ۇلگىلى شاڭىراقتىڭ شاتتىعىن ەسەلەپ, مەرەيىن وسىرگەن بايقاۋعا بيىل 3 مىڭنان اسا وتباسى ءوتىنىش بىلدىرگەن. شىمكەنت شاھارىن قوسقاندا 17 وڭىردەن قارا ءۇزىپ كەلگەن جەڭىمپازدار ەلورداداعى «قازاقستان» ورتالىق كونتسەرت زالىندا وتكەن سالتاناتتى ماراپاتتاۋ راسىمىنە قاتىستى. مەرەكەلىك جيىننىڭ شىمىلدىعىن اشقان پرەمەر-ءمينيستردىڭ ورىنباسارى بەردىبەك ساپارباەۆ پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى. «حالقىمىزدىڭ ۇلتتىق جانە وتباسىلىق داستۇرلەرگە بەرىكتىگى قوعامداعى رۋحاني قۇندىلىقتاردىڭ ساقتالۋىنا ىقپال ەتەدى. بۇل مەملەكەتتىك ءىس-شارا – قازاقستاننىڭ الەۋمەتتىك ساياساتىنىڭ ماڭىزدى بولىگى. ەلىمىزدە جىل سايىن حالىقتىڭ ءومىر ءسۇرۋ جاعدايىن, تۇرمىس ساپاسىن جاقسارتۋعا باعىتتالعان ماڭىزدى شەشىمدەر قابىلدانۋدا. ەلباسى باستاماسىمەن مەرەكەلەر كۇنتىزبەسىنە وتباسى كۇنى مەيرامى ەنگىزىلدى. ىرىس-بەرەكەسى مەن ىنتىماعى جاراسقان ماۋەلى اۋلەتتەردى ناسيحاتتايتىن «مەرەيلى وتباسى» ۇلتتىق بايقاۋىن وتكىزۋ داستۇرگە اينالدى. بۇل شارالار سان عاسىرلار بويى قالىپتاسقان ۇلتتىق ادەت-عۇرىپتاردىڭ, سالت-داستۇرلەردىڭ جاڭعىرۋىنا, وتباسى ينستيتۋتىنىڭ نىعايۋىنا, ۇرپاق تاربيەسىنە جاڭاشا ءمان بەرىپ, ونەگەلى اۋلەتتەردىڭ ءورىسىن نىعايتۋعا ىقپال ەتەدى. ءداستۇرلى ۇلتتىق كونكۋرستىڭ قاتىسۋشىلارى وتانسۇيگىشتىك, ەڭبەكقورلىق, مەيىرىمدىلىك سياقتى ۇلگى تۇتارلىق ومىرلىك ۇستانىمداردى جان-جاقتى مەڭگەرگەنىن كورسەتتى. بۇل كونكۋرسقا قاتىسۋشىلاردىڭ بارلىعىن جەڭىمپازدار دەپ ايتۋعا بولادى. ويتكەنى وسى كونكۋرسقا قاتىسقان ءاربىر وتباسى مەرەيلى», دەلىنگەن مەملەكەت باسشىسىنىڭ قۇتتىقتاۋىندا.
بايقاۋدا نۇر-سۇلتان قالاسىنان بەلگىلى ايتىسكەر اقىن سەرىكزات دۇيسەنعازىنىڭ, الماتى قالاسىنان كاسىپكەر ابدىقالىقوۆتاردىڭ, ال شىمكەنت شاھارىنان كوپ بالالى سەرمانيزوۆتاردىڭ وتباسى توپ جاردى. ۇستازدىق ۇلى جولدى اتادان بالاعا 215 جىلدان بەرى جالعاپ كەلگەن اقمولا وبلىسىنداعى اۋباكىروۆتەر شاڭىراعى, ءبىلىم بەرۋ جانە مەدياتسيا سالاسىنا ۇلەس قوسىپ, 9 جىل ىشىندە اجىراسپاق بولعان مىڭنان استام وتباسىن ساقتاپ قالعان اقتوبە وبلىسىنداعى ابىلداەۆتار وتباسى جانە الماتى وبلىسىنداعى كاسىپكەر اقباسوۆتار وتباسى جەڭىمپاز اتاندى. جەڭىمپازداردىڭ قاتارىندا 12 بالاسىن تۇگەل كاسىپكە باۋلىعان شىعىسقازاقستاندىق چەركاشيندەر وتباسى, سپورت سالاسىندا ەڭبەك ەتىپ, 26 جىلدا 6 الەم چەمپيونى, 20 ازيا چەمپيونى مەن 100-گە جۋىق قازاقستان چەمپيونىن تاربيەلەگەن جامبىل وبلىسىنداعى جانساقالوۆتار وتباسى, باتىسقازاقستاندىق پەداگوگ قارساقوۆتار وتباسى بار. سونداي-اق 500 جىل بويى مەتاللۋرگ ماماندىعىن اتادان بالاعا جالعاپ كەلە جاتقان قاراعاندى وبلىسىنداعى سالكاۋوۆتار وتباسى, قوستاناي وبلىسىنان بۋبليك اۋلەتى, قىزىلوردا وبلىسىنان مەحانيزاتور قيانبەكوۆتەر وتباسى, ماڭعىستاۋ وبلىسىنداعى مال شارۋاشىلىعىن كاسىپ ەتكەن نۇرسەبەپوۆتەر شاڭىراعى, پاۆلودار وبلىسىنداعى كومىر ونەركاسىبى سالاسىندا ۇزاق جىل تەر توككەن تولەۋباەۆتار وتباسى, سولتۇستىك قازاقستان وبلىسىنان اۋعانستان سوعىسىنىڭ ارداگەرى ۋشاكوۆتار وتباسى جانە تۇركىستان وبلىسىنان ەركەباەۆتار وتباسى ماراپاتتالدى. ولارعا پرەمەر-ءمينيستردىڭ ورىنباسارى بەردىبەك ساپارباەۆ پەن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا ديپلومدار جانە تۇرمىستىق تەحنيكا ساتىپ الۋعا سەرتيفيكاتتار تابىس ەتتى.
بيىل اتىراۋ وبلىسىنداعى اۋىل مەكتەبىندە ۇستازدىق ەتەتىن تىلەكقابىلوۆتار «مەرەيلى وتباسى» ۇلتتىق بايقاۋىنىڭ لاۋرەاتى اتاندى. اۋلەتتىڭ تىرەگى بولعان ەڭبەك ارداگەرى, اعارتۋ ءىسىنىڭ ۇزدىگى, يندەر اۋدانىنىڭ قۇرمەتتى ازاماتى تولەش تىلەكقابىل ۇلى ومىردەن وزعان. 82 جاستاعى اۋلەتتىڭ اجەسى ايمەكەن قابدەشقىزى «التىن القا», «ەڭبەك ەرى» مەدالدارىنىڭ يەگەرى. قازىر ول 8 بالادان 28 نەمەرە, 16 شوبەرە ءسۇيىپ وتىر. نەمەرەلەرىنىڭ بەسەۋى مەكتەپتى «التىن بەلگىمەن» اياقتاسا, ءۇش نەمەرەسى «قىزىل ديپلوم» يەگەرى اتانعان. ابىلاي تولەش اتتى نەمەرەسى پانكراتيوننان الەم چەمپيونى, جاۋىنگەرلىك سامبودان الەم كۋبوگىنىڭ ەكى دۇركىن كۇمىس جۇلدەگەرى. جەڭىمپاز وتباسىنا وتاندىق «سارىارقااۆتوپروم» جشس شىعارعان شاعىن اۆتوبۋستىڭ كىلتى تابىستالدى. ماراپاتتاۋ ءراسىمى تانىمال ەسترادا ارتىستەرىنىڭ مەرەكەلىك كونتسەرتىمەن اياقتالدى.
