ساڭلاقتار اتوي سالادى

ەلوردا تورىندەگى كەڭ ساراي «بارىس-ارەنا» ستاديونىندا ءوتىپ جاتقان چەمپيوناتتىڭ اشى­لۋ سالتاناتىنا قاتىسىپ, ەلىمىز اتىنان ءسوز سويلەگەن پرەمەر-ءمينيستردىڭ ورىنباسارى بەردىبەك ساپارباەۆ, اتالعان چەمپيوناتتىڭ ەلوردامىزدا ءوتۋى تەگىن ەمەس, ويتكەنى, قا­زاق بالۋان دەسە ىشەر اسىن جەر­گە قوياتىن حالىق. سوڭعى بەس جىلدا ەلباسى نۇرسۇلتان نا­زار­باەۆتىڭ باستاماسىمەن 5 مىڭ­عا تارتا سپورت نىسانى سا­لىنعانىن جەتكىزىپ, جارىستىڭ قۇرمەتتى قوناعى, بىرىككەن كۇرەس الەمىنىڭ باسشىسىنا العىسىن جەتكىزسە, چەمپيوناتتىڭ  قۇرمەت­تى قوناعى  بىرىككەن كۇرەس الە­مى­نىڭ باسشىسى, حالىقارالىق وليم­پيادا كوميتەتىنىڭ مۇشەسى نەناد لالوۆيچ «ۇيىمداستىرۋ جۇمىسى كوڭىلىمىزدەن شىقتى. وتكەن جىلدارداعى  پاريج بەن بۋداپەشتە ۇيىمداستىرىلعان الەم چەمپيوناتىمەن دەڭگەيلى جارىس وتەرىنە بەك سەنىمدىمىن», دەدى. 

اتالعان چەمپيوناتتى گرەك-ريم بالۋاندارى باستادى. جارىس باستالماي تۇرىپ ءباسپاسوز ءماسليحاتىندا پىكىر بىلدىرگەن داڭقتى بالۋان داۋلەت تۇرلىحانوۆ: «گرەك-ريم كۇرەسىنەن الەم چەمپيوناتىنان التىن الما­عانىمىزعا 20 جىلدان اسىپتى. جارىستىڭ جۇلدەسى جايلى ايتسام, بەس مەدال الامىز با دەگەن ءۇمىتىمىز بار. وليمپيادا ليتسەنزياسىنا كەلەر بولساق, باپكەرلەر قۇرامىنا كەمىندە 3 جولداما الۋ مىندەتى جۇكتەلىپ وتىر» دەگەن بولاتىن.

داۋلەت بولات ۇلى ءۇمىت ارتىپ وتىرعان گرەك-ريم كۇرەسى ەرەجە بويىنشا 10 سالماق دارە­جەسىنە ءبولىنىپ, وسىلاردىڭ ىشىنەن: 55, 63, 72, 82  كيلو سال­ماقتا بەلدەسەتىن بالۋاندارعا وليمپيادالىق جولداما بەرىلمەيتىن بولىپتى. قالعان التى سانات 60, 67, 77, 87, 97, 130­ كيلو سالماق بويىنشا كۇ­رە­­سەتىن سپورتشىلار چەمپيونات جۇلدەسىمەن قاتار, جولداما ءۇشىن دە جان بەرىپ, جان الىسادى. ناقتىلاپ ايتقاندا, ءى, ءىى ورىندارمەن قاتار, ەكى ءىىى جانە ەكى V ورىن, بارلىعىن قوسقاندا 6 ورىنعا جولداما بار. بۇل ءتارتىپ ەركىن كۇرەس شەبەرلەرىنە دە ورتاق.

سونىمەن ءوز ەلىمىزدە جالاۋىن كوتەرگەن الەم بىرىنشىلىگىنىڭ ەڭ جەڭىل ساناتى 55 كيلوعا دەيىنگى سالماقتا ەل نامىسىن قورعاعان گرەك-ريم كۇرەسىنەن اسكەريلەر ارا­سىندا الەم چەمپيونى, وتكەن جىل­عى ازيا بىرىنشىلىگىنىڭ قولا جۇل­دەگەرى قورلان جاقانشا جارىستى ءساتتى باستادى. ول ءبىرىنشى قار­سىلاسى الجيرلىك فەرگات اب­دەلكاريمدى 11:5 ەسەبىمەن ەركىن ۇتىپ, شيرەك فينالدا اقش بالۋا­نى نوۋري ماكستى 3:2 ۇپايمەن جەڭىپ, جارتىلاي فينالعا شىقتى. جارتىلاي فينالدا وتكەن جىلى بۋداپەشتەگى بىرىنشىلىكتە الەم چەم­پيونى اتانعان ازەربايجاندىق ەلدەنيز ازيزليدى 11:5 ەسەبىمەن ويسىراتا ەڭسەرىپ, فينالدىق بەلدەسۋگە ەركىن جەتتى. قورلان ءىنىمىز ەندى التىن مەدال ءۇشىن الەم جانە ەۋروپا چەمپيوناتىنىڭ قولا مەدال جۇلدەگەرى گرۋزين بالۋانى نۋگزاري تسۋرتسۋميامەن بەلدەسەدى.

ال 63 كيلودا باق سىناعان الەم چەمپيوناتىنىڭ ءۇش دۇركىن جۇلدەگەرى, قۇراما كاپيتانى المات كەبىسپاەۆ العاشقى كەزدەسۋدە ۇندىستاندىق قارسىلاسى س.ساگاردى وڭاي جەڭىپ, ەكىنشى بەلدەسۋىندە قىتايلىق اسا قارۋلى بالۋان ەرباتۋ تۋونى 2:1 ەسەبىمەن زورعا ۇتتى. ءۇشىنشى بەلدەسۋدە الەم بىرىنشىلىگىنىڭ قولا جۇلدەگەرى تۇركيالىق راحمان ءبيليجيدى 7:4 ەسەبىمەن جەڭىپ, جارتىلاي فينالعا جولداما الدى. وكىنىشتىسى, فينال­دىق كەزەڭ ءۇشىن بولعان باسەكەدە ريو وليمپياداسىنىڭ كۇمىس جۇل­دەگەرى جانە 2018 جىلعى ازيا ويىن­دارىنىڭ چەمپيونى جاپون جىگى­تى شينوبۋ وتادان جەڭىلىپ, جۇبانىش بەلدەسۋدى قاناعات تۇتۋعا ءماجبۇر بولدى.

سول سياقتى 72 كيلو سالماقتا ونەر كورسەتكەن 2017 جىلعى الەم بىرىنشىلىگىنىڭ كۇمىس جۇلدەگەرى جۇرت ءۇمىت كۇتكەن بالۋاننىڭ ءبىرى دەمەۋ جادىراەۆ ءبىرىنشى بەلدەسۋىندە پالاۋلىق قارسىلاسى ج.تاركونگتەن 9:0 ەسەبىمەن باسىم ءتۇسىپ, كۇرەستى مەرزىمىنەن بۇرىن اياقتادى. الايدا ەكىنشى كەزدەسۋىندە گەرمانيالىق بالۋان مايكل ۆيدمايەر 4:3 ەسەبىمەن جەڭىلىپ, جارىس جولىنان شىعىپ قالدى. 

ال 82 كيلو سالماقتا ەل نامىسىن قورعاعان 2017 جىلعى ازيا چەمپيونى  ماقسات ەرەجەپوۆ ءبىرىنشى بەلدەسۋدە جاپون جىگىتىن تولىق ەڭسەرىپ, ەكىنشى كەزدەسۋىندە بەلورۋسسيالىق قارسىلاسى, وتكەن جىلعى الەم چەمپيوناتىنىڭ قولا جۇلدەگەرى ۆيكتور ساسۋنوۆسكيدى 2:1 ەسەبىمەن جەڭىپ, سەنساتسيالىق وقيعا تۋدىردى. ءۇشىنشى كەزدە­سۋىندە ازەربايجان سپورتشىسى – 2011 جىلعى ەۋروپا چەمپيونى رافيك گۋسەينوۆپەن كەزەكتى بەلدەسۋىندە جاراقاتى سالدارىنان جارىستى اياقتاي الماي, كىلەمدى تاستاپ شىقتى. بىراق ازەر­بايجاندىق سپورتشى فينالعا شىققاندىقتان ەرەجەپوۆكە جۇ­بانىش بەلدەسۋگە جول اشىلدى.

جارىستىڭ كەلەسى كۇنى وليم­پيادالىق 6 سالماقتىڭ ۇشەۋى: 67, 87, 97 كيلودا كۇرە­سەتىن 117 بالۋان اراسىندا ليتسەنزيالىق جارىس جالعاستى. قازاق بالۋاندارى اراسىنان 87 كيلو سالماق دارەجەسىندە العاشقى بولىپ كىلەمگە شىققان 2018 جىلى جاكارتادا وتكەن ازيا ويىندارىنىڭ قولا جۇلدەگەرى ازامات قۇستىباەۆ ءبىرىنشى بەل­دەسۋىنە ۆەنەسۋەلالىق لۋيس ابەن­دانونى 5:1 ەسەبىمەن ۇتىپ, ەكىن­شى بەلدەسۋىندە فرانتسۋز جىگىتى حاليس گيلمانونى 7:1 ۇپايمەن ەركىن جەڭدى. ءۇشىنشى بەلدەسۋىندە كۋبالىق گرەگوريچ دانيەلگە ەسە جىبەردى.

67 كيلو سالماقتا ەل ۇمىتىنە بالانىپ جۇرگەن بالۋان وتكەن جىلعى الەم چەمپيوناتىنىڭ قو­لا جۇلدەگەرى مەيىرجان شەرما­حانبەت العاشقى قارسىلاسى اقش بالۋانى كوۋلمەن ەلليستەن 10:2 ۇپايىمەن  ويسىراي ۇتىلىپ, كو­رەرمەننىڭ كوڭىلىنە كىربىڭ ءتۇسىر­دى. ءبىزدىڭ جىگىتتى جەڭگەن امەريكالىق ەكىنشى اينالىمدا بولگار بالۋانى دەيۆيد ديميتروۆتەن 5:0 ەسەبىمەن جەڭىلىپ, مەيىرجاننىڭ جۇبانىش بەلدەسۋگە دەگەن ءۇمىتى ءۇزىلدى.

97 كيلو سالماقتا ونەر كورسەت­كەن ازيا چەمپيوناتىنىڭ قولا جۇل­دەگەرى ەرۇلان ىسقاقوۆ ازەر­بايجاندىق بالۋان ورحان نۋ­ريەۆپەن جولى ءتۇيىسىپ, ونى 2:1 ەسەبىمەن جەڭگەنىمەن, كەلەسى كەزەكتە گرۋزين مەلياعا وڭباي ۇتىلدى.  وسىلاي جەكسەنبى كۇنى بەلدەسكەن جىگىتتەر جارامادى.

جارىس ودان ءارى جالعاسىپ, دۇي­سەنبىدە گرەك-ريم كۇرەسىنىڭ قالعان  60, 77, 130 كيلو سالماقتاعى بالۋاندارى كۇش سىناساتىن بولادى. بۇل سالماقتار بويىنشا م.ايناعۇلوۆ, ا.دىلمۇحانبەتوۆ, م.شادۋكاەۆ ۇشەۋى ەل نامىسىن قورعايدى.