بوكس • 16 قىركۇيەك، 2019

الەم چەمپيوناتى ءساتتى باستالدى

43 رەتكورسەتىلدى

رەسەيدىڭ ەكاتەرينبۋرگ قالاسىندا بوكستان ەرەسەكتەر اراسىنداعى الەم چەمپيوناتى ءوتىپ جاتىر. ءدۇبىرلى دوداعا 91 مەملەكەتتەن كەلگەن 488 بىلعارى قولعاپ شەبەرى باق سىناۋدا. جاھاندىق جارىستىڭ ال­عاشقى اپتاسى قازاقستان قۇراماسى ءۇشىن ءساتتى ءوتتى. رينگكە كوتە­رىلگەن بارلىق بوكسشىلارىمىز جەڭىسكە جەتىپ، ەل مەرەيىن ۇستەم ەتتى.

حالىقارالىق وليمپيادا كو­مي­تە­­­تىنىڭ بىلتىرعى ەرەجەسى­نە ساي­كەس، بيىلعى الەم بىرىنشى­لىگى 8 سالماق دارەجەسىندە تۇڭعىش رەت وت­كىزىلۋدە. رەسەي بوكس فەدەرا­تسيا­سىنىڭ مالىمەتىنشە، الەم چەمپيوناتىنا قاتىسۋشىلار سانى دا رەكوردتى دەڭگەيگە جەتكەن.

الەم چەمپيوناتىندا ءبىز­دىڭ جىگىتتەر اراسىنان العاش­قى بو­لىپ رينگكە 81 كيلو سال­ماق دا­رەجەسىندەگى بەكزات نۇرداۋ­لەتوۆ كوتەرىلدى. ول وڭتۇستىك كو­رەيا­نىڭ وكىلى حونگ ينگپەن كۇش سىناستى. باسەكە باس­تالعان بەتتە قارسىلاسى ەكپىندەپ شابۋىلداعانىمەن، كوپ ۇزاماي قانداسىمىز ونى ساباسىنا ءتۇسىردى. ەكىنشى راۋند بەكزاتتىڭ ايقىن باسىمدىعىمەن وتسە، ءۇشىنشى راۋندتا كورەيالىقتى نوكداۋنعا جى­بەردى. وسىلايشا، تورەشىلەردىڭ بارلىعى دا قازاق بوكسشىسىنىڭ مىقتىلىعىن مو­يىندادى. گازەت بەتتەلىپ، باس­پاعا دايىندالىپ جاتقاندا بەك­زات ۆەنەسۋەلا وكىلى كوربا بار­رەرمەن كەزدەسىپ جاتقان بولاتىن. كەزدەسۋدىڭ ناتيجەسىن گازەتىمىزدىڭ سايتىنان بىلە الاسىز.

بەكزاتتىڭ جەڭىستى جولىن 63­ كيلو سالماقتاعى زاكير سا­­فيۋل­لين جالعادى. ول ال­عاش­­قى ىرىكتەۋ باسە­كەسىندە ازەر­باي­جاندىق باحتيار گازي­بەكوۆپەن كۇش سىنا­سىپ، تارتىستى جەكپە-­جەكتە تورەشىلەردىڭ ءبى­ر­اۋىز شە­شى­مىمەن جەڭىسكە جەتتى. اراعا ەكى كۇن سالىپ سافيۋللين ەكىن­­شى جەكپە-جەگىن وتكىزۋى ءتيىس ەدى. الاي­دا كانادالىق بوكسشى توماس بلۋمەنفەلد جاراقاتىنا بايلانىستى شارشى الاڭعا شى­عۋدان باس تارتتى. وسىلايشا، زاكىر الەم چەمپيوناتىنىڭ 1/8 اي­نالىمىنا بىردەن جولداما الدى. ەندى ول ەرتەڭ 2017 جىلعى الەم چەمپيونى كۋبالىق ەندي كرۋز گومەسپەن شيرەك فينالدىڭ جولداماسىن ساراپقا سالادى. 32 جاستاعى وتانداسىمىز بيىل ەكىنشى رەت الەم بىرىنشىلىگىنە قاتىسىپ جاتىر. 2015 جىلى قا­تار استاناسى دوحادا وتكەن باسە­كەدە ءبىرىنشى اينالىمدا سۇ­رىنگەن-ءدى.

جارىستىڭ التىنشى كۇنى ءۇش بوكس­شىمىز شارشى الاڭعا كو­تەرىل­دى. كۇندىزگى سەسسيادا 52 كي­لودا ونەر كورسەتەتىن وتان­­دا­سى­مىز ساكەن بيبوسىنوۆ موڭ­عو­ليا­لىق ەنحمانداح حار­حۋمەن جۇ­دىرىقتاسىپ، 3:2 ەسە­بىمەن باسىم ءتۇستى. ەكى سپورتشى الما-كەزەك سوق­قى جۇمساعان كەزدەسۋ تەڭ دارە­جەدە وتكەن بولاتىن. كەزدەسۋ بارىسىندا ءسال عانا باسىمدىق تا­نىتقان بي­بوسىنوۆتى تورەشىلەر جەڭىسكە لايىق دەپ تاپتى.

75 كيلوداعى بوكسشىمىز تۇر­سىن­باي قۇلاحمەت چەح­ مي­لوش بارتلمەن شارشى­ الاڭ­دا كەزدەسىپ، وتانداسىمىز اي­قىن­ باسىمدىقپەن جەڭىسكە جەت­تى.­ جەكپە-جەك بارىسىندا تۇر­سىن­باي چەحيالىق بوكسشىعا ايلا قالدىرعان جوق. ەكىنشى راۋند­تا قار­سىلاسىن نوكداۋنعا جى­بەرىپ تە ۇلگەردى. اۋىر ءارى نىق سوق­قىلا­رىن­ جاۋدىرعان قازاق­ستاندىق بوكس­­­­شىنىڭ جەڭىسىنە تورەشىلەر دە­ كۇمان كەلتىرگەن جوق. قازىلار ءبى­ر­­اۋىزدان تۇر­سىن­باي قۇلاحمەتتى جەڭىمپاز دەپ تانىدى.

جەكسەنبى كۇنى 2017 جىلعى الەم چەمپيونى قايرات ەراليەۆ (57 كگ) پەن ۆاسيلي لەۆيت (91 كگ­) العاشقى جەكپە-جەكتەرىن وت­كىز­دى. ەراليەۆ 52 كيلو سال­ماق­تا ريو وليمپياداسىنىڭ كۇ­مىس جۇل­دە­گەرى اتانعان يوەل في­نول­مەن جۇدىرىقتاستى. ال 91 كي­لو­عا دە­يىنگى سالماقتا ۆاسيلي لە­ۆيت سلو­ۆاكيالىق داۆيد مي­حاي­­ليكپەن كەزدەستى. بۇل كەز­دەسۋ­لەر­­دىڭ تولىق ناتيجەسىن egemen.kz سايتىنان بىلە الاسىز.

سونداي-اق بۇگىن ابىلايحان ءجۇسىپوۆ (69 كگ) تايلاند بوكس­شى­سى ۆۋتتيچاي ماسۋكپەن جۇ­دىرىقتاسادى. 29 جاستاعى ماسۋك وتە تاجىريبەلى بوكسشى. 2015 جى­لى الەم چەمپيوناتىنىڭ قولا جۇل­دەسىن جەڭىپ السا، 2009 جانە 2015 جىلدارى ازيا چەمپيوناتىندا توپ جارعان. ال اسا اۋىر سالماقتاعى قام­شىبەك قوڭ­قاباەۆ گادفا دريس­سي (يس­­پانيا)، بەلبەروۆ پەتار رۋ­مەنوۆ (بولگاريا) جۇبىنىڭ جەڭىم­پازىمەن قولعاپ تۇيىستىرەدى.

سوڭعى جاڭالىقتار

ۇقساس جاڭالىقتار