بايقاۋدىڭ العاشقى كەزەڭدەرى بۇعان دەيىن ساتىلى تۇردە بارلىق وڭىرلەردە ۇيىمداستىرىلىپ, وسى سىننان سۇرىنبەي ءوتىپ, ۇزدىك دەپ تانىلعان 15 وقىتۋشى-ۇستاز بيىل ەكىنشى رەت وتكىزىلىپ وتىرعان رەسپۋبليكالىق سايىستىڭ سوڭعى تۋرىنا جولداما العان ەكەن.
جينالعان كوپشىلىكتى بۇل رەتكى بايقاۋدىڭ ماڭىزى جايلى حاباردار ەتكەن ء«تىل-قازىنا» ۇلتتىق عىلىمي-پراكتيكالىق ورتالىعىنىڭ باسشىسى الىبەك اسقاردىڭ ايتۋىنا قاراعاندا, اتالعان بايقاۋدىڭ بەرەرى كوپ كورىنەدى. ناقتىراق ايتساق, قازاق ءتىلىن وقىتۋدىڭ يننوۆاتسيالىق ءادىس-تاسىلدەرىن انىقتاۋ, وقىتۋشىلاردىڭ كاسىبي بىلىكتىلىگىن ارتتىرۋ, ءوزارا تاجىريبە الماسۋ, ەرەسەكتەرگە قازاق تىلىنەن ساباق بەرۋدىڭ تىڭ ادىستەمەسىن جۇيەلەۋ, سونداي-اق وڭىردە جەڭىمپاز اتانىپ رەسپۋبليكالىق بايقاۋعا قاتىسىپ جاتقان قازاق ءتىلى وقىتۋشىلارىنىڭ ساباق بەرۋدەگى وزىق ۇلگىلەرىن ناسيحاتتاۋ ەكەن.
«اتالعان شارانى وتكىزۋدەگى ماقسات – قازاق ءتىل ءبىلىمىنىڭ اتاسى ا.بايتۇرسىن ۇلىنىڭ ەڭبەكتەرىندەگى عىلىمي-پەداگوگيكالىق ساباقتاستىقتى جالعاستىرۋ; قازاق ءتىلىنىڭ مەملەكەتتىك ءتىل رەتىندەگى قولدانىس اياسىن كەڭەيتۋ; قازاق ءتىلى جاناشىرلارى مەن ماماندار اراسىنداعى ۇزدىكتەردى انىقتاپ, ولاردىڭ ءتىل وقىتۋداعى جاڭاشىل ءادىس-تاسىلدەرىن كەڭ كولەمدە تاراتۋ» دەيدى قازىلار القاسىنىڭ توراعاسى, فيلولوگيا عىلىمدارىنىڭ دوكتورى شەرۋباي قۇرمانباي ۇلى.
ويتكەنى قازاق ءتىل ءبىلىمىنىڭ قاينار بۇلاعى وسى بايتۇرسىن ۇلىنان باستالادى. عالىمنىڭ قازاق ءتىلىن مەڭگەرتۋدەگى ادىستەمەسى بۇگىنگى ۇرپاققا باعا جەتپەس مۇرا. ۇلى ۇستاز ەڭبەكتەرى بۇگىنگە دەيىن ادىستەمەلىك جانە تىلتانىمدىق تۇرعىدان ءوز ءمانىن جويعان جوق.
سونىمەن ۇلى عالىم اتىنداعى سايىس ءۇش كەزەڭگە جىكتەلىپتى. ونىڭ العاشقىسى – قاتىسۋشى ءوز كۇشىمەن دايىنداعان وقۋ ماتەريالدارى مەن جەتىستىكتەرى جايلى بەينە تانىستىرىلىمىن كورسەتسە, ەكىنشى كەزەڭ – پەداگوگيكالىق-پسيحولوگيالىق جاعدايلارعا بايلانىستى تاپسىرما ورىنداۋ, ءۇشىنشى كەزەڭ – 20-25 مينۋت كولەمىندە ساباق بەرۋ ۇلگىسىن كورسەتۋ.
ءبىر قۋانارلىعى, جوعارىداعى رەت بويىنشا وزدەرىنىڭ ءبىلىمى مەن تاجىريبەسىن ورتاعا سالىپ, سايىسقان مامانداردىڭ دەنى 90-جىلدارى ومىرگە كەلگەن جاستار ەكەن.
اتام قازاق «جاس كەلسە – ىسكە» دەگەندەي, ايماقتان كەلىپ, ەلوردا تورىندە ءبىلىمى مەن تاجىريبەسىن جارىستىرعان قاتىسۋشىلار اراسىنان قوستانايلىق ۇستاز, رۋدنىي قالالىق تىلدەردى وقىتۋ ورتالىعىنىڭ قىزمەتكەرى جانات دوسىباەۆا باس جۇلدەنى جەڭىپ السا, ءى, ءىى, ءىىى ورىندارعا – استانالىق وقىتۋشى, رۋحانيات ورتالىعىنىڭ ءبولىم باسشىسى ەركەبۇلان ەربولات ۇلى, قاراعاندى وبلىسى تىلدەردى وقىتۋ ورتالىعىنىڭ ۇستازى مۇنيرا اعىمباەۆا, شىعىس قازاقستان وبلىسى لينگۆيستيكالىق ورتالىعىنىڭ مامانى اسەم مامىرانوۆا يە بولدى. سونداي-اق قىزىلوردالىق ۇستاز اسەل باقىتوۆا, جامبىلدىق اقبوتا تۇرسىنبەكوۆا جانە شىمكەنت قالاسىنان كەلگەن ءتىل مامانى ايسۇلۋ وسپانوۆاعا ىنتالاندىرۋ سىيلىعى بۇيىردى.
