قازاقستان • 13 قىركۇيەك، 2019

«ك ۇلىمسىرەڭىز! سىزگە ەرەكشە ادامدار قىزمەت ەتەدى»

70 رەتكورسەتىلدى

بۇل – ايرىقشا ءدامحانا. سەبەبى مۇندا سىزگە قىزمەت كورسەتەتىن جاپ-جاس قىز-جىگىتتەردىڭ ەشقايسىسى سويلەمەيدى. ءبىرى تۋعاننان، ەندى ءبىرى ءسابي شاعىنان قۇلاعىنىڭ مۇكىستىگى بار جاستاردىڭ باسىن قۇراعان، ماڭدايشاسىنا «ك ۇلىمسىرەڭىز! سىزگە ەرەكشە ادامدار قىزمەت ەتەدى» دەگەن جازۋى بار ءدامحانانىڭ تابالدىرىعىنان تولقي اتتايسىز.

نۇر-سۇلتان قالاسىنىڭ سەيفۋللين كوشەسىندەگى №9-ۇيدە ورنالاسقان، بۇرىن «جوڭعار قاقپاسى»، ودان كەيىن «3 زال» اتىمەن استانالىقتارعا بەلگىلى ءدامحانانىڭ اتاۋى «Emoji» بولىپ وزگەرگەنىنە كوپ ۋاقىت وتكەن جوق. ال ونىڭ «Emoji» اتالۋىنىڭ دا سىرى بار ەكەن. «بۇگىنگى زاماندا، اسىرەسە جاستار ءوزارا حابار الماسقاندا ءسوز ورنىنا ەموتسياسىن بىلدىرەتىن سمايلدار جولداۋ ادەتكە اينالعان. ال ەستىپ، سويلەي المايتىن ادامدار ءۇشىن سمايلدار الەمى جان دۇنيەدەگى، كوڭىلدەگى كۇيدى جەتكىزۋدىڭ ەڭ ءبىر قولايلى ءتۇرى، سوندىقتان دامحاناعا وسى اتاۋدى بەرۋدى دۇرىس كوردىك»، دەيدى ەmojiلىك قىز-جىگىتتەر.

ءدامحانا ەسىگىن اشپاستان بۇرىن ىشتەي دا­يىندالىپ، ك ۇلىمسىرەگەن كۇيى تۇتقانى تارتتىم. ىشتە اقىرىن عانا جانعا جايلى تيەتىن اۋەن ويناپ تۇر ەكەن. الدىمنان ك ۇلىم­سىرەگەنى جۇزىنە كورىك قوسقان جاپ-جاس قىز شىعىپ قولىمەن يشارات بەرىپ تورگە شاقىردى. كىرەبەرىستەگى باردان «سالاماتسىز با؟» دەگەن ءۇن شىققاندا پسيحولوگيالىق تۇرعىدا وعان دايىن بولماعان مەن ءسال توسىلىپ قالعانمىن. جۋرناليست ەكەنىمدى ايتىپ، ءدامحانا جۇمىسىمەن تانىس­تىراتىن ادامنىڭ بار-جوعىن سۇرادىم. سول ساتتە ىشكى بولمەدەن ك ۇلىمسىرەي شىققان ورتا جاستان اسىڭقىراعان ايەل ادام: – قازىر بالام كەلەدى، ۇيىمداستىرىپ جۇرگەن سول عوي، وعان دەيىن مىنا جەرگە وتىرىپ دەمالىڭىز، – دەگەن. – ءسىزدىڭ بالاڭىز با ەدى، وندا كەلگەنىنشە اڭگىمەلەسە تۇرايىق، – دەپ ول كىسىنى سوزگە تارتتىم.

– نەگىزىنەن سەمەي وڭىرىنەن بولامىز. اۋىلدا تۇراتىن ءسىڭلىمنىڭ بالاسى باقىتبەك قۇلاعىنىڭ مۇكىستىگىنە بايلانىستى سەمەيدە قولىمدا تۇرىپ، ارنايى مەكتەپكە باردى. سودان بالام ازامات ەكەۋى ق ۇلىن-تايداي تەبىسىپ بىرگە ءوستى، ودان تاڭداعان قىزىنا ۇيلەنەمىن دەگەندە دە ءۇي بولىپ، اياقتانۋىنا كۇش سالدىق. سوندىقتان دا ءوز اناسىنان گورى ماعان جاقىنداۋ. ونىڭ جان دۇنيەسىن مەن كوبىرەك ۇعىنامىن دەسەم ارتىق ەمەس. قازىر 3 بالاسى بار، بىراق جىعىلعان ۇستىنە جۇدىرىق دەگەندەي، سوڭعى ۋاقىتتا بۇيرەگى اۋىرىپ، دياليزگە قاراپ قالدى، ماتەريالدىق تۇرعىدا ءومىر ءسۇرۋى قيىنداپ كەتتى. ازاماتتىڭ ماماندىعى دارىگەر، الايدا وسى باۋىرىنىڭ پروبلەماسىن بۇگە-شىگەسىنە دەيىن تانىپ، ونىڭ وتباسىنا جانە وسى تارىزدەس جاندارعا كومەكتەسۋ ءۇشىن وسى جوبانى قولعا الدى. اشىلعانىمىزعا ەكى اي، شىنىن ايتقاندا كىرىسىمىزدەن شىعىن كوپ، مولىنان كرەديتكە كىردىك، بىراق شىدايمىز، اللا بۇيىرتسا ءىس قىلىپ شىعارامىز دەپ وتىرمىز، – دەدى ءوزىن ءلاززات دەپ تانىستىرعان ايەل.
ازامات كوپ كۇتتىرگەن جوق. ەڭبەك دەمالىسىندا بولعاندىقتان بار ۋاقىتىن وسى جۇمىسقا ارناپ جۇرگەن ول مەنىڭ ءوتىنىشىمدى ىقىلاسپەن قابىلدادى. «بۇل يدەيا ەمين اسكەروۆ اتتى كاسىپكەردىڭ بيزنەس-ترەنينگىنە قاتىسقاننان كەيىن تۋدى. انام ايتىپ بەرگەن شى­عار، الەۋمەتتىك ماڭىزى بار جوبانى قولعا الۋىم باۋىرىمنىڭ ەرەكشە جاعدايىنا باي­لانىستى. جۇمىستى باستاماستان بۇرىن باقىتبەك وزدەرىنىڭ چاتىندا وسىنداي ارنايى ءدامحانا اشۋ يدەياسى بارلىعىن جاريالادى. سودان بىردەن بىرنەشە جىگىت حابارلاسىپ، وسى مەيرامحاناعا كەلدىك. جۇمىسى توقتاپ، جابىلىپ قالعان سوڭ ءىشى ادام كورگىسىز ەكەن، بارلىق تازارتۋ، جوندەۋ جۇمىستارىن ءوز قولىمىزبەن جاسادىق. سول جىگىتتىڭ ءبىرى قازىر اسپاز»، دەپ اڭگىمەسىن باستادى ازامات.

3 زالى بار دامحاناعا كەلۋشىلەر قاتارى كوپ بولماعانىمەن، تاماقتانۋشىلاردىڭ كوڭىلدەرى جاي، ريزاشىلىقتارىن قيمىل­دارىمەن كورسەتىپ، قوشتاسىپ شىعىپ بارادى. كەلگەن ادامداردىڭ ۇستەل ءۇستىن باجايلاپ قاراعانىن اڭداپ، مەن دە زەرتتەۋگە كىرىستىم. اينەكتىڭ استىنا داياشىلارعا تاپسىرىس بەرۋ، باسقا دا قاجەتتىلىكتەردى سۇراۋدىڭ قول قيمىلدارى كورسەتىلگەن كومەكشى قاعاز قويىلعان ەكەن. كادىمگى تەلەديداردان كورسەتىلەتىن سۋردواۋدارما ءتارىزدى. – و باستا، دەيدى ازامات – داياشى بو­لۋعا ءبارى جۇرەكسىندى، سەبەبى ساۋ ادامدارمەن قارىم-قاتىناستا ءبىر-ءبىرىمىزدى تۇسىنبەي قالامىز دەگەن قورقىنىش بولدى. قازىر بويلارى ۇيرەندى، ەڭ باستىسى، وسىنداعى قىز-جىگىتتەردىڭ بارلىعى وزدەرىنىڭ قوعامعا قاجەت ەكەندىكتەرىن ءتۇسىندى. بويلارىنداعى الەۋمەتتىك كەدەرگىلەردى كۇندەلىكتى جۇمىس­تارى ارقىلى الىپ تاستاپ، وسى جەردەن ءوز ورىندارىن تاۋىپ جاتىر. اۋەلدە تەك ىدىس جۋامىن، وزگە جۇمىستان قورقامىن دەگەن قىزىمىزدىڭ قىزىعۋشىلىعى ويانىپ، كونديتەر بولدى. داياشى جىگىتىمىز اسپازدىققا يكەمى بارلىعىن اڭداپ، سونى يگەرىپ الدى. ارينە جاڭادان باستاپ جاتقاندىقتان قيىندىعىمىز كوپ. الدىمەن پسيحولوگيالىق تۇرعىدا كەدەرگىلەر تۋدى. ولاردى اتا-انالارى بالا كۇنىنەن مۇگەدەك دەپ ەسەپتەپ كوپ نارسەگە وزدەرى جۇگىرىپ، بالالارىنىڭ قوعامعا يكەمدەلۋىن شەكتەگەن. سوسىن مەملەكەت بىزگە مۇنشا جاردەماقى بەرۋى، ۇكىمەت كومەكتەسۋى ءتيىس دەگەن تۇسىنىك قالىپتاسقان. سولاردىڭ بارىنە دەگەن كوزقاراستارىنا وزگەرىس ەنگىزىپ، جۇمىسقا كەشىكپەۋدى، جاۋاپكەرشىلىكتى سەزىنۋدى، دايىندالعان استىڭ ءدامدى بولىپ، كەلگەن قوناقتىڭ كوڭىلىنەن شىعۋدىڭ قاجەت ەكەنىن بويلارىنا ءسىڭىرۋ ۇلكەن جۇمىس ەكەن. ال قازىر قاي-قايسىسىنىڭ دا كوزدەرىندە وتى جاندى، ءتىپتى جۇمىستى قالاي جاقسارتامىز دەگەن يدەيالارىن ايتىپ، زەيىن، ىقىلاستارىن سالادى. وسىنىڭ ءىشىن ارلەۋ مەن، ۇستەل ۇستىنە جابىلاتىن داستارقانعا دەيىن وزدەرى تىگىپ شىقتى. ون ەكى مۇشەسى ساۋ ادامداردان وسىنداعى قىز-جىگىتتەردىڭ باستى ەرەكشەلىگى – ولاردىڭ ەستىمەۋى ەمەس، وتىرىك ايتا بىلمەيتىن شىنايىلىعى دەر ەدىم. سول رەتتەن ءبىر جاعىنان ادال ادامدارمەن جۇمىس ىستەۋ وتە جەڭىل. ەكىن­شىدەن ۋادە بەردىڭ بە ورىنداۋعا ءتيىسسىڭ، ولار قالجىڭدى دا تۇسىنبەيدى، سوندىقتان نە ايتساڭ دا بارلىعىن اشىپ، باجايلاپ بەرۋىڭ كەرەك. كەيدە مىناداي قيىندىق بولىپ جاتىر دەسەڭ، جاندارى اشىپ تۇرىپ قابىلدايدى، شەشىلۋىن كۇتەدى.

ءدامحانادا بۇگىندە 18 ادام جۇمىس ىستەيدى. تەك ەكى بارمەن سويلەيدى، ال قالعاندارى قول قيمىلىمەن تۇسىندىرەتىن ىلعي ءبىر ورىمدەي، 20 جاسقا ەندى تولعان قىز-جىگىتتەر. قىزىل­وردادان، الماتىدان، اقتاۋدان، تەمىرتاۋدان دەيسىز بە، جان-جاقتان وزدەرىنىڭ ومىردەن جولىن تاپسام دەگەن ورەندەر. ءبىر قيىندىعى، كوبىنىڭ استانالىق تىركەۋى جوق. تۇراتىن جەرلەرى ارزان حوستەلدەر ەكەن. «نۇر-سۇلتان قالاسىندا تىركەلگەن 5 ادامعا بىزدەن گورى جەڭىل، ولاردىڭ تۇراتىن جەرلەرى بار، وعان قوسا قالالىق ەڭبەكپەن قامتۋ ورتالىعىنىڭ ەڭبەكاقىلارىنا قوسىمشا قوساتىن سومالارى بار. ەگەر ءبىزدىڭ نۇر-سۇلتان قالاسىنا تىركەلۋىمىز شەشىلسە، قالا تۇرعىندارى اراسىنان قولۇشىن سوزاتىن ادامدار شىقسا جاقسى بولار ەدى. نەگىزىنەن ءبىز وسى ماڭايدىڭ جۇرتشىلىعىنا ريزامىز، اشىلماي جاتىپ، ەكى ادام سىزدەرگە كومەگىمىز ءتيسىن دەپ ءبىر-ەكى شارالارىن وتكىزدى. ۇيلەرىنە تاپسىرىسپەن تاماق الدىرادى، ايت مەيرامى كەزىندە شەلپەك، باۋىرساق، تورت، بالىشتەر ءپىسىرتتى. سونىڭ بارلىعى ءبىز ءۇشىن ۇلكەن قۋانىش»، دەيدى كەيدە جازىپ، كەيدە سوزدەرىن اۋدارىپ بەرگەن ازاماتتىڭ قىزمەتىنە جۇگىنگەن جاستار.

ۇرجارداعى ءۇيىن، استىنداعى كولىگىن ساتىپ، سۇيگەن ماماندىعى دارىگەرلىككە قوسا الەۋمەتتىك ماڭىزى بار جوبانى اتقارىپ جۇرگەن ازاماتتىڭ ءوزى دە پاتەر جالداپ تۇرادى. «ايتپەسە ءوز ۇيىمە تىركەر ەدىم، بىراق كەز كەلگەن بيزنەستىك جوبا بىردەن ايدارىنان جەل ەسىپ كەتپەيتىنى ءتارىزدى ءبىز دە قازىر كليەنت­تەر جيىپ، ەلدەن العىس الىپ، جۇمىستى جولعا قويۋدى باستى ماقسات ەتۋدەمىز»، دەيدى نۇر-سۇلتان قالالىق ونكولوگيا ورتا­لى­عىنىڭ رەا­نيماتسيا ءبولىمىنىڭ دارىگەرى ازامات بازىلوۆ.

سوڭعى جاڭالىقتار

ەگەمەندىكتەر ەلگە شىقتى

قازاقستان • بۇگىن، 11:19

ەلوردا ورتالىعىندا اۆتوكولىك ورتەندى

قازاقستان • 15 قاراشا، 2019

ءباسپاسوز ءرولى – باستى ماسەلە

ادەبيەت • 15 قاراشا، 2019

قازاقستانعا شەتەلدىك بانكتەر كەلەدى

ەكونوميكا • 15 قاراشا، 2019

قوستاناي فيلارمونياسىنا 75 جىل تولدى

رۋحانيات • 15 قاراشا، 2019

جاڭا ۇلگىدەگى كولىكتەر

قوعام • 15 قاراشا، 2019

ۇقساس جاڭالىقتار