ەلبرۋس تاۋىن باعىندىرۋ ءۇشىن 30 قازاقستاندىق ورال قالاسىنان تامىز ايىنىڭ 28-ءى كۇنى جەڭىل كولىكپەن اتتانعان. كاباردين – بالقار رەسپۋبليكاسىنا جەتكەننەن كەيىن ولار اۋەلى چەگەم تاۋىنا, كەيىن «105-ءنشى پيكەت» شىڭىنا شىعىپ, كليماتقا بەيىمدەلۋ شارالارىنان وتكەن.
– العاشقى كۇندەرى اراعا كۇن سالىپ, تىنىعىپ, 3000 مەتردىڭ شاماسىنداعى بيىكتىكتەرگە شىعىپ, كەرى ءتۇسىپ جاتتىعىپ جۇردىك. تاۋعا شىققان ءۇشىنشى كۇنى توبىمىز 5100 مەتر بيىكتىككە كوتەرىلدى. وسى كۇن اۋەسقوي الپينيستەردىڭ كوبىنە قيىن سوقتى. اۋا قىسىمىنىڭ قاتتى بولۋىنان جۇرەك اينۋ, لوقسۋ باستالدى.
تاۋدىڭ شىڭىنا شىعۋعا 10 ساعاتتىڭ ۇستىندە ۋاقىتىمىز كەتتى. كوماندانىڭ 13 مۇشەسى عانا بۇل بيىككە جەتتى. ەلبرۋستى باعىندىرۋداعى باستى ماقساتىم – ءوزىمدى سىناپ كورۋ بولدى, – دەيدى يساتاي تەمىرباەۆ.
ايتا كەتەيىك, يساتاي تەمىرباەۆ – سالاماتتى ءومىر سالتىن ۇستاناتىن جانداردىڭ ءبىرى. ورال قالاسىنداعى «UralskRuns» جۇگىرۋشىلەر توبىنىڭ مۇشەسى رەتىندە ءتۇرلى مارافوندارعا دا تۇراقتى قاتىسىپ تۇرادى.
باۋىرجان شيرمەدين ۇلى,
باتىس قازاقستان وبلىسى,
سىرىم اۋدانى
