۇرادى. ياعني فاريزا جارماق بەينەگە اينالادى. ەكىگە بولىنگەن ءبىر-بىرىنە كەرەعار الەم قويىلىم باستالعاننان شىمىلدىق جابىلعانعا دەيىن تارتىسىپ وتەدى. ءبىرى – ونەردىڭ ماڭگىلىك بيىگىن كوكسەسە، ەكىنشىسى – قاراپايىم ايەل باقىتىن ارماندايدى. فاريزا كىمدى تاڭدايدى؟ نەگە باسىمدىق بەرەدى؟ ءبىردى مىڭعا ساتا ما، الدە جالعىزدىڭ جولىندا بارلىعىن قۇربان ەتە مە؟..
قويىلىمدا تاعدىرى – دراماعا، تراگەدياسى فيلوسوفياعا اينالعان فاريزا بار. ول – جالعىز. دارا! ءدال ومىردەگىدەي، ولەڭدەگىدەي. تارتىس نەگىزىنەن سىرتقى كۇشتەن بۇرىن، اقىننىڭ ءوز ىشىندە ءجۇرىپ جاتادى. كەمپىر بەينەسىندەگى تاعدىرى دا، اقبوز اتتى حانزادا بولىپ كەلگەن اجالى دا، مۇقاعالي بەينەسىندەگى شابىت پەن داڭقى، مويىنداۋ ءھام مويىندالۋى دا، كوپشىلىك قالامگەرلەر، سىنشىلار قالپىنداعى – قابىلدانباۋى دا – بارلىعى – بارلىعى نازىك جۇرەكتى اقىن جانىن سان تاراپقا ساندالتادى. مۇنى ساحناداعى كەمپىر كەيپىندە كورىنگەن كەيىپكەر تاعدىر (لەيلو بەكنازار – حانينگا) دا «دارادا دوس بولمايدى» دەپ قاداپ ايتادى. بىراق ادامنىڭ ءبارى پەندە ەمەس پە ەكەن، سىرىن ۇعار، جۇرەگىن اشار جان ىزدەپ الاسۇرعان، قينالعان اقىن جانى اقىرى ۇلى دوستىقتى دا، ومىرلىك سەرىگىن دە، اعەدەن سىرلاسىن دا ولەڭ دەيتىن تۇڭعيىق الەمنەن تابادى. ءسويتىپ ادام فاريزا ايەل بولۋ، جار ءسۇيۋ، انا اتانۋ نەسىبەسىن ولەڭ فاريزانىڭ جولىندا قۇربان ەتەدى. ءتىپتى، ءوزى عۇمىر بويى اڭساپ، قيالىندا، جۇرەك تۇكپىرىندە ايالاپ كۇتكەن اقبوز اتتى ارمان حانزاداسىنىڭ ءومىرىنىڭ سوڭىندا اجال كەيپىندە الدىنا كەلىپ، قولىن ۇسىنۋىن دا اقىن جاتىرقامادى. بار ءومىرىن سارپ ەتىپ، سارىلا توسقان اجالىن اڭسارى دەپ تانىعان عازيز جۇرەك ويلانباستان ءوز تاڭداۋىن جاسايدى. ءيا، ءسويتىپ پەندە فاريزا كەتەدى، ولەڭ – فاريزا قالادى... ماڭگىلىككە!
مىنە، وسى ويدى جەتكىزۋدە دراماتۋرگ تە، رەجيسسەر دە ۇتقىر فورمالارعا باتىل بارادى. اسىرەسە، اقىن جانىنىڭ بار قاتپارىن اشۋدا اۆتوردىڭ وتكىر دە بەينەلى ءتىلى دراما بوياۋىن وزىندىك ورنەگىمەن بايىتىپ، تىلدىك قولدانىسىنداعى اق ولەڭگە اينالعان پوەتيكالىق ءسوز ساپتاۋى سپەكتاكلگە تاماشا ديناميكا ۇستەيدى. ولەڭى تاعدىرىنا، تاعدىرى ولەڭىنە اينالعان فاريزانىڭ جان الەمىن اشۋعا باسىمدىق بەرەدى. وسى ارقىلى وقيعا شيەلەنىسىن شيرىقتىرادى. ناتيجەسىندە قويىلىم ءا دەگەننەن كورەرمەنىن وزىنە تارتىپ الا جونەلەدى. سول ەكپىن سپەكتاكل سوڭىنا دەيىن تيتتەي دە باسەڭسىمەيدى. البەتتە، بۇل ەڭ اۋەلى ءسوز قۇدىرەتى بولسا، ودان كەيىن سپەكتاكلدىڭ قويۋشى رەجيسسەرى فارحات مولداعاليدىڭ دراماتۋرگ ويىن ءدوپ تانىپ وقي الۋىندا ءھام ماعىنالى سوزگە ساحنالىق ساۋلەلى تاعدىر سىيلاي بىلگەنىندە دەپ بىلەمىز.
فارحاتتىڭ بۇعان دەيىنگى بىرنەشە جۇمىسىمەن تانىسۋ مۇمكىندىگى بۇيىرعاندىقتان دا، بۇل «فاريزانى» «قاراگوز» تراگەدياسىنان كەيىنگى رەجيسسەر قولتاڭباسىن وزگەشە قىرىنان تانۋعا مۇمكىندىك سىيلاعان ءساتتى جۇمىستارىنىڭ قاتارىنا باتىل قوسۋعا تولىقتاي نەگىز بار. قۋانتارلىعى – فارحات ءوزىنىڭ ۇنەمى شىعارماشىلىق ىزدەنىس ۇستىندە ەكەندىگىن ءار قويىلىمى ارقىلى دالەلدەپ كەلەدى. بۇل قويىلىمىندا دا فارحات توسىن، تاماشا كوركەمدىك شەشىمدەرگە باردى. اسىرەسە ساحنادا وبرازدى وي ايتۋ، وقيعانى سيمۆولمەن سويلەتۋدەگى سۋرەتكەرلىك كوزقاراستارى سۇيسىنتەدى. ودان بولەك، تەحنيكانىڭ سوڭعى جەتىستىكتەرىن دە قويىلىمدا ۇتىمدى ۇشتاستىرۋى كوڭىلگە قۇرمەت ۇيالاتادى. مۇنى كومپوزيتور رەنات گايسيننىڭ سپەكتاكلگە ارنايى جازعان مۋزىكاسى ءتىپتى ارلەي تۇسەدى. رەناتتىڭ جۇرەك كوزىنەن وتكىزۋىندەگى اقىن الەمنىڭ نازىك يىرىمدەرى دە، تارتىستى، تاۋقىمەتتى، تراگەديالى كۇيى دە ءوز بوياۋىندا، ءوز ينتوناتسياسىندا ءساتتى ساراپتالعان. ءار ەپيزودتاعى فاريزانىڭ كوڭىل كۇيى مەن سەزىمىن ءسويتىپ كومپوزيتوردىڭ سازدى دا جاندى اۋەنى سۇيەمەلدەپ، جاڭا اسەرلەرگە جەتەلەپ وتىرادى.
ونەرگە اقسۇيەكتىك ءتان. لايىقتى دەڭگەيدە رۋحاني دا، قارجىلاي دا قولداۋ كورسەتىلمەسە، قانشا جەردەن تالانت ۇستەمدىك قۇرعانىمەن، ساحناداعى بار مۇمكىندىگىن تولىقتاي پاش ەتە الماق ەمەس. مۇنى اينۇر كوپباساروۆا پروديۋسەرلىك ەتەتىن «ا+ا» كومپانياسىنىڭ ايتۋلى جۇمىسى جانە ءبىر مارتە ايقىن كورسەتىپ بەردى. ياعني «فاريزا» مەملەكەتتىك تاپسىرىس ەمەس، تولىعىمەن جەكەمەنشىك كومپانيانىڭ ءونىمى بولعاندىقتان دا، قارجىلىق قولداۋدىڭ مول مۇمكىندىگى زاماناۋي باعىتتا قويىلعان ساپالى سپەكتاكلدىڭ جاڭاشا تىنىسىن اشتى. ساحناداعى ستسەنوگرافيالىق شەشىمدەر مەن تەحنيكالىق مۇمكىندىكتەردىڭ جوعارى كوركەمدىك ساپاسى، جارىق قويۋ، مۋزىكا مەن سپەكتاكلگە تاڭدالىپ الىنعان اكتەرلىك قۇرام شەبەرلىگى بارلىعى دا – زاماناۋي سپەكتاكل ىزدەنىستەرىنىڭ جوعارى دەڭگەيىن كورسەتتى. پروديۋسەر اينۇر كوپباساروۆانىڭ يدەياسى نەگىزىندە جۇزەگە اسىرىلعان ايتۋلى جوباعا قاي سالانىڭ دا «مەن» دەگەن ساحنا ماماندارى شاقىرىلىپتى. نۇر-سۇلتان مەن الماتى قالالارىنىڭ بىلىكتى دە بەلگىلى اكتەرلەرى تارتىلدى. اتاپ ايتار بولساق، فاريزا ءرولىن م.اۋەزوۆ اتىنداعى قازاق مەملەكەتتىك اكادەميالىق تەاترىنىڭ اكتريساسى نازگۇل قارابالينا سومداسا، ەلورداداعى ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنىڭ ارتىستەرى لەيلو بەكنازار-حانينگا – كەمپىر، قازاقستاننىڭ ەڭبەك سىڭىرگەن قايراتكەرى قۋاندىق قىستىقباەۆ – مۇقاعالي ءرولىن ءساتتى ساراپتادى. ەرلان كارىباەۆ اجال بەينەسىندە كورىندى. كوپشىلىك ساحناداعى اكتەرلەر ءانسامبلى دە وزىندىك بىرتۇتاستىعىمەن بەينەلى.
ارينە اۋقىمدى جۇمىس كەمشىلىكسىز دە بولماسا كەرەك-ءتى. بۇل تۇرعىدا ءبىزدىڭ اتتەگەنايىمىز كوبىنەسە اكتەرلەردىڭ ءرول ساراپتاۋىنا قاتىستى تۋىنداپ وتىردى. اسىرەسە پوەتيكالىق رەپليكالاردى ءسىڭىرۋ مەن ولەڭدە، سوزدە ايتىلاتىن ويعا ەكپىن قويۋداعى سالعىرتتىق، بالكىم اسىعىستىق كوركەمدىككە باي مۇقاعالي مەن فاريزا پوەزياسىن، استارى مول مۇقانوۆا ماتىندەرىن تولىققاندى ويعا دا، بويعا دا سىڭىرۋگە كەدەرگى كەلتىرگەنىن اتاپ وتۋگە ءتيىسپىز. بالكىم، بۇل پرەمەرا كۇنگى تولقۋ سەزىمىنەن تۋىنداعان ۋاقىتشا قۇبىلىس تا بولۋى ابدەن مۇمكىن.
سونداي-اق باستى رولدەگى اكتريسا نازگۇل قارابالينانىڭ ساراپتاۋىنداعى فاريزا بەينەسى پەسادا سۋرەتتەلگەن كەيىپكەردىڭ سان ءتۇرلى كوڭىل قۇبىلۋى مەن بولمىس بوياۋىن ءوز رولىنە تولىقتاي كوشىرە الماعانى دا ادەبي نەگىزبەن تانىس ءبىز ءۇشىن وبرازدىڭ ولقى ءتۇسىپ جاتقاندىعىن اڭعارتىپ قويىپ جاتتى. ولاي دەيتىنىمىز دراماتۋرگتىڭ مۇسىندەۋىندەگى اقىن بولمىسى ءتۇرلى تارتىستا ءتۇرلى كۇيگە ءتۇسۋى ءتيىس ەدى. ول اسىرەسە، تاعدىرىمەن كەزدەسۋىندە باسقا بولسا، مۇقاعاليمەن سىرلاسار تۇسىندا بولەك، اجالمەن جولىعار ءساتى مۇلدەم باسقا بوياۋدا بەدەرلەنسە كەرەك-ءتى. دراماتۋرگ ءوز جازباسى ارقىلى وقىرمانىن سونداي ويعا جەتەلەگەن. بىراق رەجيسسەر دە، اكتريسا دا ءرولدىڭ ءبىر-اق ءتۇستى بوياۋىن حوش كورىپتى. الايدا مۇنىڭ كورەرمەن ءۇشىن بىرسىدىرعى اسەر سىيلاعانىن ەسكەرتۋ پارىزىمىز. سونىڭ سالدارىنان دا فاريزانىڭ ساحناداعى بولمىسى بىرسارىندىلىققا بوي الدىرعان. ايتپەسە، رەجيسسەر تاعدىردى عانا ماڭايلاي بەرمەي، اقىننىڭ اجالمەن كەزدەسەتىن تۇسىنا دا ەكپىن تۇسىرگەنىندە، ءبىز كۇتىپ كەلگەن اسەر ءتىپتى قۇبىلا، كۇشەيە تۇسەر مە ەدى.
توقەتەرىن تۇيەر بولساق، اتالعان سىندى ەسكەرمەگەندە، جالپى قويىلىم دا، شىعارماشىلىق ۇجىم جۇمىسى دا ءوز ماقساتىنا جەتتى دەپ ايتۋعا تولىقتاي نەگىز بار. ەڭ باستىسى، م.اۋەزوۆ تەاترى ساحناسىندا 18 جىل بويى رەپەرتۋاردان تۇسپەي، ءۇزىلىسسىز قويىلعان «ماڭگىلىك بالا بەينە» (رەجيسسەرى بولات اتاباەۆ) شىعارماسىن ءسۇيىپ تاماشالاعان الماتىلىق كورەرمەن سۇيىكتى اۆتورىمەن تۋرا 22 جىلدان كەيىن كيەلى ساحنادا قايتا قاۋىشتى. تەك بۇل جولى ساحناعا «ماڭگىلىك بالا بەينەنى» جازعان بالعىن اۆتور ەمەس، «فاريزانى» تۋدىرىپ، اقىن جانىمەن تەڭ وتىرىپ سىرلاسقان، ولەڭ الەمىنەن ءوزى تانىعان فاريزاسىن ىزدەگەن شىعارماشىلىق بابىنداعى، تولىسقان، تولعان روزا مۇقانوۆا كوتەرىلدى. الماتى اقىنىن دا، اۆتورىن دا ساعىنىپتى. ۇزدىكسىز سوعىلعان شاپالاق. تولاستار ەمەس...
تۇلعا جايىندا جازىلعان شىعارمالاردىڭ الدى بولدى
تۇڭعىشباي جامانقۇلوۆ، قازاقستاننىڭ حالىق ءارتىسى:
– «فاريزانى» كوردىك. كورىپ كوڭىل قۋاندى. دراماتۋرگيا جاعىنان دا، رەجيسسۋرا مەن ستسەنوگرافيا تۇرعىسىنان دا ءساتتى ۇندەسكەن ەرەكشە سپەكتاكل بولدى دەپ ەسەپتەيمىن. سوڭعى ۋاقىتتاعى تۇلعا تاعدىرى تۋرالى جازىلعان شىعارمالاردىڭ الدى بولدى دەسەم، ارتىق ايتقاندىعىم ەمەس. دراماتۋرگ روزا مۇقانوۆانىڭ قولتاڭباسى، وي تەرەڭدىگى، ءتىل كوركەمدىگى – بارلىعى ءساتتى ۇيلەسىم تاپقان. جالپى، فاريزا اپامىزدىڭ بارلىق ءومىرى ولەڭدەرىندە جاتىر عوي. سونى اۆتور دراما تىلىندە ءساتتى ورگەن. رەجيسسۋرالىق فورماسى دا وتە جوعارى دەڭگەيدە. روزانىڭ كوركەمدىك دەڭگەيى بيىك شىعارمالارىنىڭ ءبىرى دەۋگە بولادى. جالپى، قويىلىم ۇنادى. تەاتر الەمىندەگى سوڭعى ۋاقىتتا قويىلعان كوركەمدىك دەڭگەيى جوعارى، ويلانتارلىق، جاڭاشىل، جاقسى سپەكتاكل ومىرگە كەلدى دەپ سەنىممەن ايتا الامىن.
فاريزانىڭ تاعدىرى – وقشاۋ تاعدىر
سماعۇل ەلۋباي، جازۋشى-دراماتۋرگ:
– ەڭ الدىمەن ءبىزدى تاڭعالدىرعانى – پرەمەرا كۇنى بيلەت جەتپەي سىرتتا قالىپ قويعان حالىقتىڭ ىشتەگى كورەرمەننەن كوپتىگى. ونىڭ سەبەبى «فاريزا» سپەكتاكلىنىڭ نەگىزگى كورەرمەنى ونىڭ وقىرماندارى بولعاندىعىنان دەپ ويلايمىز. جالپى، فاريزانىڭ تاعدىرى – وقشاۋ تاعدىر. اسا تالانتتى اقىن بولا تۇرا، ءبىر باسىنا جەتەرلىك قاسىرەتى دە جەتەرلىك. ونى ايتۋدان مەن سەسكەنبەيمىن. ويتكەنى اقىن ءوزىنىڭ ولەڭدەرى ارقىلى بار سىرىن بۇكپەسىز ايتىپ كەتكەن عوي. سول قيىنداۋ تاعدىردىڭ قاتپارلارىن اشۋعا ۇمتىلعان دراماتۋرگ روزا مۇقانوۆانىڭ بۇل جۇمىسى كوڭىلدەن شىقتى. اقىن جانىنىڭ تەرەڭىن ۇڭعىعانى، دراما جەلىسىن بارىنشا بەينەلى قۇرۋعا ۇمتىلعانى ۇنادى.
قويىلىمداعى ءبىزدى ەلەڭ ەتكىزگەن تاعى ءبىر دۇنيە – ول ارينە دراماتۋرگياعا نەگىزدەلگەن رەجيسسەرلىك قولتاڭبا. رەجيسسەردىڭ سول ايرىقشا قولتاڭباسى فاريزانى ويناپ جۇرگەن اكتريسانىڭ ءاربىر قيمىلىنان بايقالدى. فاريزا ومىردە قالاي جالعىز بولسا، ساحنادا دا سولاي جالعىز ءجۇردى. ءبىز كورگەن فاريزا – جالعىزدىعىمەن بەتپە-بەت كەلگەن دارا فاريزا. اقىننىڭ وسى كۇيىن بەرۋدەگى رەجيسسەردىڭ قولدانعان كوركەمدىك شەشىمى مەن ەرەكشە ستيليستيكاسى سپەكتاكلدىڭ ءون بويىنان ايقىن سەزىلىپ تۇردى. وسى تۇرعىدان كەلگەندە جاس رەجيسسەر فارحات مولداعالي دراماتۋرگ روزا مۇقانوۆاعا ءوز دەڭگەيىندە جاقسى تەڭاۆتور بولدى دەپ ەسەپتەيمىن. ياعني اۆتورلىق شەشىم رەجيسسەرلىك وقۋمەن ءساتتى ۇندەسكەن تاماشا جۇمىستىڭ كۋاسى بولدىق.
دراماتۋرگياداعى سەڭدى بۇزدى
امانكەلدى مۇقان، تەاترتانۋشى:
– اكتەرلىك ويىن، ساحنالىق شەشىمگە توقتالماستان بۇرىن، مەن ەڭ اۋەلى دراماتۋرگيا جايلى ءسوز قوزعاعىم كەلەدى. ويتكەنى روزا مۇقانوۆانىڭ «فاريزاسى» بۇگىنگى دراماتۋرگيا زاڭدىلىقتارىنا جاۋاپ بەرەتىن شيەلەنىسى شيراق، تارتىسى تەرەڭ شىن مانىندە جوعارى دەڭگەيلى پەسا بولعان. وزدەرىڭىز بىلەتىندەي، بىزدەگى تۇلعا جايىندا جازىلاتىن شىعارمالاردىڭ كوپشىلىگى فاكتولوگياعا قۇرىلادى عوي. ونداي سپەكتاكلدەردەن كوركەم ساحنالىق تۋىندى تاماشالاپ ەمەس، تۇلعا جايلى دەرەكتى جۋرنالدى پاراقتاپ شىققانداي اسەردە قايتۋشى ەدىك. «فاريزانىڭ» ەڭ اۋەلى وسى سەڭدى بۇزعانى قۋانتتى. اۆتوردىڭ اقىن جانىنا ۇلكەن سۇيىسپەنشىلىكپەن ءھام جاناشىرلىقپەن كەلگەندىگى سەزىلەدى. فاريزا تاعدىرى ونسىز دا تارتىسقا، اڭىزعا تولى قىزىق تاعدىر عوي. ايتسە دە سونى بەرۋدەگى دراماتۋرگتىڭ كەيىپكەردى جارماق كەيىپكە ءتۇسىرۋى ۇنادى. ياعني فاريزا مەن تاعدىرى اراسىنداعى تارتىس وتە ءساتتى شەشىمدەردىڭ ءبىرى دەپ ەسەپتەيمىن. جالپى، پەسادا فاريزا ءرولىن قالاي اشام دەسەڭ دە مۇمكىندىك بەرەتىن شىعارماشىلىق كەڭىستىك مول. بىراق، وكىنىشكە قاراي، سونى رەجيسسەر تولىققاندى پايدالانا الماي قالعانداي كورىندى. سالدارىنان فاريزا بەينەسى ءبىرسارىندى ساراپتالعانداي اسەر ەتتى. ال جالپى العاندا، سپەكتاكل بار.
قازاقستان مەن قىتايدا ەكى ەلدىڭ مادەنيەت ورتالىقتارى اشىلادى
قازاقستان • كەشە
ەلوردادا جوندەۋ جۇمىستارىنا بايلانىستى جول جابىلادى
ەلوردا • كەشە
پولشادا قازاقستاننىڭ قۇرمەتتى كونسۋلدىعى اشىلدى
الەم • كەشە
ەرتەڭ ەلىمىزدىڭ باسىم بولىگىندە اپتاپ ىستىق بولادى
اۋا رايى • كەشە
بقو-دا كولدە اعىپ كەتكەن بالا ءۇش كۇننەن كەيىن تابىلدى
ايماقتار • كەشە
قانات تايمەردەنوۆ جاڭا قىزمەتكە تاعايىندالدى
تاعايىنداۋ • كەشە
ۇكىمەت باسشىسى قانت باعاسىن رەتتەۋدى تاپسىردى
ۇكىمەت • كەشە
ۇقك شەكارا قىزمەتىنىڭ ەكس-باسشىسى قاماۋعا الىندى
قوعام • كەشە
پرەزيدەنتتىڭ باق سالاسىنداعى سىيلىقتارى مەن گرانتتارى تابىستالدى
پرەزيدەنت • كەشە
پرەزيدەنت احقو باسقارۋشىسى قايرات كەلىمبەتوۆتى قابىلدادى
پرەزيدەنت • كەشە
ەلىمىزدە كوروناۆيرۋس جۇقتىرعانداردىڭ سانى ارتتى
كوروناۆيرۋس • كەشە
اقتوبە وبلىسىندا 6 ءىرى سۋ قويماسى سالىنادى
ايماقتار • كەشە
الماتى اكىمدىگىنىڭ قۇرىلىمى وزگەردى
ايماقتار • 24 ماۋسىم، 2022
ابيبا ابۋجاقىنوۆا «Grand Slam» تۋرنيرىندە قولا جۇلدە الدى
كۇرەس • 24 ماۋسىم، 2022
«AMANAT» – 2022 مەديا سىيلىعىنىڭ جەڭىمپازدارى انىقتالدى
قوعام • 24 ماۋسىم، 2022
وقيعا • 24 ماۋسىم، 2022
«ەگەمەن قازاقستان» گازەتىنىڭ ءتىلشىسى AMANAT مەديا سىيلىعىن يەلەندى
ەگەمەن قازاقستان • 24 ماۋسىم، 2022
«IQanat» قورى اۋىل وقۋشىلارىنىڭ ساپالى ءبىلىم الۋعا قولجەتىمدىلىگىن ارتتىرادى
ءبىلىم • 24 ماۋسىم، 2022
مادەنيەت قىزمەتكەرلەرىنىڭ جالاقىسى وسەدى
قوعام • 24 ماۋسىم، 2022
توقاەۆ سي تسزينپين ۇسىنعان جاھاندىق قاۋىپسىزدىك باستامالارىن قولدادى
پرەزيدەنت • 24 ماۋسىم، 2022
قاسىم-جومارت توقاەۆ ينفلياتسيانىڭ ءوسۋى وزەكتى ماسەلە ەكەنىن اتاپ ءوتتى
پرەزيدەنت • 24 ماۋسىم، 2022
الەمدە ازىق-ت ۇلىك ماسەلەسىنە قاتىستى جاعداي كۇردەلەنىپ كەتتى - توقاەۆ
پرەزيدەنت • 24 ماۋسىم، 2022
قاسىم-جومارت توقاەۆ بريكس+ ۇيىمىنىڭ جاھاندىق دامۋ جونىندەگى ديالوگىنا قاتىستى
پرەزيدەنت • 24 ماۋسىم، 2022
ۇلتتىق بانك ءرۋبلدىڭ نىعايۋ سەبەبىن ءتۇسىندىردى
ەكونوميكا • 24 ماۋسىم، 2022
قوستانايدا VII «بۇقارالىق سپورت وليمپياداسى» اياقتالدى
سپورت • 24 ماۋسىم، 2022
وزبەكستان تۇركى اكادەمياسى ۇيىمىنا باقىلاۋشى مارتەبەسىن الدى
قوعام • 24 ماۋسىم، 2022
ماۋلەن اشىمباەۆ: رەفورمالاردىڭ باستى ماقساتى – ادىلەتتى قازاقستان قۇرۋ
پارلامەنت • 24 ماۋسىم، 2022
پەتروپاۆلدا قازاقستان پوليتسياسىنىڭ قۇرداسى قىزمەت ەتەدى
ايماقتار • 24 ماۋسىم، 2022
پارلامەنت • 24 ماۋسىم، 2022
امەريكادا قوعامدىق ورىندا قارۋ ۇستاۋعا رۇقسات بەرىلدى
الەم • 24 ماۋسىم، 2022
فلوريدادا سۋ استىنا سۇڭگۋ كەزىندە ەكى ادام قايتىس بولدى
الەم • 24 ماۋسىم، 2022
شقو تۇرعىندارىنان مينا مەن قارۋ تاركىلەندى
ايماقتار • 24 ماۋسىم، 2022
بۇگىن الەمدە 400 مىڭعا جۋىق ادامنان كوروناۆيرۋس انىقتالدى
كوروناۆيرۋس • 24 ماۋسىم، 2022
پرەزيدەنت فيدە-ءنىڭ ەڭ جاس چەمپيونى ماليكا ءزياديندى قۇتتىقتادى
پرەزيدەنت • 24 ماۋسىم، 2022
انتيكور نۇرلان ءماسىموۆ تۋرالى مالىمەت ءۇشىن سىياقى جاريالادى
ANTIKOR • 24 ماۋسىم، 2022
72 جاستاعى قاريا ۇلىتاۋدان پاۆلودارعا دەيىن جاياۋ جۇرگەن
قوعام • 24 ماۋسىم، 2022
جەتى جاسار قازاقستاندىق شاحماتشى فيدە-ءنىڭ الەم چەمپيونى اتاندى
سپورت • 24 ماۋسىم، 2022
ۇقساس جاڭالىقتار