كەلەر جىلدان باستاپ جاڭا ەرەجەگە سايكەس زەينەتاقى اۋدارىمدارىنا جۇمىس بەرۋشى مىندەتتى 10 پايىز اۋدارىمنان بولەك, قىزمەتكەردىڭ جالاقىسىنىڭ قوسىمشا 5 پايىزىن قوسىپ تولەۋى ءتيىس بولاتىن. شىنى كەرەك, بۇل قوعامدا وتە قىزۋ تالقىلاندى. كاسىپكەرلەردىڭ تاراپىنان ءتۇرلى وتكىر پىكىرلەر ايتىلدى. پرەزيدەنت جولداۋىنان كەيىن بۇل وزگەرىس 2023 جىلعا شەگەرىلگەنىن مەملەكەتتىڭ قازىرگى جاعدايدا قوسىمشا تولەمنىڭ ءتيىمسىز ەكەنىن تۇسىنگەنىن كورسەتسە كەرەك. ەكونوميست رەتىندە وسى ماسەلەگە قاتىستى مىنانى ايتقىم كەلەدى. قوسىمشا 5 پايىزدىق تولەم سالىق تۇسىمدەرىن كوبەيتكەنىمەن, جۇمىسشىلاردىڭ جالاقىسىنىڭ ازايۋىنا ىقپال ەتىپ, ءتىپتى جۇمىس بەرۋشىلەر ۆاكانسيالاردى قىسقارتۋعا دا ءماجبۇر بولۋى مۇمكىن ەدى. جارنانى كوبەيتپەس بۇرىن الدىمەن حالىقتىڭ ەڭبەكاقىسىن كوبەيتۋگە باسىمدىق بەرۋ كەرەك. جاڭا ايتىپ كەتكەنىمدەي, ونى جۇمىس بەرۋشىلەر تولەگەنىمەن, ءبارىبىر بۇل فاكتور ەڭبەكاقىنىڭ كولەمىنە كەرى اسەر ەتەدى. ونسىز دا تومەن جالاقىنىڭ ۇستىنە جارنا قوسىلسا, جالاقىسى تومەن حالىققا قوسىمشا جارنا اۋدارۋ مىندەتتەلسە, كۇنكورىس قيىندايدى. بۇل ماسەلەدە ەشقانداي قيىندىق تۋىنداماس ءۇشىن ايلىقتىڭ مەجەسىن 30 پايىزعا جەتكىزۋ كەرەك دەپ ويلايمىن.
ەكىنشىدەن, زەينەتاقى قورىنداعى قاراجاتتى ءاربىر ادامنىڭ ءوزى باسقارۋىنا مۇمكىندىك بەرۋ تۋرالى شەشىم اسا ورىندى ءارى قاجەت بولىپ وتىر. بۇل ماسەلە دە ەلىمىزدەگى ەكونوميست ساراپشىلار تاراپىنان ءبىرازدان بەرى ايتىلىپ كەلەدى. ءوز قاراجاتىن ءوزى باسقارا الاتىن مۇمكىندىگى بولعان جاعدايدا حالىقتىڭ جارنانى كوبىرەك سالۋعا ىنتاسى كۇشەيەدى. مىسالى جيناقتالعان قاراجاتتىڭ ءبىر بولىگىن يپوتەكاعا تۇرعىن ءۇي الۋ ءۇشىن جۇمساۋىنا بولادى.
پرەزيدەنت وسى تاپسىرماسىن ءتيىمدى جۇزەگە اسىرۋ تەتىگىن انىقتاۋدى ۇلتتىق بانككە تاپسىردى. الەمدىك تاجىريبەدە قالىپتاسقان مۇنداي قۇبىلىستى كەيبىر مەملەكەتتەر جەكە ازاماتتارعا ينۆەستيتسيا رەتىندە پايدالانۋ ءۇشىن بەرىپ وتىر. مىسالى, مالايزيادا زەينەتاقى قورى ەسەبىنەن قاجىلىققا بارۋ مۇمكىندىگى قاراستىرىلسا, ءبىز نەگىزگە الىپ وتىرعان سينگاپۋردا باسپانا الۋ ءۇشىن قوردان قاراجات الۋعا جاعداي جاسالعان. ياعني, حالىقارالىق تاجىريبە كورسەتكەندەي, مەملەكەت باسشىسى كوتەرگەن ماسەلەلەر حالىققا ءتيىمدى جانە وتە وزەكتى.
ماقسات حالىق,
ەكونوميست, Pro gente ەكونوميكالىق زەرتتەۋ ورتالىعىنىڭ جەتەكشىسى
