وسى ورايدا جولداۋداعى «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن. بىراق مۇنداي دارەجەگە جەتۋ ءۇشىن ءبارىمىز داڭعازا جاساماي, جۇمىلا جۇمىس جۇرگىزۋىمىز كەرەك. سونداي-اق ءتىل ۇلكەن ساياساتتىڭ قۇرالى ەكەنىن دە ۇمىتپاعان ءجون» دەگەن جولداردىڭ استارىندا ۇلكەن الەۋمەتتىك ءمان جاتىر. انا ءتىلىمىزدىڭ مەملەكەتتىك مارتەبەسىن كوتەرە ءتۇسۋ ءاربىرىمىزدىڭ ازاماتتىق پارىزىمىز.
پرەزيدەنت مادەنيەت قىزمەتكەرلەرىنىڭ, سونىڭ ىشىندە كىتاپحانا, مۋزەي, تەاتر قىزمەتكەرلەرىنىڭ ەڭبەكاقىسىنىڭ سوڭعى جىلدارى مۇلدە كوبەيمەگەندىگىن, سونىڭ سالدارىنان جاس ماماندار جەڭىلدىگى بار تۇرعىن ءۇي باعدارلامالارىنا قاتىسا الماي كەلە جاتقاندىعىن اشىق ايتتى. سونىڭ سالدارىنان مادەنيەت لايىقتى كادرلاردىڭ تاپشىلىعى ايقىن سەزىلىپ وتىرعاندىعىنا باسا ءمان بەرە كەلە, «كەلەسى جىلدان باستاپ ۇكىمەت مادەنيەت قىزمەتكەرلەرىنىڭ ەڭبەكاقىسىن كوبەيتۋى ءتيىس. سونداي-اق ءبىلىم بەرۋ جانە دەنساۋلىق ساقتاۋ سالالارىنداعى مىندەتتى الەۋمەتتىك جەڭىلدىكتەر مادەنيەت سالاسىنىڭ وكىلدەرىنە دە بەرىلۋى كەرەك» دەپ ماسەلەنىڭ ءتۇيىنىن تارقاتۋدىڭ ناقتى شەشىمىن كورسەتتى.
كەلەسى جىلى ۇلى عۇلاما, دانىشپاندارىمىز ءال-ءفارابيدىڭ 1150 جىلدىق, اباي قۇنانباي ۇلىنىڭ 175 جىلدىق مەرەيتويلارى اتالىپ وتپەك. وسىناۋ ماڭىزدى وقيعالارعا دايىندىقتى باستاي وتىرىپ, «ىسىراپشىلدىققا جول بەرمەي, عۇلاما تۇلعالارىمىزدىڭ ەڭبەكتەرىن حالىق اراسىندا دارىپتەۋىمىز كەرەك» ەكەندىگى دە ورىندى كوتەرىلدى.
پرەزيدەنتتىڭ بۇل جولداۋى الەۋمەتتىك جاڭعىرۋدىڭ جاڭا كەزەڭىنە جول اشىپ وتىر.
مارحابات بايعۇت,
جازۋشى, حالىقارالىق «الاش» سىيلىعىنىڭ لاۋرەاتى
