بالا كەزىنەن ەڭبەكتىڭ قادىرىن ءبىلىپ, مەكتەپتەگى وقۋىن ۇقىپتىلىقپەن ءتامامداپ, بولاشاعىن ءوندىرىس سالاسىنان ىزدەپ, تەحنيكا جاعالاپ, ەڭبەك جولىن جەرگىلىكتى اۋداننىڭ ەلەكتر بايلانىس جۇيەسىندە ءۇش-ءتورت جىل جۇمىسشى-ەلەكترمونتاجداۋشى بولىپ باستاعان. ورتا مەكتەپتى بىتىرگەن سوڭ دۇنيەگە اپپاق ءمولدىر سەزىممەن, اشىق سەنىممەن قاراعان بالا جىگىت ناعىز ءومىر ەڭبەك ۇجىمىندا ەكەنىن, ادامدارمەن قارىم-قاتىناستا بولۋدىڭ, ارالاستىقتىڭ, سىيلاستىقتىڭ, ادالدىقتىڭ قاسيەتىندە جاتقانىن تەرەڭنەن ءتۇسىنىپ, ومىرگە قۇشتارلىعى ارتا تۇسكەن. اقىرى جوعارى وقۋ ورنىندا ارنايى ءبىلىم الىپ, قۇرىلىسشى-ينجەنەر ماماندىعىن يگەرىپ, ون جىلدان استام اۋدان, وبلىستىق قۇرىلىس ترەستەرىنىڭ باس ينجەنەرى قىزمەتتەرىن ابىرويمەن اتقارىپ جۇرگەندە, ءوڭىر باسشىلارى وبلىس ورتالىعى اتقارۋ كوميتەتى توراعاسىنىڭ ورىنباسارلىعى قىزمەتىنە شاقىرعاندا, ءوزىنىڭ قۇرىلىسشىلار ورتاسىنان كەتكىسى كەلمەپ ەدى.
سول كەزدەگى وبلىس باسشىسى مۇستاقىم ءبىلال ۇلى يقسانوۆتىڭ: «قاراعىم, جاقسى مامان ەكەنسىڭ, ەلدىڭ قامىن ويلايتىن باسشىلىق قىزمەتتەرگە سەندەي – شارۋانى بىلەتىن, ۇيىمداستىرۋ قابىلەتى وزىق, ادام تۇرمىسىنا جاناشىرلىق كورسەتەتىن, قۇرىلىستى ۇيىمداستىرۋ مەكتەبىنەن وتكەن ادال ادامدار كەرەك. كەزىندە مەن دە قۇرىلىسشى بولعانمىن. ترەستىڭ قىزمەتى ۇلكەن بولعانىمەن, ول ءبىر سالا. ەندى بۇكىل قالانىڭ بارلىق تۇرمىسىنا جاۋاپ بەرەتىن بولاسىڭ. سەندەردىڭ بىلەك سىبانىپ جۇمىس ىستەيتىن كەزدەرىڭ. كەل», دەگەن اعالىق, اقىلگوي – قامقورلىق سوزىنەن اتتاي المادى.
تاجىريبەلى, ىسكەر ۇيىمداستىرۋشى, ۇزاق جىلدار رەسپۋبليكا, وبلىستار باسشىسى بولعان كورنەكتى مەملەكەت قايراتكەرى مۇستاحىم ءبىلال ۇلىنىڭ تىكەلەي قامقورلىعىن, تاربيەسىن كورىپ, كوپ جاڭالىقتى ۇيرەندى. ىسىلدى. كەمەلدەندى. ءوستى. ءورىسى كەڭىدى.
«جاس كەلسە – ىسكە» دەمەكشى, ول كەزدە 280 مىڭنان استام تۇرعىنى بار باتىس قازاقستان وبلىسىنىڭ ورتالىعى – ورال قالاسى باسشىسىنىڭ ورىنباسارى, باسشىسىنىڭ ءوزى بولىپ ون ءبىر جىل قىزمەت ىستەگەن جىلدارىن قابەكەڭ ەرەكشە جىلىلىقپەن, قيماستىقپەن ەسكە الادى. شىنىندا دا, «وتىزىندا وردا بۇزار, قىرقىندا قامال الار» شاعىندا كۇن-ءتۇن دەمەي, قالا تۇرمىسىن قالاي جاقسارتامىن دەپ قاجىماي-تالماي ەل ءۇشىن ايانباي ەڭبەك ەتكەن جىلدارى ەرەكشە جانىنا جاقىن ەكەنىن دە ايتادى.
مەملەكەتتىك تاۋەلسىزدىگىمىزدىڭ ەڭ قيىن العاشقى جىلدارى وبلىستىق قالاداعى ەرەن ەڭبەگى جوعارى باعالانىپ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ قابيبوللا قابەن ۇلىنا زور سەنىم كورسەتىپ, ونى باتىس قازاقستان وبلىسىنىڭ اكىمى ەتىپ تاعايىندادى. ءبىزدىڭ مەملەكەتىمىزدىڭ تاۋەلسىزدىگى جاريالانىپ, بۇرىنعى كەڭەس وداعى ىدىراپ, بۇكىل ەكونوميكالىق, ساياسي جۇيە كۇيرەپ, ءوندىرىس ورىندارى ونىمدەرىن توقتاتىپ, جۇمىسسىزدىق جايلاپ, ەلدىڭ تۇرمىسى مەيلىنشە تومەندەپ, بۇكىل قوعام داعدارىسقا ۇشىراپ تۇرعان, سۇراعى, كۇمانى كوپ, جاۋابى جوق كەزەڭ ەدى سول جىلدار.
قابەكەڭ ورال قالاسىنىڭ, ودان وبلىس اكىمى بولعان 1989-2001 ارالىعىندا 13 جىل سول كەزدەگى وداق, رەسپۋبليكا كولەمىندە دەندەگەن ەكونوميكالىق جانە ساياسي كۇيزەلىستىڭ ەڭ اۋىر شاعىندا ەلدى ىزدەنىسكە ۇيىمداستىرىپ, جاپپاي جۇمىسسىزدىققا جول بەرمەۋگە جۇمىستانىپ, كاسىپورىنداردى مودەرنيزاتسيالاۋمەن كۇن دەمەي, ءتۇن دەمەي شۇعىلداندى. ءوندىرىس بولماعان سوڭ, ارينە ءونىم جوق. ءونىم بولماعان سوڭ – قارجى جوق. قارجى جوق جەردە سالىق تولەۋ, اياعى – بيۋدجەت جوق. بيۋدجەت بولماعان سوڭ جالاقى, زەينەتاقى جوق – ءبىر-بىرىمەن ۇشتاسىپ, تۋىنداپ, جالعاسىپ جاتقان دۇنيە. سونداي اۋىر جاعدايلاردا ەلدىڭ, قوعامنىڭ جاۋاپكەرشىلىگىن ءوز موينىنا الىپ, ەلدىڭ تۇرمىس الەۋەتىن ۇيىمداستىرىپ, مەملەكەت مۇددەسىن قورعاي ءبىلۋ دە اركىمنىڭ قولىنان كەلە بەرەتىن ءىس ەمەس ەكەندىگى كوپكە بەلگىلى.
قابيبوللا قابەن ۇلى جوعارىداعىداي سىندارلى كەزەڭدەردە جۇرتپەن بىرگە قوعامنىڭ قيىن تۇيىندەرىن شەشۋگە باتىل ءارى بىلىكتىلىكپەن ارالاسا العان قايراتكەر بولا الدى. قانداي قيىن جاعدايلاردا ەلمەن اشىق اڭگىمەلەسىپ, تەك قيىندىقتاردى تۇسىندىرۋمەن شەكتەلمەي – سول قيىندىقتار مەن قايشىلىقتاردى ەڭسەرۋ جولدارىن ۇسىنىپ, وعان قوعامنىڭ قولداۋىن, ادامداردىڭ بەلسەندى تۇردە قاتىناسۋىن قامتاماسىز ەتۋگە ايرىقشا كۇش سالدى. حالىقتى ەلىمىزدىڭ تۇڭعىش پرەزيدەنتىنىڭ رەفورمالارىن جۇزەگە اسىرۋعا جۇمىلدىرىپ, جاڭا ەكونوميكالىق جۇيە قالىپتاستىرۋدا تولاسسىز ءارى ناتيجەلى ەڭبەك ەتكەنىنىڭ ايعاعى رەتىندە نۇرسۇلتان نازارباەۆتىڭ قابەكەڭنىڭ ەڭبەگىنە باعا بەرگەن مىنا سوزدەرىنە نازار اۋدارساق تا جەتكىلىكتى: ء«سىز ەڭبەك جولىڭىزدى قاراپايىم قۇرىلىسشى-ينجەنەردەن باستاپ, ەل ۇكىمەتى قۇرامىندا جاۋاپتى قىزمەتتەر اتقاردىڭىز. مەملەكەتتىك باسقارۋ ورگاندارىندا ۇزاق ۋاقىت ەڭبەك ەتىپ, ونىڭ ىشىندە سەگىز جىل بويى وبلىس اكىمى قىزمەتىندە باتىس ءوڭىردىڭ ەكونوميكاسى مەن الەۋمەتتىك سالاسىن دامىتۋعا ەلەۋلى ۇلەس قوستىڭىز», دەپ باعالاپتى ەلباسى.
سول جىلدارى ءوندىرىس ورىندارىن, ساۋدا سالالارىن جەكەشەلەندىرۋ دە قاتار جۇرگىزىلدى. بۇل – ءبىزدىڭ تۇرمىسىمىزدا بۇرىن بولماعان بەيمالىم جاڭالىق بولعانى دا راس. الايدا جەكەشەلەندىرۋ ناۋقانىنا, اسىرەسە مادەنيەت ۇيلەرى, كىتاپحانا, بالاباقشالار سياقتى الەۋمەتتىك نىسانداردىڭ قۇنسىز شارپىلىپ, ەل تۇرمىسىن تومەندەتكەنى دە بەلگىلى. مىنە, وسى ساپىرىلىسقان تۇستا وبلىس باسشىسى قابيبوللا قابەن ۇلىنىڭ پارمەنىمەن باتىس قازاقستان وبلىسىندا بالاباقشالار, كىتاپحانالار, مادەنيەت ۇيلەرىنىڭ جاپپاي ۇلەسكە تارالۋىنا جول بەرىلمەدى. اسىرەسە جۇمىسشى-ماماندار دايىندايتىن بىردە-ءبىر كاسىپتىك-تەحنيكالىق ۋچيليششە ءوز جۇمىسىن توقتاتقان جوق. ەكونوميكا وڭالىپ, رەفورمالار العاشقى وڭ ناتيجەلەرىن بەرە باستاعان تۇستا كوپتەگەن وڭىردە جوعارىداعى الەۋمەتتىك نىساندارعا قايتادان سۇرانىس كوتەرىلگەندە باتىس قازاقستان وڭىرىندە بۇل الەۋمەتتىك سالا جۇرىسىنەن جاڭىلماي, جۇمىسىن جالعاستىرا بەردى.
كوپتەگەن كاسىپورىنعا شەتەلدىك ينۆەستورلار كەلىپ, جاڭا تەحنولوگيا جابدىقتالىپ, جۇمىسسىزدىق جويىلا باستادى. جۇرت نازارباەۆ رەفورمالارىنىڭ ءمانىسىن ءتۇسىنىپ, جاڭا ومىرگە بەيىمدەلىپ, ەكونوميكانىڭ جاڭا تالاپتارىنا ساي ەڭبەك ەتۋگە جۇمىلدى.
قابەكەڭ سول داعدارىستى جىلدارى وبلىستىڭ ءۇش اۋدانىنىڭ ەلدى مەكەندەرىنە 900 شاقىرىمنان استام گاز قۇبىرلارىنىڭ وتكىزىلۋىن, 11 مەكتەپ, 5 اۋرۋحانا, 6 بالاباقشانىڭ, 4 اۋىلدىق كلۋب سالىنۋىن ۇيىمداستىرىپ, قامتاماسىز ەتتى.
ارينە قانداي دا ەكونوميكالىق, تۇرمىستىق وڭ ناتيجەلەر ادامداردىڭ ءوزارا تۇسىنىستىگى قالىپتاسىپ, ءبىر ماقسات, ءبىر مۇددەگە جۇمىلا العاندا عانا بولارى انىق. سوندىقتان دا قابەكەڭ ءوزىنىڭ بار تاجىريبەسى مەن مۇمكىندىگىن قوعامنىڭ تىنىشتىعى مەن بەيبىت ءومىر ءسۇرۋىن قامتاماسىز ەتۋگە ارناعانى انىق. اكىمشىلىك قىزمەتكەرلەرى, جەرگىلىكتى مەملەكەتتىك ينستيتۋتتاردىڭ بىلىكتىلىكپەن ءارى ادىلدىكپەن ەل اراسىندا جۇمىس ۇيىمداستىرا ءبىلۋى كەزەك كۇتتىرمەس ماڭىزعا يە بولدى.
كەزىندە تاۋەلسىزدىگىمىزدىڭ العاشقى جىلدارىنداعى كۇيزەلىس قيىنشىلىقتاردى سيپاتتاعان زامانىمىزدىڭ زاڭعار جازۋشىسى ءابىش كەكىلباەۆ قابەكەڭنىڭ قايراتكەرلىگى تۋرالى: «ونداي كەزدە ەل باسقارۋ ەكىنىڭ ءبىرىنىڭ قولىنان كەلمەيدى. جۇرت باسىنا تۇسكەن قيىندىققا قينالا ءجۇرىپ شىدايتىن ايرىقشا ءتوزىم كەرەك ەدى. قابيبوللا بويىنان سونداي تاۋسىلماس ءتوزىم تابىلدى. كۇيزەلە ءجۇرىپ, كۇلدى. كۇڭىرەنە ءجۇرىپ, ءتوزدى. جۇرتشىلىقتى كەلەشەك كۇنگە سەندىرە ءبىلدى. جاڭا ىستەردى قولعا الا ءجۇرىپ, ءبارىنىڭ دە ءبىر كۇنگىدەي بولماي, وڭالىپ كەتەرىنە كوزى جەتتى. ەڭ قيىن زاماندا دا حالىقتىڭ كوڭىل كۇيىن اۋلادى...» دەپ وي قورىتقان ەكەن.
قابەكەڭنىڭ باسشىلىعىمەن وبلىس ورتالىعىنىڭ ءسان-سالتاناتىن جاراستىرىپ, وڭىردە ۇلتىمىزدىڭ رۋحاني قۇندىلىقتارىن ۇلاعاتتاپ, تاريحي ەسكەرتكىشتەردى قالپىنا كەلتىرۋ, ۇلتىمىزدىڭ ۇلى تۇلعالارىنىڭ ۇمىتىلعان ەسىمدەرىن ۇلىقتاۋ, ەسكەرتكىشتەرىن ورناتۋ, كورشىلەس رەسەي وبلىستارىنداعى وتانداستارىمىزدىڭ ءبىزدىڭ ەلگە كەلۋىنە قامقورلىق جاساۋ سياقتى كوپتەگەن تىڭ شارالار جۇزەگە استى.
مەملەكەتتىك قىزمەتتىڭ جاۋاپكەرشىلىگى تۋرالى اڭگىمە ءبىزدىڭ قوعامدا جەتكىلىكتى. الايدا مەملەكەتتىك قىزمەتكەرلەر, ولاردىڭ ەڭبەگى تۋرالى پىكىرلەر كوبىنە بىرجاقتى ايتىلادى. ولاردىڭ بارلىعى دا ءوز ورتامىزدان, ءوز قوعامىمىزدان شىققان ازاماتتار.
ارينە, مەملەكەتتىك قىزمەتكەردىڭ مەملەكەتشىل بولۋى باستى تالاپ بولسا كەرەك. سونىمەن بىرگە ادامنىڭ ار, ۇيات, جاۋاپكەرشىلىك سياقتى تولىپ جاتقان قىرلارىمەن قاتار, ءوز ەلىنە دەگەن ەرەكشە قۇرمەتى, پاتريوتتىق ساناسىنىڭ ورنى ەرەكشە. بۇرىنعى وداق كەزىندە كىمگە بولسا دا ماسكەۋدە لاۋازىمدى قىزمەتكە شاقىرىلۋ جوعارى مارتەبە, بەدەل بولاتىن. كەزىندە ونداي تاڭداۋ قابەكەڭە دە تۇسكەن. كسرو كولىك-قۇرىلىس ءمينيسترى ي.د.سوسنوۆ جاس مامانعا ىقىلاسى اۋىپ, ونى مينيسترلىككە تەڭ كەلەر الىپ ترەست باسشىسى قىزمەتىنە شاقىرعاندا راحمەتىن ايتىپ, ءوز ەلىمدە ەڭبەك ەتۋىم كەرەك دەپ شەشكەن.
قابەكەڭ وبلىس اكىمى بولعان تۇستا ەل شەتىنە كورشى ەلدەردەن قوعامدىق ىقپال كۇشەيىپ, ءتىپتى كەيبىر ءبىزدىڭ ۇلتتىق مۇددەمىزگە قارسى توپتار قۇرىلىپ, جىكشىلدىككە كۇش سالعان جاعدايلار از بولمادى. ەلدىڭ بىرلىگىن, تىنىشتىعىن, ىنتىماعىن قالىپتاستىرىپ, مەملەكەت كونستيتۋتسياسىنىڭ ورىندالۋىن قامتاماسىز ەتۋدە وبلىس باسشىسى سابىرلى, ساليقالى ءارى ناتيجەلى جۇمىس جۇرگىزۋدى جولعا قويدى. دەموكراتيانى جەلەۋ ەتىپ قوعامدى ءارتۇرلى توپتارعا ءبولىپ, وزىنشە «كوسەم» بولعىسى كەلگەندەر دە از بولمادى. سوندايلارمەن سويلەسۋ, ولاردىڭ قوعام تىنىشتىعىنا قايشى ارەكەتتەرىنە جول بەرمەۋ تىكەلەي جەرگىلىكتى بيلىككە جۇكتەلەدى. قابەكەڭ ونىڭ ءبارىن ساۋاتتىلىقپەن, زاڭ اياسىندا ۇيىمداستىرا الدى.
قابيبوللا قابەن ۇلىنىڭ ۇزاق جىلدارعى جەمىستى ەڭبەگى باعالانىپ, استاناعا جوعارى لاۋازىمدى قىزمەتكە كەلدى. ونىڭ تاجىريبەسى ورتالىق مەملەكەتتىك باسقارۋ جۇيەسىنە قاجەت بولىپ, ون جىلعا جۋىق ەلىمىزدىڭ كولىك جانە كوممۋنيكاتسيا ءمينيسترىنىڭ ءبىرىنشى ورىنباسارى, پرەمەر-مينيستر كەڭسەسى باسشىسىنىڭ ورىنباسارى, پرەزيدەنتتىڭ پارلامەنتتەگى وكىلدىگىنىڭ باسشىسى سياقتى جاۋاپتى مەملەكەتتىك قىزمەتتەردى ابىرويمەن اتقاردى.
مەملەكەتىمىزدىڭ بيلىك تارماعىنىڭ ەڭ ماڭىزدى سالاسى – زاڭ شىعارۋشى ورگان – پارلامەنت ەكەندىگى تايعا تاڭبا باسقانداي كونستيتۋتسيامىزدىڭ ارنايى بابىندا جازىلعانىن حالىق بىلەدى. سوندىقتان دا پارلامەنت مۇشەسى بولىپ سايلانار ادامنىڭ مەملەكەتشىل بولۋىنىڭ ماڭىزى زور. پارلامەنت دەپۋتاتتارىنىڭ ارقايسىسىنىڭ ءومىر جولى, بەيىمى الۋان ءتۇرلى. اتقارۋشى بيلىك, سالالىق مينيسترلىكتەر نەمەسە سوت بيلىگىندە نەگىزىنەن, بەلگىلى ءبىر سالالاردىڭ ماماندارى عانا ەڭبەك ەتە السا – پارلامەنتكە سان الۋان ماماندىق يەلەرى, قانداي دا سالالار, اشىق قوعام وكىلدەرى سايلانا الادى. سوندىقتان دا پارلامەنت قۇرامى ازاماتتىق قوعامنىڭ ايناسىنداي. ارينە پارلامەنتتە ەڭ الدىمەن ءبىلىمدى, بىلىكتى ماماندار, تاجىريبەلى مەملەكەت قىزمەتكەرلەرى, ءومىردىڭ ءارتۇرلى كەزەڭدەرىنەن وتكەن, حالىقتىڭ جاعدايىن بىلەتىن, تۇسىنەتىن, مەملەكەتشىل ساناسى قالىپتاسقان, قانداي دا ءبىر قاراما-قايشىلىقتى تۇستاردا ورىندى پىكىر, سالماقتى ءسوز ايتا الاتىن تۇلعالاردىڭ بولۋى – باستاپقى قاجەتتىلىك. بۇگىنگى پارلامەنت دەپۋتاتتارىنىڭ قاي-قايسىسى دا وسى تالاپقا ساي تالقىلاۋداعى زاڭ جوبالارىنىڭ قاجەتتىلىگىن ءارى تيىمدىلىگىن جاقسارتۋعا ءۇن قوسا الاتىن, دايىندىعى جەتكىلىكتى ساياساتكەرلەر. سونىمەن بىرگە مەيلىنشە ءارتۇرلى الەۋمەتتىك توپتاردىڭ, اسىرەسە جاستار وكىلدەرىنىڭ سايلانۋى دا ساباقتاستىق ءداستۇرىن قالىپتاستىرىپ, مەملەكەت ىرگەسىن كۇشەيتۋگە سەپتىگىن تيگىزەرى دە حاق.
قابەكەڭ پارلامەنتكە كەلمەس بۇرىن جوعارىدا ايتىلعان جاۋاپتى كەزەڭدەردىڭ بارىنەن ۇلكەن تاجىريبە جيناقتاپ ءوتتى.
2007, 2012 جىلدارى «نۇر وتان» پارتياسىنان ءماجىلىس دەپۋتاتى بولىپ سايلانىپ, قازاقستان رەسپۋبليكاسى پارلامەنتى ءماجىلىسى توراعاسىنىڭ ورىنباسارى, توراعاسى بولدى. قابەكەڭ قاي دارەجەدە بولسا دا حالقىنا قالتقىسىز قىزمەت ەتۋمەن جۇرگەن ۇلت تۇلعالارىنىڭ ءبىرى ەكەندىگىن ادال ءارى ابىرويلى ەڭبەگىمەن كورسەتىپ كەلەدى.
تاۋەلسىزدىك جىلدارى قوعام تۇبەگەيلى وزگەردى. زامان كەلبەتى وزگەردى.
قازاقستان پارلامەنتى زاڭ شىعارۋ جۇمىسىندا – بىلىكتىلىگىن, ءبىزدىڭ قوعامنىڭ مادەنيەتىن ەل الدىنداعى جاۋاپكەرشىلىك قىزمەتىن كورسەتۋگە مىندەتتى. ءبىزدىڭ حالقىمىزدا داۋىس كوتەرىپ, ەكپىندەپ, قاتتى سويلەۋ ءداستۇرى بولعانىمەن, ەشقاشان ادەپتەن تىس دورەكىلىككە جول بەرىلمەگەن. كەرىسىنشە, ەرتە زاماننان بۇگىنگى ۇرپاققا مۇرا بولىپ قالعان – ءبىلىپ, بىلىممەن سويلەۋ, قارسى جاقتىڭ جانىنا تيگەنىمەن, ارىنا, نامىسىنا تيمەي, كەمسىتپەي ءسوز قادىرىن كوتەرە ويىن جەتكىزۋ مادەنيەتى ساقتالعان. ءماجىلىس توراعاسى نۇرلان نىعماتۋليننىڭ شەشىمىمەن دەپۋتاتتاردان قۇرىلعان ادەپ كەڭەسى دە نەگىزىنەن وسى ماقساتتى كوزدەيدى. 90-شى جىلداردىڭ باسىندا كەڭىنەن ءورىس العان ءپوپۋليزمنىڭ ۋاقىتى وتكەن. داڭعازا ايقايدان گورى ساليقالى ۇسىنىس, ورىندى پىكىر قوسۋ ماڭىزدىراق. پارلامەنتتەگى ارىپتەستەر جۇمىس توپتارىندا, كوميتەتتەردە پىكىر سالىستىرا ءجۇرىپ, ەل يگىلىگىنە ورتاق شەشىم, ورتاق مۇددەنى كوزدەيتىن مەملەكەتتىك ءارى مەملەكەتشىلدىك ۇجىم.
قابيبوللا قابەن ۇلى پارلامەنتتىك قىزمەتتە سونداي جول, ءجون كورسەتە الاتىن, بيلىكتىڭ زاڭ شىعارۋشى تارماعى مەن اتقارۋشى سالالارىنىڭ قىر-سىرىن بىلەتىن سالماقتى, بەدەلدى تۇلعا. ونىڭ ەلىمىزدە پارلامەنتتىك ينستيتۋتتىڭ, سونداي-اق قوعامدا ساياسي مادەنيەتتىڭ نىعايۋىنا قوسىپ جۇرگەن ەڭبەگى وراسان.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى
