40 مىڭعا جۋىق سولتۇستىكقازاقستاندىق 15 اۋماقتىق, 355 باستاۋىش ۇيىمعا بىرىگىپ, ىقپالدى ساياسي كۇشكە اينالعان. ونىڭ مۇشەلەرى ەلباسى بەلگىلەپ بەرگەن مىندەتتەردى, پارتيانىڭ سايلاۋالدى باعدارلامالارىن باسشىلىققا الا وتىرىپ, ەرىك-جىگەرلەرىن حالىقتىڭ الەۋەتىن كوتەرۋ, ەل يگىلىگىن ارتتىرۋ جولىنا جۇمىلدىرعان. رەسپۋبليكا جۇرتشىلىعىنىڭ ۇلكەن قولداۋىنا يە پارتيا قاناتىنىڭ استىندا جارقىن ىستەردىڭ جارشىسى بولۋدى, رۋحاني قۇندىلىقتاردى ناسيحاتتاۋدى, لايىقتى ءىزباسارلارىن دايىنداۋدى قاشاندا ىزگى مۇرات سانايدى. بۇگىندە ولار ارالاسپايتىن سالا جوق دەسە دە بولادى. كوپشىلىكتى تولعاندىراتىن ماسەلەلەر بويىنشا اتقارىلىپ جاتقان ناقتى قادامدار مەن بۇقارالىق ءىس-شارالار قولداۋعا تۇرارلىق. بۇل ورايدا ساياسي كەڭەس ەرەكشە بەلسەندىلىك تانىتىپ, ايتۋلى ءرول اتقارىپ وتىر. ونىڭ كەزەكتى وتىرىسى «سەنىم. ديالوگ. بولاشاققا نىق قادام» دەگەن تاقىرىپقا ارنالىپ, پارتيا توراعاسى نۇرسۇلتان نازارباەۆ تاپسىرمالارىنىڭ ورىندالۋ بارىسى جان-جاقتى اڭگىمەلەندى.
وبلىس اكىمىنىڭ ورىنباسارى اسقار ساقىپكەرەەۆ ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەردى. وتكەن جىلعا قاراعاندا جالاقى مولشەرى 13 پايىزعا كوبەيىپ, ورتاشا كورسەتكىش 121 مىڭ تەڭگەنى قۇراعان. بارلىق دەڭگەيدەگى 800 شاقىرىم جولدى جوندەۋگە 37 ملرد تەڭگە قاراستىرىلعان. مۇنىڭ ءوزى 133 ەلدى مەكەندە تۇراتىن 95 مىڭعا جۋىق تۇرعىننىڭ قاتىناسىن جاقسارتۋعا مۇمكىندىك بەرمەك. جىل باسىنان بەرى 18 مىڭ ادام جۇمىسقا ورنالاسقان. اۋىل شارۋاشىلىعىنىڭ جالپى ءونىم كولەمى 94 ملرد تەڭگەگە جەتكەن. سوڭعى ءۇش جىلدا اگروونەركاسىپ سالاسىنا 200 ملرد تەڭگە ينۆەستيتسيا تارتىلعان. 23 ملرد تەڭگەگە ءبىر مىڭنان استام تەحنيكا اكەلىنگەن.
ارينە تسيفرلار قۋانتارلىق, كوڭىلگە جىلى اسەر بەرەدى. بىراق بۇدان ءبارى جاقسى دەگەن وي تۋماسا كەرەك. ساياسي كەڭەس وتىرىسىنا توراعالىق ەتكەن فيليال توراعاسى, ايماق باسشىسى قۇمار اقساقالوۆ كەز كەلگەن ماڭىزدى شەشىمدەردىڭ قابىلدانۋىنا نۇروتاندىقتاردىڭ باستاماشى بولىپ, بەلسەندىلىكپەن اتسالىسىپ كەلە جاتقانىن اتاي كەلىپ, پارتيانىڭ سايلاۋالدى باعدارلاماسىنىڭ ورىندالۋ بارىسىنا كەڭىنەن توقتالدى.
نۇرسۇلتان ءابىش ۇلى Nur Otan تولاعاي تابىستىڭ, بولاشاققا جارقىن جول اشاتىن جارقىن جەتىستىكتەر پارتياسى ەكەنىن تالاي رەت مالىمدەدى. ءبىز تاتۋلىق پەن تىنىشتىق, بەرەكە مەن بىرلىك سىندى ۇستانىمىمىزدان ەشقاشان اينىمايمىز. سونىمەن قاتار ازاماتتار مەن مەملەكەت اراسىن جالعاستىراتىن قۋاتتى ساياسي بۋىن رەتىندە جەتەكشىلىك ءرولىمىزدى ودان ءارى كۇشەيتە تۇسۋگە ءتيىسپىز. بۇل ورايدا حالىقپەن كەرى بايلانىس ورناتۋدىڭ ماڭىزى زور. سوندا عانا ادامداردىڭ كۇندەلىكتى مۇڭ-مۇقتاجدارى, قوردالانعان پروبلەمالارى تەزىرەك شەشىلەدى. قوعامدىق قابىلداۋ, پارتيالىق باقىلاۋ سەكىلدى بايلانىستىڭ ءتۇرلى فورمالارى ارقىلى ىقپال ەتۋدىڭ بىرەگەي ءادىس-تاسىلدەرىن جەتىلدىرۋ كەرەك. پارتيانىڭ جۇمىسىن جاڭعىرتۋ – الەۋمەتتىك ماڭىزعا يە قوعامدىق-ساياسي ماسەلەلەردى شەشۋدىڭ وڭتايلى جولدارىن قاراستىرۋ دەگەن ءسوز. قازاقستاننىڭ تۇڭعىش پرەزيدەنتى «سەنىم. ديالوگ. بولاشاققا نىق قادام – Nur Otan پارتياسىنىڭ 7 سەرپىنى» اتتى باعدارلامانى ۇسىنعاندا پارتيانىڭ بەلسەندى مۇشەلەرىن توپتاستىرۋ, جەمقورلىقپەن كۇرەستى كۇشەيتۋ, سەنىمدى اقتاماعان مۇشەلەرمەن قوش ايتىسۋ, بارلىق دەڭگەيدە پارتيا ورگاندارىنىڭ الەۋەتىن مەيلىنشە تولىق پايدالانۋ, بيلىكتىڭ پارتيالىق جاۋاپكەرشىلىگىن نىعايتۋ سەكىلدى وتە ماڭىزدى مىندەتتەردى سانامالاپ بەرگەن بولاتىن. وكىنىشكە قاراي, اقپاراتتىق-يدەولوگيالىق جۇمىستاردى تالاپقا ساي ۇيىمداستىرۋ بارلىق جەرگىلىكتى بۋىنداردا بىردەي سەزىلىپ وتىرعان جوق. جارتى جىلدىڭ قورىتىندىسى بويىنشا پارتيامەن بايلانىسىن ۇزگەن, جارعىلىق تالاپتاردى ورىنداماعان 1,5 مىڭ ادامنىڭ پارتيا قاتارىنان الاستاتىلۋى توزگىسىز جاعداي. پارتيا مۇشەلەرىنىڭ باسىم كوپشىلىگى بيۋدجەتتىك مەكەمەلەردە توپتاستىرىلعان. 500 جانە ودان دا كوپ ادام ەڭبەك ەتەتىن ءىرى كاسىپورىنداردا نۇروتاندىقتار قاتارى مۇلدەم از. ماسەلەن, كيروۆ اتىنداعى زاۋىتتا 600-دەن استام ادام جۇمىس ىستەسە, 42-ءسى عانا پارتيا مۇشەسى. ال پەتروپاۆل اۋىر ماشينا جاساۋ زاۋىتىندا مىڭ جارىم ادام ەڭبەك ەتسە, التاۋى عانا پارتيا مۇشەسى ەكەنىن قالاي تۇسىنۋگە بولادى؟, – دەدى ءوز سوزىندە قۇمار ىرگەباي ۇلى.
جەرگىلىكتى ءماسليحات دەپۋتاتتارىنىڭ دەنى نۇروتاندىقتار ەكەنىنە قاراماستان اركەز بەلسەندىلىك تانىتا بەرمەيدى. عابيت مۇسىرەپوۆ اۋداندىق ماسليحاتىنداعى 13 دەپۋتاتتىڭ سايلاۋشىلارمەن كەزدەسۋى ساۋساق بۇگۋگە دە كەلمەيدى. ونىڭ وزىندە اۋدان ورتالىعىمەن عانا شەكتەلگەن. تەك بيىلدىڭ وزىندە تارتىپتىك كەڭەستە مەملەكەتتىك قىزمەتشىلەرگە قاتىستى ون ەكى ءىس تالقىلانعان. پارتيالىق باقىلاۋدىڭ قورىتىندىسى بويىنشا بەس مەملەكەتتىك قىزمەتشى پارتيا قاتارىنان شەتتەتىلگەن.
كەڭەستە «ارداگەرلەردى ارداقتايىق», «باقىتتى وتباسى», «كەدەرگىسىز كەلەشەك», «جاستار – وتانعا» اتتى الەۋمەتتىك جوبالار مەن «رۋحاني جاڭعىرۋ», «تۋعان جەر» باعدارلامالارىن جۇزەگە اسىرۋعا باسىمدىق بەرۋ قاجەتتىگى اتاپ كورسەتىلدى. اناتولي رافالسكي, ءبىرجان شايمەردەنوۆ, التىنبەك ساپاروۆ, گەننادي زەنچەنكو, يۆان فيسەنكو سياقتى اگروقۇرىلىم جەتەكشىلەرىنىڭ تۋعان جەرگە دەگەن جاناشىرلىق قامقورلىقتارى مەن كومەكتەرى ۇلگى ەتىلدى.
ساياسي كەڭەس وتىرىسىن قورىتىندىلاعان فيليال توراعاسى تۇرعىنداردىڭ, تۇرمىسى تومەن وتباسىلاردىڭ, جاستاردىڭ تۇرمىس-تىرشىلىگىن وڭالتۋ, بۇل ورايدا پارتيالىق كەڭ اۋقىمدى ءىس-شارالاردىڭ سانىن ەمەس, ساپاسىن, مازمۇنىن الدىمەن ەسكەرۋ قاجەتتىگىن تاعى ءبىر مارتە ەسكە سالدى.
سولتۇستىك قازاقستان وبلىسى
