جازۋشى, ولكەتانۋشى كامەل جۇنىستەگى ارقا كۇي ونەرىنىڭ سوڭعى موگيكاندارىنىڭ ءبىرى بەگىمسال ورىنبەك ۇلىن وتكەن عاسىردىڭ 50-ءشى جىلدارىنىڭ ىشىندە العاش كورگەنىن, سول ءبىر وتىرىستا كۇيشىنىڭ ءجۇز شاقتى كۇي تارتقانىن ايتادى. «امال نەشىك, ول كەزدە تاسپاعا جازىپ الاتىن مۇمكىندىك بولماپ ەدى», دەپ سان سوعادى وتكەندى ەسىنە الىپ جازۋشى.
كەيىن مولشەرمەن 10 جىلداي ۋاقىتتان كەيىن بەگىمسال كۇيشىنى قايتا ىزدەپ بارعان كامەل جۇنىستەگى شەرتپە كۇي شەبەرىنىڭ ورىنداۋىنداعى شامامەن 10-عا تارتا كۇيدى ماگنيتوفون تاسپاسىنا جازىپ العانىن جانە ول مۇرانىڭ قازىر ءوزىنىڭ جەكە قورىندا ساقتاۋلى تۇرعانىن ايتادى.
اتاقتى كۇيشى ابىكەن حاسەنوۆ بەگىمسالدىڭ ونەرىن ايرىقشا باعالاعان ەكەن. كۇيشىنى وزىمەن بىرگە الماتىعا الىپ تا كەتپەك بولعان كورىنەدى. الايدا كۇيبەڭ تىرلىك ەتەكتەن تارتىپ, اسقان دارىن يەسى اۋىلدا قالىپ قويعان. ايتا كەتۋ كەرەك, قىزداربەك, ابىكەن حاسەنوۆ, بەگىمسال, قازاقتىڭ كلاسسيك كومپوزيتورى سىدىق مۇحامەدجانوۆ ءبارى ءبىر اتانىڭ بالالارى.
– كۇيشى اكەمىزدىڭ بالالارى قاراعاندىعا كوشىپ كەتتى دە, دومبىرا مەنىڭ قولىمدا قالدى. اسپاپتى شەبەر قولداردىڭ جاساعانىنا داۋ جوق, ءالى كۇنگە دەيىن سىنىن بۇزباعان. ۇساق مالدىڭ ىشەگىنەن جاسالعان شەكتەرى بولاتىن, قازىر ول جوق, ءشىرىپ ءتۇسىپ قالعان, – دەيدى مۇراتجان.
كۇيشىنىڭ كيەلى دومبىراسىن كوزىنىڭ قاراشىعىنداي ساقتاپ كەلە جاتقان مۇراتجان ابدىكەن ۇلى ۇزاق جىلداردان بەرى تەمىر جول سالاسىندا جۇمىس ىستەيدى. ونىڭ ۇلكەن اكەسى قوڭقىش دەگەن كىسى بەگىمسال كۇيشىمەن ءبىر تۋىسادى.
قاراعاندى وبلىسى,
شەت اۋدانى,
كيىكتى اۋىلى
