جاقىندا جۋرنال رەداكتسياسىندا رەداكتور ۆلاديمير سكۆورتسوۆتىڭ شاقىرۋىمەن قوستانايلىق اقىن الەكساندرا سۋسلوۆانىڭ پيتەرلىك وقىرماندارىمەن شىعارماشىلىق كەزدەسۋى بولدى. كەش اۆتور ءۇشىن دە, سانكت-پەتەربۋرگتەگى ورىس ادەبيەتىنىڭ بەلگىلى تۇلعالارى ءۇشىن دە اسەرلى ءوتتى.
– كەشتەگى اڭگىمەمدى دە, ولەڭىمدى دە ءوزىمنىڭ قوس وتانىم تۋرالى باستادىم. مەن نەگىزى لەنينگرادتا تۋعان ەكەنمىن, بىراق قازاقستاندا تۋدىم دەپ ايتامىن. سەبەبى 60 جىل تۇرىپ جاتقان, بۇكىل بالالىق شاعىم وتكەن, ادام بولىپ, اقىن بولىپ قالىپتاسقان, وسكەن-ونگەن جەرىم بولعان سوڭ, قازاقستاندا تۋماي, قايدا تۋدىم دەپ ايتامىن؟!. كەشتە تاريحي شاھاردىڭ «سەن تۇر, مەن اتايىن» قالامگەرلەرى وتىردى. بۇل مەنى ودان سايىن تولقىتتى. مەن ولاردىڭ الدىندا قازاقتىڭ سەلەۋلى دالاسى, بايگە, جۋسان ءيىسى تۋرالى ولەڭدەرىمدى وقىدىم. مەنىڭ ولەڭدەرىمنىڭ بوياۋى دالانىڭ سامال جەلىن, جۋسان ءيىسىن, قازاق تۇلپارى تۇياعىنىڭ ءدۇبىرىن جۇرەكتەرگە جەتكىزە السا كەرەك, كوزىنىڭ جاسىن سۇرتكەندەردى دە بايقادىم, ءوزىم دە كوڭىلىمنىڭ ەركىنە, كوز جاسىما يە بولا المادىم, دەيدى الەكساندرا يلينيچنا. پيتەرلىكتەر قوستانايلىق اقىننىڭ شىعارماشىلىعى تۋرالى جىلى لەبىز ءبىلدىرىپ, اسەرلى كەشىن جاس اۆتورلارعا شەبەرلىك سىنىبى بولدى دەپ باعالاپتى. ول سانكت-پەتەربۋرگكە قۇرقول بارعان جوق ەدى, «سولنتسە نا رەسنيچكاح» اتتى بالالارعا ارنالعان ولەڭدەر مەن ەرتەگىلەر جيناعىن تارتۋ ەتتى. قوستانايلىق سۋرەتشىلەر الەكساندرا يلينيچنانىڭ بالالارعا ارنالعان شىعارمالارىنىڭ انيماتسيالىق نۇسقاسىن دا جاساعان بولاتىن. ول قوستانايداعى بالاباقشالاردا پايدالانىلىپ تا ءجۇر.
– بالانىڭ وتانعا, اتا-اناعا, تۋعان جەرگە دەگەن ادامگەرشىلىك تانىمى كىشكەنتايىنان قۇلاعىنا سىڭگەن ولەڭدەرمەن قالىپتاسادى. سوندىقتان بالالارعا ارنالعان شىعارمالارعا وتە جاۋاپكەرشىلىكپەن قاراۋىمىز قاجەت. ءاربىر شۋماق بالانى «جاقسى دەگەن نەمەنە؟ جامان دەگەن نەمەنە؟» دەگەن سۇراقتارعا جاۋاپ ىزدەپ, ويلاندىراتىن بولۋى ءتيىس عوي, دەيدى الەكساندرا يلينيچنا. اقىننىڭ بالالار ادەبيەتىنە جاقىندىعى تەگىن ەمەس. الەكساندرا سۋسلوۆا – وبلىستاعى ايتۋلى پەداگوگ. نەشە جىلدان بەرى پەداگوگيكا كوللەدجىندە باستاۋىش سىنىپ مۇعالىمىن دايىنداپ كەلەدى.
– ولەڭدەرىم قازاق تىلىنە اۋدارىلسا ەكەن دەپ ارماندايمىن. مەنىڭ پاتريوتتىق سەزىمگە سۋارىلعان ولەڭدەرىم قازاق ءتىلدى وقىرمان كوڭىلىنەن دە ءوز ورنىن تابارىنا سەنەمىن, دەيدى الەكساندرا يلينيچنا.
قوستاناي
